དེ་ནས་མཆོད་པ་ཆེན་པོས་གཞལ་མེད་ཁང་ཆེན་པོ་མཆོད་དེ་བུམ་པ་བཟང་པོ་དེ་གཟུང་བར་བྱ་ཞིང་མཆོད་པ་བྱས་ན་ཡིད་ལ་ཇི་ལྟར་འཐད་པ་དང་འདོད་པ་ཐམས་ཅད་གྲུབ་པར་འགྱུར་ཏེ། ལེགས་པར་བཤད་པའམ་གཙུག་ལག་གམ། སྙན་དང་གས་དང་གར་གྱི་བསྟན་བཅོས་དང་རྩིས་ཆོས་དང་བྱཱ་ཀ་ར་ཎ་དང་ཆོ་ག་ཞིབ་མོ་སྨྲ་བ་དང་གསང་སྔགས་སྨྲ་བ་དང་། ནགས་སྒྲུབ་བ་དང་ཕུག་སྒྲུབ་པ་དང་བཅུད་ཀྱིས་ལེན་པ་དང་མིག་སྨན་དང་། གཏེར་སྨྲ་བ་དང་། རིག་བྱེད་ཀྱི་སྔགས་དང་མདོ་སྡེ་དང་། དབྱངས་ཀྱིས་བསྙད་པའི་སྡེ་ལ་སོགས་པ་ཆོས་དང་འདུལ་བ་སྨྲ་བ་དེ་དག་ཐམས་ཅད་འབྱུང་བར་འགྱུར་རོ། །འདི་ལྟ་སྟེ་ཟས་དང་། སྐོམ་དང་། གོས་དང་། རྒྱན་དང་། སྤུད་པ་དང་། གསེར་དང་། དངུལ་དང་། ས་ལེ་སྦྲ་མ་དང་། མུ་ཏིག་དང་། ཨིནྡྲ་ནཱི་ལ་དང་། མ་རྒད་དང་། ཀེ་ཀེ་རུ་དང་། ཤེལ་དང་། མུས་ར་དང་། བཻ་ཌཱུརྱ་དང་། མཐོན་ཀ་དང་། མཐོན་ཀ་ཆེན་པོ་དང་། མེ་ཏོག་དང་། འབྲས་བུ་དང་། གོས་དང་། མ་ལ་ཆ་དང་། གནས་དང་། ཁང་པ་དང་། ལོངས་སྤྱོད་དང་། རྩེད་མོ་རྒྱ་ཆེན་པོ་དང་རྒྱལ་པོ་ལ་འོས་པའི་ལྷའི་གཞལ་མེད་ཁང་ཆེན་པོ་རྣམས་སེམས་ཀྱིས་བསམས་པ་ཙམ་གྱི་མོད་ལ་འབྱུང་བར་འགྱུར་རོ། །མིག་འཕྲུལ་གྱི་གཞལ་མེད་ཁང་དང་སངས་རྒྱས་ཀྱི་སྤྲུལ་བ་དང་། བྱང་ཆུབ་སེམས་དཔའི་སྤྲུལ་པ་དང་། རྡོ་རྗེ་འཆང་གི་སྤྲུལ་པ་དང་ལྷ་དང་། ཀླུ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། དྲི་ཟ་དང་། ལྟོ་འཕྱེ་ཆེན་པོའི་གཞལ་མེད་ཁང་དང་། གནོད་སྦྱིན་དང་། སྲིན་པོ་དང་། འབྱུང་པོའི་བདག་པོའི་གཞལ་མེད་ཁང་དེ་ཐམས་ཅད་བསམས་པ་ཙམ་གྱིས་འབྱུང་བར་འགྱུར་རོ། །ཆར་ཧ་ཅང་ཆེ་བ་དང་ཆར་མི་འབབ་པ་དང་། དུས་མ་ཡིན་པའི་ཆར་དང་། གྲང་བ་དང་། རླུང་དང་། སྤྲིན་དང་། སེར་བ་དང་ཆུ་ཟློག་པར་བྱེད་པ་དེ་ཐམས་ཅད་སྟོན་པར་བྱེད་པ་སྡེ་སྟོན་པར་བྱེད་པ་གཡུལ་འགྱེད་པ་སྟོན་པར་བྱེད་པའམ། གནས་དང་གཞལ་མེད་ཁང་དང་། དཔལ་སྟོན་པར་བྱེད་པ་དེ་ཐམས་ཅད་སྟོན་པར་བྱེད། དེ་ལ་སོགས་པ་ཐམས་ཅད་བསམས་པ་ཙམ་དང་། སྨོན་པ་ཙམ་གྱིས་འགྲུབ་པར་འགྱུར་རོ།