འཛམ་བུ་ཆུ་བོའི་གསེར་གྱི་ཁ་དོག་ལྟར་དམར་བའི་མུ་ཏིག་གི་ཟེའུ་འབྲུ་དང་། ལྷ་རྫས་ཀྱི་མུ་ཏིག་གི་གེ་སར་གྱིས་ཁོར་ཡུག་ཏུ་བསྐོར་བ་གང་ཡིན་པ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བཞུགས་ཏེ། བྱང་ཆུབ་སེམས་དཔའ་དེ་རྣམས་ཐམས་ཅད་ཀྱང་ཆོས་ལ་གུས་པས་ཐམས་ཅད་པུས་མོ་བཙུགས་ཏེ། གཟུངས་འདིའི་དཀྱིལ་འཁོར་དང་ཕྱག་རྒྱ་མཐོང་བའི་དོན་དུ་མུ་ཏིག་གི་དོ་ཤལ་བརྒྱ་སྟོང་རིབ་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་མངོན་པར་བཀབ་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྡོ་རྗེའི་རང་བཞིན་དུ་བྱིན་གྱིས་བརླབས་པ་འདི་ཡང་ཆེས་ཆེར་གཡོས་པར་གྱུར་ཏོ། །ལྷའི་མེ་ཏོག་གི་ཆར་ཆེན་པོ་མང་པོ་རབ་ཏུ་ཕབ་སྟེ། དེ་བཞིན་གཤེགས་པ་ཐམས་ཅད་མཆོད་པའི་དོན་དང་། བྱང་ཆུབ་སེམས་དཔའ་ཐམས་ཅད་མཆོད་པའི་དོན་དང་། གཟུངས་འདིའི་དཀྱིལ་འཁོར་དམ་པ་ལ་མཆོད་པའི་དོན་དུ་ཆར་རབ་ཏུ་ཕབ་བོ། །དེ་ནས་ཡང་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེས་བཞིན་འཛུམ་ཞིང་རྡོ་རྗེ་བསྐོར་བཞིན་དུ་བཅོམ་ལྡན་འདས་གང་ན་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འཇིག་རྟེན་ལས་འདས་པའི་གཟུངས་ཀྱི་དཀྱིལ་འཁོར་གྱི་ཆོ་ག་འདི་ནི་ཤིན་ཏུ་རྙེད་པར་དཀའ་བ་སྟེ། འདི་ལྟ་བུའི་རྫུ་འཕྲུལ་གྱི་རྣམ་པར་འཕྲུལ་པ་དང་། ཆོ་འཕྲུལ་ནི་དེ་བཞིན་གཤེགས་པ་བསྐྱེད་པ་བལྟ་བར་བགྱི། ཆོས་ཀྱི་འཁོར་ལོ་བསྐོར་བར་བལྟ་བར་བགྱི། དེ་བཞིན་གཤེགས་པ་དང་མཉམ་པ་ཉིད་དུ་བལྟ་བར་བགྱིའོ། །བཅོམ་ལྡན་འདས་མཐུ་ཆེན་པོ་འདི་འཛམ་བུའི་གླིང་ན་མཆོག་ཏུ་དཀོན་པར་བལྟ་བར་བགྱི་སྟེ། འདི་ནི་ཕྱི་མའི་དུས་ཕྱི་མའི་ཚེ་ན། དེ་བཞིན་གཤེགས་པའི་མཛད་པ་དང་། སངས་རྒྱས་ཀྱི་མཛད་པ་བྱེད་པར་འགྱུར་རོ། །གང་གིས་ཐོས་པ་ཙམ་གྱིས་འདི་ལྟ་བུའི་ཡོན་ཏན་དང་ཕན་ཡོན་སོ་སོར་ཐོབ་བོ། །ཀུན་ཏུ་སྣང་བར་བྱེད་པར་འགྱུར་བ་འདི་ཉིད་ནི་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་མ་གཏོགས་པར་སེམས་ཅན་ཐམས་ཅད་ཀྱི་ནང་ན་གཞན་སུ་ཡང་མ་མཆིས་སོ།