།ཀུན་ཏུ་སྣང་བར་བྱེད་པར་འགྱུར་བ་འདི་ཉིད་ནི་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་མ་གཏོགས་པར་སེམས་ཅན་ཐམས་ཅད་ཀྱི་ནང་ན་གཞན་སུ་ཡང་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་ཇི་སྐད་སྨྲས་པ་དེ་དེ་བཞིན་ནོ། །ལག་ན་རྡོ་རྗེ་འཛམ་བུའི་གླིང་པའི་སེམས་ཅན་ཐམས་ཅད་མདང་ཕར་གྱུར་པ་འདི་གཟུངས་ཀྱི་དཀྱིལ་འཁོར་འདི་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་འདི་སེམས་ཅན་ཐམས་ཅད་ཀྱི་རེ་བ་སྐོང་བ་དང་། སྐྱོབ་པ་དང་། སྐྱབས་དང་། འཇིག་རྟེན་དང་འཇིག་རྟེན་ལས་འདས་པའི་དཔུང་གཉེན་བྱེད་པ་ནས། ཇི་སྲིད་བུད་མེད་དང་། སྐྱེས་པ་དང་། ཁྱེའུ་དང་། བུ་མོ་སེམས་ཅན་ཐམས་ཅད་སངས་རྒྱས་ཉིད་ཀྱི་བདག་ཉིད་ཀྱི་བར་ལ་རབ་ཏུ་འགོད་པར་བྱེད་དོ། །དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གི་སྟོབས་དང་། བརྩོན་འགྲུས་དང་། ཕ་རོལ་གནོན་པས་སྔོན་སེམས་ཅན་རྣམས་ལ་ཕན་པའི་དོན་དུ་ཞུགས་པ་ཡིན་ནོ། །དེ་ནས་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ། ཉི་མའི་འོད་ཟེར་གྱི་སྙིང་པོ་དྲི་མ་མེད་པ་ཞེས་བྱ་བའི་ནོར་བུ་རིན་པོ་ཆེ་ཆེན་པོ་ཐོགས་ནས། བྱང་ཆུབ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གང་ན་བ་དེར་དོང་སྟེ་ལྷགས་ནས། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གི་ཞབས་གཉིས་ལ་མགོ་བོས་ཕྱག་འཚལ་ནས། ནོར་བུ་རིན་པོ་ཆེ་ཆེན་པོ་དེ་ཡང་མངོན་པར་དགབ་པར་ཕུལ་ལོ། །ལྷ་རྫས་ཀྱི་མེ་ཏོག་སྣ་ཚོགས་པས་གཅལ་དུ་བཀྲམ་པ། མཆོད་པའི་དོན་དུ་རབ་ཏུ་བཀོད་ནས་རང་གི་སྟན་ལ་འདུག་གོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དོན་ཡོད་པ་དྲི་མ་མེད་ཅིང་རྣམ་པར་དག་པ་རབ་ཏུ་གསལ་བའི་འོད་ཟེར་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །བཅོམ་ལྡན་འདས་ཏིང་ངེ་འཛིན་ལ་སྙོམས་པར་ཞུགས་པ་གང་གིས་སྤྱི་བོའི་གཙུག་ཏུ་གདུགས་ཀྱི་རྣམ་པའི་ཁང་པ་བརྩེགས་པ་ཀུན་ཏུ་གནས་པར་གྱུར་ཏོ། །ཁང་པ་བརྩེགས་པ་དེ་ལས་ཀྱང་འོད་ཟེར་རྣམ་པ་སྣ་ཚོགས་པ་བྱུང་ངོ་།