འབྲས་བུའི་ཤིང་ལྗོན་པ་གང་ཡིན་པ་རྣམས་ཀྱང་རིན་པོ་ཆེ་སྣ་བདུན་གྱི་རང་བཞིན་གྱི་ཁང་པ་བརྩེགས་པར་རབ་ཏུ་གྱུར་ཏོ། །གང་གཱའི་ཀླུང་གི་བྱེ་མ་བྱེ་བ་ཁྲག་ཁྲིག་བརྒྱ་སྟོང་ཕྲག་རྣམས་འབུམ་ཕྲག་བྱེ་བ་དགུ་བཅུ་རྩ་དགུའི་རྡུལ་ཕྲ་རབ་དང་མཉམ་པར་རབ་ཏུ་གྱུར་ཏོ། །ལྷ་རྫས་ཀྱི་མེ་ཏོག་དང་འབྲས་བུ་རྣམ་པར་བཀྲ་བ་རྣམ་པ་སྣ་ཚོགས་པ་རྣམས་ཕམ་པར་བྱས་པའི་རྒྱན་རྣམ་པར་བཀྲ་བས་རྣམ་པར་བཀྲ་ཞིང་། དྲིལ་བུ་གཡེར་ཀའི་དྲ་བ་དང་། གསེར་གྱི་དྲིལ་བུ་འཁྲོལ་བའི་བླ་རེས་དཔྱངས་པ་རྣམས་དང་། ལྷ་རྫས་ཀྱི་སེང་གེའི་ཁྲི་ཡོངས་སུ་བཤམས་པ་རྣམས་ཀྱང་རེ་རེ་ཞིང་ཁང་པ་བརྩེགས་པའི་དབུས་ན། སེང་གེའི་ཁྲི་བཤམས་པ་བརྒྱ་སྟོང་ཕྲག་དགུ་བཅུ་རྩ་དགུར་རབ་ཏུ་བྱུང་བར་གྱུར་ཏེ། སེང་གེའི་ཁྲི་ཐམས་ཅད་ལ་ཕྱོགས་བཅུ་ནས་དེ་བཞིན་གཤེགས་པ་ཡང་དག་པར་བྱོན་ཏེ་བཞུགས་སོ། །དེ་བཞིན་གཤེགས་པ་ཐམས་ཅད་ཀྱང་ཕྱག་གསེར་གྱི་ཁ་དོག་ཅན་བརྐྱང་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གི་སྤྱི་བོའི་གཙུག་ཏུ་ཕྱག་འཇོག་པར་མཛད་ཅིང་། ལེགས་སོ་ཞེས་བྱ་བའི་སྒྲ་བརྗོད་པར་མཛད་དོ། །སྤྱན་རས་གཟིགས་དབང་ཕྱུག་ལེགས་སོ་ལེགས་སོ་མཆོག་ཏུ་ཁྱད་པར་དུ་འཕགས་པའི་འཇིག་རྟེན་ལས་འདས་པའི་ལམ་ཆེན་པོར་རབ་ཏུ་བསྟན་པས། སེམས་ཅན་ཐམས་ཅད་ཕ་རོལ་ཏུ་འགྲོ་བར་བྱེད་པ་དང་། གང་གིས་ཐོས་པ་ཙམ་གྱིས་འཇིག་རྟེན་ལས་འདས་པ་སོ་སོར་ཁྱད་པར་དུ་འཕགས་པའི་སངས་རྒྱས་ཉིད་ཀྱི་ལམ་ཚོལ་བ་ལ་རྗེས་སུ་འགྲོའོ། །འོན་ཀྱང་བཟླས་པ་དང་། འདྲི་བ་དང་། ཀློག་པ་དང་། དཀྱིལ་འཁོར་མཐོང་བ་དང་། འཇུག་པ་ཆེས་མང་པོའི་དབང་དུ་བྱས་པའི་སེམས་ཅན་རྣམས་དམ་ཚིག་ལ་རྗེས་སུ་འཇུག་པར་འགྱུར་བ་དེ། སྐྱེ་བ་འདི་ཉིད་ལ་དེ་བཞིན་གཤེགས་པའི་ལུས་སུ་རིག་པར་བྱའོ། །དེ་ནས་པོ་ཊ་ལའི་གནས་ཀྱི་རི་བོ་དང་། རྩྭ་དང་། ཤིང་གེལ་བ་དང་། སྨན་དང་། ནགས་དེ་རྣམས་ཐམས་ཅད་ལ་མི་གང་ཙམ་དུ་མཐོ་བ་ཉིད་དང་། ཤིང་རྟའི་འཁོར་ལོའི་ཚད་ཙམ་པའི་རིན་པོ་ཆེ་སྣ་བདུན་གྱི་རང་བཞིན་ཅན་གྱི་པདྨ་རྣམས་རབ་ཏུ་བྱུང་སྟེ། འདབ་མ་ཁ་དོག་སྣ་ཚོགས་པ་དང་། སྡོང་བུ་བཻ་ཌཱུརྱ་དང་། འཛམ་བུ་ཆུ་བོའི་གསེར་གྱི་ཁ་དོག་ལྟར་དམར་བའི་མུ་ཏིག་གི་ཟེའུ་འབྲུ་དང་།