།བདེ་བར་གཤེགས་པ་མཆོག་ཏུ་ངོ་མཚར་ལགས་སོ། །བཀའ་སྩལ་པ། ཤཱ་རིའི་བུ་དེ་བས་ཀྱང་འདི་ལྟ་སྟེ། འདུས་བྱས་ཐམས་ཅད་མངོན་པར་འདུས་མ་བྱས་པ་དང་། འབྱུང་བ་མེད་པ་དང་། མཚན་མ་མེད་པ་དང་། མཚན་ཉིད་མེད་པ་དང་། འདུས་མ་བྱས་པ་དང་། བསྟན་དུ་མེད་པ་ལ་དེ་བཞིན་གཤེགས་པས་ཆོས་བསྟན་པ་གང་ཡིན་པ་འདི་ནི་ཆེས་ངོ་མཚར་ཡིན་ནོ། །ཤཱ་རིའི་བུ་དཔེར་ན་འདི་ན་སྐྱེས་བུ་འགའ་ཞིག་རྒྱ་མཚོ་དང་བཅས། རི་དང་བཅས་རྩྭ་ཤིང་དང་ཆུ་དང་བཅས་པའི་གླིང་བཞི་པའི་འཇིག་རྟེན་གྱི་ཁམས་འདི་བཏེག་ནས་སྦྲང་མའི་བྱིན་པའི་ཐེམ་སྐས་ལས་ཚངས་པའི་འཇིག་རྟེན་དུ་འཛེག་པར་བྱེད་ན། ཤཱ་རིའི་བུ་འདི་ཇི་སྙམ་དུ་སེམས། ཇི་ག་སྐྱེས་བུ་དེ་ངོ་མཚར་བྱེད་པ་ཡིན་ནམ། གསོལ་པ། བཅོམ་ལྡན་འདས་ངོ་མཚར་ལགས་སོ། །བདེ་བར་གཤེགས་པ་མཆོག་ཏུ་ངོ་མཚར་ལགས་སོ། །བཀའ་སྩལ་པ། ཤཱ་རིའི་བུ་དེ་བས་ཀྱང་འདི་ལྟ་སྟེ། འདུ་བྱེད་ཐམས་ཅད་མངོན་པར་འདུས་མ་བྱས་པ་དང་། འབྱུང་བ་མེད་པ་དང་། མཚན་མ་མེད་པ་དང་། མཚན་ཉིད་མེད་པ་དང་། འདུས་མ་བྱས་པ་དང་། བསྟན་དུ་མེད་པ་ལ་དེ་བཞིན་གཤེགས་པས་ཆོས་བསྟན་པ་གང་ཡིན་པ་འདི་ནི་ཆེས་ངོ་མཚར་ཡིན་ནོ། །ཤཱ་རིའི་བུ་དཔེར་ན་སྐྱེས་བུ་འགའ་ཞིག་གིས་རླུང་གིས་བསྒུལ་བའི་སྲད་བུས་རི་རབ་རིའི་རྒྱལ་པོ་གྱེན་དུ་བཏེག་སྟེ། ནམ་མཁའ་འམ་བར་སྣང་ལ་འཛིན་པར་བྱེད་ན། ཤཱ་རིའི་བུ་འདི་ཇི་སྙམ་དུ་སེམས། ཇི་ག་སྐྱེས་བུ་དེ་ངོ་མཚར་བྱེད་པ་ཡིན་ནམ། གསོལ་པ། བཅོམ་ལྡན་འདས་ངོ་མཚར་ལགས་སོ། །བདེ་བར་གཤེགས་པ་མཆོག་ཏུ་ངོ་མཚར་ལགས་སོ། །བཀའ་སྩལ་པ། ཤཱ་རིའི་བུ་དེ་བས་ཀྱང་འདི་ལྟ་སྟེ། འདུས་བྱས་ཐམས་ཅད་འདུས་མ་བྱས་པ་དང་ཞེས་བྱ་བ་རྒྱས་པར་བྱ་སྟེ། དེ་བཞིན་གཤེགས་པས་ཆོས་བསྟན་པ་གང་ཡིན་པ་འདི་ནི་ཆེས་ངོ་མཚར་ཡིན་ནོ། །ཤཱ་རིའི་བུ་འདི་ཇི་སྙམ་དུ་སེམས། ཇི་ག་གང་གཱའི་འབབ་ཆུ་ཆེན་པོ་ཤིན་ཏུ་ཆེ་བ་དང་། རྒྱ་ཆེ་བ་དང་། གཏིང་ཟབ་པ་དང་། ཚད་མེད་པ་ཡིན་ནམ། གསོལ་པ། བཅོམ་ལྡན་འདས་དེ་ལྟ་ལགས་སོ། །བཀའ་སྩལ་པ། ཤཱ་རིའི་བུ་གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་འདི་ལྟ་བུའི་ཆར་གྱི་རྒྱུན་ཆེན་པོ་འདི་ལྟ་སྟེ།