བ་ལང་གི་ལྕི་བ་དང་སར་བསྲེས་པས་ལེགས་པར་བྱུགས་ཏེ་ཆ་མཉམ་པར་བྱའོ། །དེ་ནས་དཀྱིལ་འཁོར་གྱི་སྟེང་དུ་དྲི་ཐམས་ཅད་ཀྱིས་བྱུགས་ལ་དཀྱིལ་འཁོར་གྱི་སྙིང་པོ་དབུས་སུ་ཙནྡན་དཀར་པོས་དཀྱིལ་འཁོར་ཁྲུ་གང་གྲུ་བཞི་པ་བྱས་ལ། གུར་གུམ་དང་མེ་ཏོག་པདྨས་མཆོད་པ་བྱས་ཏེ། པདྨ་འདབ་མ་སུམ་ཅུ་རྩ་གཉིས་པ་བྲི་ལ་པདྨའི་ཟེ་བའི་སྟེང་དུ་བུམ་པ་གཞག་སྟེ། འཕན་གདུགས་སྣ་ཚོགས་ཀྱིས་བརྒྱན་པར་བྱ། དཀྱིལ་འཁོར་གྱི་སྙིང་པོ་ཁོར་ཡུག་ཏུ་སྤོས་དང་མེ་ཏོག་སྣ་ཚོགས་དང་བྱུག་སྤོས་སྣ་ཚོགས་དང་། མཆོད་ཡོན་གྱི་སྣོད་སྣ་ཚོགས་དང་བུམ་པ་གང་བར་མཛེས་པ་དང་བདུག་སྤོས་ཀྱི་ཕྱེ་མ་རྣམ་པ་མང་པོ་གཞག་པར་བྱ། མེ་ཏོག་རྣམ་པ་སྣ་ཚོགས་དང་མེ་ཏོག་ཕྲེང་ཅི་འབྱོར་པ་ཀུན་ཏུ་གཞག་པར་བྱ། མར་གྱི་མར་མེ་བཟང་པོ་བཅུ་དྲུག་བལྟམ་པར་བྱ། ཕྱི་རོལ་གྱི་དཀྱིལ་འཁོར་ཀུན་ནས་པདྨའི་ཕྲེང་བ་བྲི་བར་བྱ། སྒོ་བཞི་ཤིན་ཏུ་མཛེས་པ་བྲི་བར་བྱ། འཇིག་རྟེན་དབང་ཕྱུག་གི་མཚན་མ་གསལ་བར་བྱ། མདའ་དང་བ་དན་ཁོར་ཡུག་ཏུ་གཞག་པར་བྱ། ཚོན་སྐུད་སྣ་ལྔས་བསྐོར་བར་བྱ། རོ་རྣམ་པ་སྣ་ཚོགས་དང་དཀར་གསུམ་ཅི་འབྱོར་པ་གཞག་པར་བྱ། འབྲས་བུ་སྣ་ཚོགས་དང་བཟའ་བ་རྣམ་པ་སྣ་ཚོགས་གཞག་པར་བྱ། མེ་ཏོག་སྣ་ཚོགས་གཞག་པར་བྱ། མེ་ཏོག་སྣ་ཚོགས་དགྲམ་པར་བྱ། མེ་ཏོག་ཕྲེང་བཟང་པོ་ཀུན་ཏུ་གཞག་པར་བྱ། བདུག་སྤོས་ཀྱི་སྣོད་དང་བུམ་པ་གང་བ་ཀུན་ཏུ་གཞག་པར་བྱ། པོག་ཕོར་བཞི་གཞག་པར་བྱ། དྲི་ཆབ་ཀྱི་ཕོར་པ་བཞི་གཞག་པར་བྱ། སྣོད་བཞི་དང་ཁམ་ཕོར་བརྒྱད་གཞག་པར་བྱ། རོ་སྣ་ཚོགས་ཀྱི་གཏོར་མ་དཀར་པོ་རྣམ་པ་མང་པོ་གཞག་པར་བྱ། མར་གྱི་མར་མེ་གང་བ་དྲུག་ཅུ་རྩ་གཉིས་དབུལ་བར་བྱ། འབྲས་ཡོས་དང་ཡུངས་ཀར་དགྲམ་པར་བྱའོ། །ཆང་དང་ཤ་དང་བེག་བཙོང་དང་ཀེའུ་དང་འབགས་པ་དང་ཁ་ཟས་ངན་པ་དང་བཏུང་བ་ངན་པ་སྤང་བར་བྱ། བགོ་མ་ཉེས་སྤང་བར་བྱ་སྟེ། གཙང་མས་གོས་གཙང་མ་བགོས་ལ་ཟླ་བ་ཉ་བ་ལ་བསྒྲུབ་པར་བྱའོ། །སྲུང་བའི་ཆོ་གས་བདག་བསྲུང་བ་དང་ཐོར་ཚུགས་བཅིང་བ་དང་། ཕྱོགས་བཅིང་བ་དང་། ཡུལ་བཅིང་བ་དང་། དེ་བཞིན་དུ་གྲོགས་བསྲུང་བ་དང་གཞན་བསྲུང་བ་ཡང་བྱའོ།