ཤཱ་རིའི་བུ་གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་འདི་ལྟ་བུའི་ཆར་གྱི་རྒྱུན་ཆེན་པོ་འདི་ལྟ་སྟེ། གང་གཱའི་འབབ་ཆུ་ཆེན་པོ་ལྟ་བུའི་ཆར་གྱི་རྒྱུན་ཆེན་པོ་བབ་པ་དེ་ལ་སྐྱེས་བུ་འགའ་ཞིག་གིས་རེ་ཞིག་ཆར་ཆེན་པོའི་རྒྱུན་ནམ་མཁའ་བར་སྣང་ལ་བབ་པ་ས་ལ་མ་ལྷུང་བར་ལག་པ་གཅིག་གིས་གཟེད་ལ། ཆུ་ཐིགས་པ་འགའ་ཡང་དེའི་ལག་པ་ནས་ཟགས་ཏེ་ས་ལ་ལྷུང་བར་མ་གྱུར་ན། ཤཱ་རིའི་བུ་འདི་ཇི་སྙམ་དུ་སེམས། ཇི་ག་སྐྱེས་བུ་དེ་ངོ་མཚར་བྱེད་པ་ཡིན་ནམ། གསོལ་པ། བཅོམ་ལྡན་འདས་ངོ་མཚར་ལགས་སོ། །བདེ་བར་གཤེགས་པ་མཆོག་ཏུ་ངོ་མཚར་ལགས་སོ། །བཀའ་སྩལ་པ། ཤཱ་རིའི་བུ་དེ་བས་ཀྱང་འདི་ལྟ་སྟེ། འདུས་བྱས་ཐམས་ཅད་འདུས་མ་བྱས་པ་དང་ཞེས་བྱ་བ་རྒྱས་པར་བྱ་སྟེ། དེ་བཞིན་གཤེགས་པས་ཆོས་བསྟན་པ་གང་ཡིན་པ་འདི་ནི་ཆེས་ངོ་མཚར་ཡིན་ནོ། །ཤཱ་རིའི་བུ་འདི་ཇི་སྙམ་དུ་སེམས། ཇི་ག་རིའི་རྒྱལ་པོ་རི་རབ་ཆེ་བ་དང་ཤིན་ཏུ་ཆེ་བ་ཡིན་ནམ། གསོལ་པ། བཅོམ་ལྡན་འདས་ཆེ་ལགས་སོ། །བདེ་བར་གཤེགས་པ་མཆོག་ཏུ་ཆེ་བ་ལགས་སོ། །བཀའ་སྩལ་པ། ཤཱ་རིའི་བུ་གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་འདི་ལྟ་བུའི་རྡོ་བའི་ཆར་འདི་ལྟ་སྟེ། རིའི་རྒྱལ་པོ་རི་རབ་ལྟ་བུའི་རྡོ་བའི་ཆར་གྱི་རྒྱུན་ཆེན་པོ་བབ་པ་དེ་ལ་སྐྱེས་བུ་འགའ་ཞིག་གིས། རེ་ཞིག་རྡོའི་ཆར་ཆེན་པོའི་རྡོ་བའི་ཆར་གྱི་རྒྱུན་ཆེན་པོ་ནམ་མཁའ་བར་སྣང་ལ་མངོན་པར་བབ་པ་ས་ལ་མ་ལྷུང་བར་ལག་པ་གཅིག་གིས་གཟེད་ལ་རྡོའི་གཟེགས་མ་ཆུང་ངུ་ན་ཡུངས་འབྲུ་ཙམ་འགའ་ཡང་དེའི་ལག་པ་ནས་ཟགས་ཏེ་ས་ལ་ལྷུང་བར་མ་གྱུར་ན། ཤཱ་རིའི་བུ་འདི་ཇི་སྙམ་དུ་སེམས། སྐྱེས་བུ་དེ་ངོ་མཚར་བྱེད་པ་ཡིན་ནམ། གསོལ་པ། བཅོམ་ལྡན་འདས་ངོ་མཚར་ལགས་སོ། །བདེ་བར་གཤེགས་པ་མཆོག་ཏུ་ངོ་མཚར་ལགས་སོ། །ཤཱ་རིའི་བུ་དེ་བས་ཀྱང་ཞེས་བྱ་བ་ནས། དེ་བཞིན་གཤེགས་པས་ཆོས་བསྟན་པ་གང་ཡིན་པ་འདི་ནི་ཆེས་ངོ་མཚར་ཡིན་ནོ་ཞེས་བྱ་བ་རྒྱས་པར་སྦྱར་རོ། །ཤཱ་རིའི་བུ་དཔེར་ན་བསྲེག་པའི་བསྐལ་པ་ཆེན་པོ་བྱུང་བ་ན། སྐྱེས་བུ་འགའ་ཞིག་གིས་མེའི་ཕུང་པོ་ཆེན་པོ་ཤིན་ཏུ་མཆེད་པ་དེ་མཆིལ་མའི་ཐལ་བ་གཅིག་གིས་ཞི་བར་བྱེད་ཅིང་།