ཇི་ག་སྐྱེས་བུ་དེ་ཤིན་ཏུ་ངོ་མཚར་བྱེད་པ་ཡིན་ནམ། གསོལ་པ། བཅོམ་ལྡན་འདས་ངོ་མཚར་ལགས་སོ། །བདེ་བར་གཤེགས་པ་མཆོག་ཏུ་ངོ་མཚར་ལགས་སོ། །བཀའ་སྩལ་པ། ཤཱ་རིའི་བུ་དེ་བས་ཀྱང་འདི་ལྟ་སྟེ། མངོན་པར་འདུ་བྱེད་པ་མེད་པ་དང་། འབྱུང་བ་མེད་པ་དང་། མཚན་མ་མེད་པ་དང་། མཚན་ཉིད་མེད་པ་དང་། བསྟན་དུ་མེད་པ་ལ། དེ་བཞིན་གཤེགས་པས་ཆོས་བསྟན་པ་གང་ཡིན་པ་འདི་ནི་ཆེས་ངོ་མཚར་ཡིན་ནོ། །ཤཱ་རིའི་བུ་དཔེར་ན་ལྕི་བའི་མེ་ཆེན་པོ་འབར་བ། རབ་ཏུ་འབར་བ། ཀུན་ཏུ་རབ་ཏུ་འབར་བ། མེ་ལྕེ་གཅིག་ཏུ་གྱུར་པ། འོད་དང་བཅས་པ་འཕང་དུ་དཔག་ཚད་ཙམ་ལ། རྒྱར་ཡང་དཔག་ཚད་ཙམ་ཡོད་པའི་མེ་འུད་སྒྲ་ཅན་གྱིས་སྒོ་བཞི་རབ་ཏུ་གང་བར་གྱུར་ཅིང་སྒོ་བཞི་ནས་དེའི་མེ་ལྕེ་བར་སྣང་ལ་དཔག་ཚད་བཞི་ཙམ་དུ་གྱེན་དུ་འབར་བར་གྱུར་པ་དེར་སྐྱེས་བུ་འགའ་ཞིག་རྩྭ་ཁུར་ཤིན་ཏུ་ཆེན་པོ་ཐོགས་ཏེ་འཇུག་པར་བྱེད་ལ་དེ་ཡང་ཞུགས་མ་ཐག་ཏུ་སྒོ་བཞི་པོ་དེ་དག་ནས་ཚུབ་མ་བཞི་མངོན་དུ་ལངས་ཏེ། མེ་ལྕེ་གང་ཡིན་པ་དེས་སྐྱེས་བུ་དེའི་ལུས་ལ་ཕོག་ན། དེའི་ལུས་ཀྱང་མི་ཚིག་ལ་རྩྭ་ཡང་མི་ཚིག་པ་ཁོ་ནར་སླར་འབྱུང་ཞིང་། རྩྭའི་ཉག་མ་གཅིག་ཀྱང་མི་ཚིག་པར་བྱེད་ན། ཤཱ་རིའི་བུ་འདི་ཇི་སྙམ་དུ་སེམས། ཇི་ག་སྐྱེས་བུ་དེ་ངོ་མཚར་བྱེད་པ་ཡིན་ནམ། གསོལ་པ། བཅོམ་ལྡན་འདས་ངོ་མཚར་ལགས་སོ། །བདེ་བར་གཤེགས་པ་མཆོག་ཏུ་ངོ་མཚར་ལགས་སོ། །བཀའ་སྩལ་པ། ཤཱ་རིའི་བུ་དེ་བས་ཀྱང་འདི་ལྟ་སྟེ། འདུས་བྱས་ཐམས་ཅད་མངོན་པར་འདུ་བྱེད་པ་མེད་པ་དང་། འབྱུང་བ་མེད་པ་དང་། མཚན་མ་མེད་པ་དང་། མཚན་ཉིད་མེད་པ་དང་། འདུས་མ་བྱས་པ་དང་། བསྟན་དུ་མེད་པ་ལ་དེ་བཞིན་གཤེགས་པས་ཆོས་བསྟན་པ་གང་ཡིན་པ་འདི་ནི་ཆེས་ངོ་མཚར་ཡིན་ནོ། །ཤཱ་རིའི་བུ་དཔེར་ན་འདི་ན་སྐྱེས་བུ་འགའ་ཞིག་རྒྱ་མཚོ་ཆེན་པོ་རྒལ་བར་འདོད་ནས། དེས་རྡོའི་གཟིངས་ས་ཆེན་པོ་ཙམ་གྱིས་རྒྱ་མཚོ་ཆེན་པོའི་ཚུ་རོལ་གྱི་འགྲམ་ནས་ཕ་རོལ་གྱི་འགྲམ་དུ་ཕྱིན་པར་བྱེད་ན། ཤཱ་རིའི་བུ་འདི་ཇི་སྙམ་དུ་སེམས། ཇི་ག་སྐྱེས་བུ་དེ་ངོ་མཚར་བྱེད་པ་ཡིན་ནམ། གསོལ་པ། བཅོམ་ལྡན་འདས་ངོ་མཚར་ལགས་སོ། །བདེ་བར་གཤེགས་པ་མཆོག་ཏུ་ངོ་མཚར་ལགས་སོ།