སྨོན་པ་ཙམ་གྱིས་འགྲུབ་པར་འགྱུར་རོ། །ནོར་བུ་དང་། འབྲུ་དང་། འབྲས་བུ་དང་། མེ་ཏོག་དང་། གཞལ་མེད་ཁང་འབྱུང་བར་འགྱུར་རོ། །ཇི་ལྟར་བསམས་པ་དེ་ཐམས་ཅད་འབྱོར་བར་འགྱུར་རོ། །གླ་རྩི་དེ་བླངས་ལ་གི་ཝང་དང་ག་པུར་དང་བསྲེས་ཏེ་ཤིང་ཨརྐའི་འོ་མས་སྦྲུས་ཏེ། རིལ་བུ་བྱས་ནས་བ་སེར་མོའི་འོ་མ་ལ་བདར་ཏེ་དཔྲལ་བར་ཐིག་ལེ་བྱས་ན་ནམ་མཁའ་ལ་འགྲོ་བར་འགྱུར། རིག་སྔགས་འཆང་བྱེ་བ་སྟོང་ཕྲག་བཅུའི་འཁོར་དང་ལྡན་པར་འགྱུར། སྙིང་གར་ཐིག་ལེ་བྱས་ན་མི་སྣང་བར་འགྱུར་ཞིང་གནོད་སྦྱིན་དང་། སྲིན་པོ་དང་། འབྱུང་པོ་ཐམས་ཅད་ཀྱི་རྗེ་དཔོན་དུ་འགྱུར་རོ། །ལྕེའི་རྩེ་མོ་ལ་རེག་ན་ཉིན་རེ་ཞིང་ཚིགས་སུ་བཅད་པ་སྟོང་བཀླགས་ཤིང་འཛིན་པར་འགྱུར། མིད་ན་ལོ་སྟོང་ཕྲག་བཅུར་འཚོ་བར་འགྱུར། འོ་མ་དང་ལྷན་ཅིག་འཐུངས་ན་ཐོས་པ་མང་པོ་རྒྱ་མཚོ་བསགས་པར་འགྱུར། ཤིང་ཨརྐའི་ལོ་མ་དང་ལྷན་ཅིག་ཟོས་ན་རིག་སྔགས་འཆང་ཐམས་ཅད་ཀྱི་འཁོར་ལོས་སྒྱུར་བར་འགྱུར། ཆོ་ག་ཞིབ་མོ་དང་། གསང་སྔགས་དང་དཀྱིལ་འཁོར་དང་། ཕྱག་རྒྱ་ཐམས་ཅད་མངོན་དུ་འགྱུར། ལྟེ་བའི་གནས་སུ་ཐིག་ལེ་བྱས་ཏེ་ཆུ་ཀླུང་ཆེན་པོའི་ནང་དུ་ཞུགས་ན་གཏིང་དུ་འབྱིང་བར་མི་འགྱུར་ཞིང་ཕ་རོལ་ཏུ་ཕྱིན་པར་འགྱུར། རྒྱ་མཚོའི་ཕ་རོལ་ཏུ་ཡང་ཕྱིན་པར་འགྱུར། སྤྱི་བོར་ཐིག་ལེ་བྱས་ཏེ་གཡུལ་ངོར་ཞུགས་ན་དཔུང་གི་ཚོགས་ཡན་ལག་བཞི་ལས་རྒྱལ་བར་འགྱུར། ཞུན་མར་དང་ལྷན་ཅིག་ཟོས་ན་གླང་པོ་ཆེན་པོ་སྟོང་གི་སྟོབས་དང་ལྡན་པར་འགྱུར་ཞིང་། ལག་པ་ཡ་གཅིག་གིས་གླང་པོ་ཆེ་བསྐྱོད་པ་དང་ནམ་མཁའ་ལ་འཕེན་ཅིང་སླར་ཡང་འཛིན་ཏོ། །རིལ་བུ་འདིས་ལག་པ་ལ་བསྐུས་ན་མི་སྟོང་ཐུབ་པར་འགྱུར་རོ། །རིལ་བུ་འདི་ལྷའི་གནས་སུ་བརྐོས་ཏེ་གཞག་ན་ལྷ་ཐམས་ཅད་དབང་དུ་འགྱུར་ཏེ། དུས་དུས་སུ་ཆར་འབེབས་ཤིང་སད་དང་རླུང་དང་སྤྲིན་དང་། སེར་བ་གཅོད་པར་བྱེད་དོ། །རྒྱལ་པོའི་སྒོར་བརྐོས་ཏེ་བཞག་ན་རྒྱལ་པོའི་བཙུན་མོ་འཁོར་དང་བཅས་པ་དང་བཀའ་ལ་གཏོགས་པ་དང་ཞང་བློན་དང་བྲམ་ཟེ་མདུན་ན་འདོན་དང་བཅས་པ་དབང་དུ་འགྱུར་རོ། །གཙུག་ལག་ཁང་གི་སྒོར་བརྐོས་ཏེ་བཞག་ན་དགེ་སློང་ཐམས་ཅད་བདེ་བའི་རེག་པ་ལ་གནས་པས་གནས་པར་འགྱུར།