བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་དེ་བས་ནི་གང་ཞིག་སངས་རྒྱས་ཀྱི་བྱང་ཆུབ་འདི་མི་ཤེས་པར་གཞན་ལ་ཡོངས་སུ་མ་དག་པའི་ཆོས་སྟོན་པ་དེ་ཆེས་མང་དུ་མི་དགེ་བའི་རྩ་བ་མངོན་པར་འདུ་བྱེད་པར་འགྱུར་རོ། །དེ་ཅིའི་ཕྱིར་ཞེ་ན། ཤཱ་རིའི་བུ་འདི་ལྟར་སངས་རྒྱས་ཀྱི་བྱང་ཆུབ་ལ་སྨོད་པར་བྱེད་པ་ནི་འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ལ་ཁ་ཟེར་བའི་ཕྱིར་རོ། །དེ་ཅིའི་ཕྱིར་ཞེ་ན། ཤཱ་རིའི་བུ་འདི་ལྟར་འདས་པའི་དུས་ན་བྱུང་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་ཡིན་པ་དེ་དག་ཆོས་སྟོན་པ་ཡང་ཆོས་ཐམས་ཅད་སྟོང་པ་ཡིན་ཏེ། སེམས་ཅན་མེད་པ། སྲོག་མེད་པ། གསོ་བ་མེད་པ། གང་ཟག་མེད་པའོ། །ཤཱ་རིའི་བུ་མ་འོངས་པའི་དུས་ན་འབྱུང་བར་འགྱུར་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་ཡིན་པ་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་སངས་རྒྱས་པ་དེ་དག་གི་ཆོས་བསྟན་པ་ཡང་ཆོས་ཐམས་ཅད་སྟོང་པ་ཡིན་ཏེ། སེམས་ཅན་མེད་པ། སྲོག་མེད་པ། གསོ་བ་མེད་པ། གང་ཟག་མེད་པའོ། །ཤཱ་རིའི་བུ་ད་ལྟར་གྱི་ང་དང་། ཤར་དང་། ལྷོ་དང་། ནུབ་དང་། བྱང་དང་། ཕྱོགས་མཚམས་ཀྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གཱའི་ཀླུང་གི་བྱེ་མ་དང་མཉམ་པ་གང་ཡིན་པ་དེ་དག་ཐམས་ཅད་ཆོས་སྟོན་པ་ཡང་དོན་དམ་པ་སྟོང་པ་ཉིད་བདག་མེད་པ། སེམས་ཅན་མེད་པ། སྲོག་མེད་པ། གསོ་བ་མེད་པ། གང་ཟག་མེད་པ་ཁོ་ན་རབ་ཏུ་སྟོན་ཏོ། །ཤཱ་རིའི་བུ་སངས་རྒྱས་བཅོམ་ལྡན་འདས་རྣམས་ཀྱིས་ཡང་དག་ཕུལ་གྱི་ཆོས་བསྟན་པ་འདི་ནི་དོན་དམ་པ་སྟོང་པ་ཉིད་ཡིན་ཏེ། འདི་ལྟ་སྟེ། སངས་རྒྱས་ཀྱི་ཆོས་ཐམས་ཅད་ནི་རང་གི་ངང་གིས་འབྱུང་བ། དངོས་པོ་མེད་པ། དམིགས་པ་མེད་པ། སྟོང་པ་ཉིད་རང་བཞིན་ལས་ལོག་པ། འགག་པ་མེད་པ། མིང་དང་མཚན་མ་མེད་པ། རང་གི་མཚན་ཉིད་སྟོང་པ་རྟོག་པ་སྤངས་པའོ། །ཤཱ་རིའི་བུ་དེ་བཞིན་གཤེགས་པ་ནི་རྟོག་པ་མེད་པའི་བྱང་ཆུབ་ཀྱི་ཆོས་སྟོན་ཏོ། །ཤཱ་རིའི་བུ་རྟོག་པ་གང་ཞེ་ན་འདི་ལྟ་སྟེ། བདག་ཏུ་ལྟ་བ་དང་། སེམས་ཅན་དུ་ལྟི་བ་དང་། སྲོག་ཏུ་ལྟ་བ་དང་། གང་ཟག་ཏུ་ལྟ་བའོ།