དོན་ཡོད་པའི་ཞགས་པའི་སྙིང་པོ་ཡིད་བཞིན་གྱི་ནོར་བུའི་གཟུངས་ཀྱི་མཐུ་བསྟན་པ་ཇི་ལྟ་བ་དེར་དེ་ལྟར་བཅོམ་ལྡན་འདས་བུམ་པ་ཆེན་པོའི་མཐུ་སྒྲུབ་པའི་ཆོ་ག་འདི་རྣམ་པར་འཕྲུལ་བ་བསམ་གྱིས་མི་ཁྱབ་བསྒྲུབ་པ་འགྲུབ་པར་འགྱུར་ལགས་སོ། །རིག་སྔགས་འཆང་རྣམས་ལ་ཕན་པ་དང་བདེ་བའི་ཕྱིར་དེ་ཁོ་ན་ཉིད་ཡང་དག་པར་སྒྲུབ་པར་འགྱུར་བ་ལགས་སོ། །དེ་ནས་གསེར་རམ་དངུལ་ལམ་ཟངས་སམ་ཁམ་པའི་བུམ་པ་ཚད་དང་ལྡན་པ་ཀུན་ནས་ཤིན་ཏུ་ཟླུམ་པ་མགོ་འམ་མགྲིན་པར་ཕྱིན་པའི་ཚད་འཇམ་ཞིང་ཐག་ཐུག་དང་ཤང་ཤོང་མེད་པ། དབྱིབས་ལེགས་ཤིང་བྱི་དོར་ལེགས་པར་བྱས་པ། ཀུན་ནས་ཡོངས་སུ་གང་བ་ལ་མཚལ་གྱི་ཚོན་གྱིས་པདྨ་འདབ་མ་བརྒྱ་རྩ་བརྒྱད་པ་བྲི་བར་བྱ་སྟེ། མགྲིན་པར་པདྨའི་སྙིང་པོ་དང་ཟེ་བ་བྲི། འཕགས་པ་སྤྱན་རས་གཟིགས་དབང་ཕྱུག་བྲི་བར་བྱ་སྟེ། ཤར་ཕྱོགས་སུ་ཞལ་བྲི། ལྷོ་རུ་མི་འཇིགས་པ་སྦྱིན་པའི་ཕྱག །ནུབ་ཏུ་དབྱིག་འབྱིན་གྱི་ཕྱག །བྱང་དུ་ཡིད་བཞིན་ནོར་བུ་རྒྱན་ཐམས་ཅད་ཀྱིས་བརྒྱན་པ་སྐྱིལ་མོ་ཀྲུང་དུ་བཞུགས་པར་བྱའོ། །པདྨའི་འདབ་མ་དབང་ཕྱུག་དང་དབང་ཕྱུག་ཆེན་པོ་དང་། བྲམ་ཟེ་དང་དྲང་སྲོང་གི་ཚོགས་དང་། གཤིན་རྗེ་དང་། ཆུ་ལྷ་དང་། རླུང་ལྷ་དང་། ཁྱབ་བདག་དང་། བརྒྱ་བྱིན་དང་། རྡོ་རྗེ་འཆང་དང་། ལྷའི་ཚོགས་གཞན་དག་བྲི་བར་བྱ་ཞིང་མེ་དང་། རླུང་དང་། ཉི་མ་དང་། ཟླ་བ་དང་། ལྷ་མོ་སྒྲོལ་མ་དང་། ཁྲོ་གཉེར་ཅན་དང་། ཕོ་ཉ་མོ་དཀར་མོ་དང་། ཚོགས་ཀྱི་བདག་པོ་དང་། གཞོན་ནུ་དང་། རྒྱལ་པོ་ཆེན་པོ་བཞི་དང་། དྲག་པོ་དང་། ཁྱབ་འཇུག་བྲི་བར་བྱའོ། །པདྨའི་འདབ་མའི་ཁོར་ཡུག་ཏུ་པདྨའི་ཕྲེང་བ་བྲིའོ། །དེ་ནས་བུམ་པ་ཚོན་སྣ་ཚོགས་ཀྱིས་བྲི་བར་བྱ་ཞིང་གསེར་གྱི་རྒྱན་གྱིས་བརྒྱན་པར་བྱ། རིམ་པའི་ཆ་བཀྲ་ཞིང་མཛེས་པར་བྱའོ། །དེ་ནས་ཐང་ཤིང་ལས་པདྨའི་གདན་ཟླུམ་པོ་བུམ་པ་ཤོང་བ་ཙམ་གྱི་ཚད་དུ་བྱེད་ལ་དེའི་སྟེང་དུ་བུམ་པ་བཞག་ལ་བུམ་པ་དེ་ཡུངས་ཀར་དཀར་པོས་བཀང་སྟེ། རྒྱན་ཐམས་ཅད་ཀྱིས་བརྒྱན་པར་བྱ། རས་དཀར་པོས་བཅིང་བར་བྱ། སྟེང་དུ་ཡུངས་ཀར་དང་གླ་རྩི་དང་ག་བུར་དང་གི་ཝང་དང་ལྡོང་རོས་གཞག་པར་བྱ། བུམ་པའི་ཁ་རས་དམར་པོས་གཡོགས་པར་བྱ། རིན་པོ་ཆེ་སྣ་བདུན་གཞག་པར་བྱ། དེ་ནས་རིག་སྔགས་འཆང་གཙང་མས་གོས་གཙང་མ་བགོས་ལ་དཀྱིལ་འཁོར་ཁྲུ་བཞི་གྲུ་བཞི་པ་འཕང་དུ་ཁྲུ་གང་བ་བྱས་ཏེ། བ་ལང་གི་ལྕི་བ་དང་སར་བསྲེས་པས་ལེགས་པར་བྱུགས་ཏེ་ཆ་མཉམ་པར་བྱའོ།