གང་ཟག་ཏུ་ལྟ་བའོ། །ཤཱ་རིའི་བུ་བྱིས་པ་སོ་སོའི་སྐྱེ་བོ་ཐམས་ཅད་ནི་རྟོག་པ་འདི་དང་ལྡན་པའི་ཕྱིར་རོ། །གང་ལ་རྟོག་པ་འདི་དག་མེད་པ་དེ་ལ་ནི་ཆོས་ཐམས་ཅད་ཡིད་ལ་བྱེད་པ་མེད་པའི་ཕྱིར་རོ།། །།སངས་རྒྱས་ཀྱི་སྡེ་སྣོད་ཚུལ་ཁྲིམས་འཆལ་པ་ཚར་གཅོད་པ། བམ་པོ་ལྔ་པ། དེ་ལྟ་མོད་ཀྱི་ཆོས་ཐམས་ཅད་རང་གི་མཚན་ཉིད་སྟོང་པ་དང་། བདག་མེད་པ་དང་། སེམས་ཅན་མེད་པ་དང་། སྲོག་མེད་པ་དང་། གསོ་བ་མེད་པ་དང་། གང་ཟག་མེད་པར་ཡིད་ལ་བྱེད་དོ། །དེ་དེ་ལྟར་ཡིད་ལ་བྱེད་པ་ན་རབ་ཏུ་དགའ་བ་སྐྱེ་བར་འགྱུར་རོ། །དོན་དམ་པ་སྟོང་པ་ཉིད་ཀྱིས་ཀྱང་སྐྲག་པ་དང་། དངང་བ་དང་། ཀུན་ཏུ་དངང་བར་མི་འགྱུར་རོ། །ཕུང་པོ་ལྔ་རྣམས་མ་སྐྱེས་པ་དང་། ཁམས་རྣམས་དང་སྐྱེ་མཆེད་རྣམས་མ་བྱུང་བར་ཡང་དག་པར་ཤེས་ནས། དེ་མྱ་ངན་ལས་འདས་པ་ལ་ཡང་རློམ་སེམས་སུ་མི་བྱེད། མྱ་ངན་ལས་འདས་པས་ཀྱང་རློམ་སེམས་སུ་མི་བྱེད་དེ། མྱ་ངན་ལས་འདས་པ་དམིགས་སུ་མེད་པའི་ཕྱིར་རོ། །གང་གིས་ཞི་བ་དང་། གང་ཞི་བ་དང་། གང་དུ་ཞི་བ་དེ་ཡང་རློམ་སེམས་སུ་མི་བྱེད་དེ། དམིགས་སུ་མེད་པའི་ཕྱིར་རོ། །ཤཱ་རིའི་བུ་དོན་དམ་པ་སྟོང་པ་ཉིད་དེ་ནི་རྗེས་སུ་འཐུན་པའི་བཟོད་པ་ཡིན་ནོ། །དེ་རྗེས་སུ་འཐུན་པའི་བཟོད་པ་དེ་དང་ལྡན་ན་དོན་དམ་པ་གང་ཡིན་པ་དེ་ལ་རང་གི་མཚན་ཉིད་དམིགས་སུ་མེད་དོ། །ཤཱ་རིའི་བུ་བཟོད་པའི་རང་གི་མཚན་ཉིད་གང་ཞེ་ན། འདི་ལྟ་སྟེ་མཚན་ཉིད་མེད་པའོ། །ཤཱ་རིའི་བུ་འདི་ཇི་སྙམ་དུ་སེམས། བཟོད་པའི་མཚན་ཉིད་གང་ཡིན་པ་དེ་ཇི་ག་བདག་ཡིན་ནམ། སེམས་ཅན་ཡིན་ནམ། སྲོག་ཡིན་ནམ། གསོ་བ་ཡིན་ནམ། གང་ཟག་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་ཤེས་པ་དེ་དང་ལྡན་པ་གང་ཡིན་པ་དེ་ནི་དགྲ་བཅོམ་པ་ཡིན་ནོ། །སངས་རྒྱས་ཀྱི་སྲས་ཡིན་ནོ། །མི་གནས་པའི་བསམ་གཏན་པ་ཡིན་ནོ། །ཤཱ་རིའི་བུ་འདི་ནི་སངས་རྒྱས་ཀྱི་གསུང་གང་ལ་ཡང་མི་རྟོག་པ། རྣམ་པར་རྟོག་པ་མེད་པ་སྟེ། འདི་ནི་དོན་དམ་པའི་རྣམ་པར་ཐར་པའི་སྒོ་ཡིན་ནོ། །སྐྱེས་བུ་བླུན་པོ་གང་ཞིག་འཁོར་གྱི་ནང་དུ་སོང་སྟེ། བརྟགས་ཤིང་བརྟགས་ནས་འདི་ནི་སངས་རྒྱས་ཀྱི་གསུང་ཡིན་ནོ།