བརྟགས་ཤིང་བརྟགས་ནས་འདི་ནི་སངས་རྒྱས་ཀྱི་གསུང་ཡིན་ནོ། །འདི་ནི་འཕགས་པའི་ལམ་ཡིན་ནོ་ཞེས་སྟོན་ཅིང་ལོག་པའི་ལྟ་བ་སྟོན་པར་བྱེད་ན། དེ་ནི་འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ལ་སྨོད་པ་དང་། སྡིག་པའི་གྲོགས་པོ་ཡིན་ཏེ། སྐྱེས་བུ་དམ་པ་མ་ཡིན་པ་དེ་ནི་དགེ་བའི་བཤེས་གཉེན་མ་ཡིན་ནོ། །དེ་ཅིའི་ཕྱིར་ཞེ་ན། ཤཱ་རིའི་བུ་ཇི་ལྟར་ཡང་ཕས་ཀྱི་རྒོལ་བ་འགའ་ཞིག་གིས་མཛའ་བཤེས་ཀྱི་སྲོག་དང་འབྲལ་བར་བྱེད་ན་དེ་ནི་ཚེ་གཅིག་གི་ཡིན་ནོ། །སྐྱེས་བུ་བླུན་པོ་ཡོངས་སུ་མ་དག་པའི་ཆོས་སྟོན་པ་འདི་ནི་སྲིད་པ་བྱེ་བ་ཕྲག་བརྒྱ་སྟོང་རྣམས་སུ་གནོད་པ་ཆེན་པོ་བྱེད་པ་ཡིན་ཏེ། དེ་དག་སངས་རྒྱས་ཀྱི་བྱང་ཆུབ་ལ་རྨོངས་པ་དང་། སྔོན་གྱི་འཛིན་པ་དེ་ཉིད་འབར་བར་བྱེད། ཀུན་དུ་འཇུག་པར་བྱེད་དེ། འཛིན་པ་གང་གིས་ང་རྒྱལ་རྒྱུན་གཅོད་པར་མི་བྱེད་པ་ཡིན་ནོ། །ཤཱ་རིའི་བུ་རྣམ་གྲངས་འདིས་ཀྱང་ཡོངས་སུ་མ་དག་པའི་ཆོས་སྟོན་པའི་དགེ་སློང་ནི་བསོད་ནམས་མ་ཡིན་པ་མང་དུ་སྐྱེད་པར་བྱེད་པས་སྡིག་པའི་གྲོགས་པོ་ཡིན་ནོ། །འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་བྱང་ཆུབ་ལ་སྨོད་པ་ཡིན་ནོ། །ཤཱ་རིའི་བུ་འཛམ་བུའི་གླིང་ན་སེམས་ཅན་ཇི་སྙེད་འཁོད་པ་དང་། སྤྱི་ཕུད་ཀྱི་འཇིག་རྟེན་གྱི་ཁམས་སུ་ཇི་སྙེད་གཏོགས་པ་དང་། ཤཱ་རིའི་བུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་སེམས་ཅན་ཇི་སྙེད་པ་དེ་དག་ཐམས་ཅད་འགའ་ཞིག་གིས་སྲོག་དང་ཕྲལ་བ་བས་ནི་གང་ཞིག་གཞན་ལ་ཡོངས་སུ་མ་དག་པའི་ཆོས་སྟོན་པར་བྱེད་ན། འདི་ཉིད་དེ་བས་ཆེས་བསོད་ནམས་མ་ཡིན་པ་མང་དུ་སྐྱེད་པར་འགྱུར་རོ། །དེ་བཞིན་དུ་གླིང་བཞི་པ་རྣམས་དང་། སྤྱི་ཕུད་ཀྱི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་རྣམས་ལ་ཡང་བརྗོད་པར་བྱ་སྟེ། ཤཱ་རིའི་བུ་འཛམ་བུའི་གླིང་གི་སེམས་ཅན་རྣམས་ཀྱང་ཞོག །སྤྱི་ཕུད་ཀྱི་འཇིག་རྟེན་གྱི་ཁམས་སུ་གཏོགས་པ་ཇི་སྙེད་པ་ཡང་ཞོག །ཤཱ་རིའི་བུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་སེམས་ཅན་ཇི་སྙེད་པ་དེ་དག་ཐམས་ཅད་འགའ་ཞིག་གིས་སྲོག་དང་ཕྲལ་བ་བས། གང་གིས་གཞན་ལ་ཡོངས་སུ་མ་དག་པའི་ཆོས་སྟོན་ན་འདི་ཉིད་དེ་བས་ཆེས་བསོད་ནམས་མ་ཡིན་པ་མང་དུ་སྐྱེད་པར་འགྱུར་རོ། །དེ་ཅིའི་ཕྱིར་ཞེ་ན།