མི་སྨྲ་བར་ཡུངས་ཀར་འབྲུ་རེ་རེ་ནས་བཟླས་བརྗོད་སྟོང་རྩ་བརྒྱད་བརྗོད་ནས་རས་ཀྱི་སྲད་བུའི་སྟེང་དུ་གཏོར་བར་བྱ་སྟེ། སྟོང་རྩ་བརྒྱད་ཚང་བ་དང་རས་ཀྱི་སྲད་བུ་དེ་འབར་བར་འགྱུར་ཞིང་། འོད་ཟེར་སྣ་ཚོགས་འབྱུང་བར་འགྱུར་རོ། །ལེགས་སོ་ཞེས་བྱ་བའི་སྒྲ་འབྱུང་བར་འགྱུར་ཏེ། རིག་སྔགས་འཆང་ལེགས་སོ་ལེགས་སོ། །ཁྱོད་ཀྱིས་དོན་ཡོད་པའི་ཞགས་པ་གྲུབ་ཀྱིས་ལོང་ལ་དགོས་པ་ཐམས་ཅད་བྱོས་ཤིག །ཁྱོད་ཀྱི་ཡིད་བཞིན་གྱི་ནོར་བུ་ཆེན་པོ་གཉིས་དོན་ཡོད་པའི་ཞགས་པ་པདྨ་གྲུབ་པས། འཇིག་རྟེན་པ་དང་འཇིག་རྟེན་ལས་འདས་པའི་དགོས་པ་ཐམས་ཅད་སྒྲུབ་པར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་དེ་ཡང་འབར་བར་འགྱུར་རོ། །འཇིག་རྟེན་དབང་ཕྱུག་གི་སྐུ་ལས་སྤོས་ཀྱི་སྤྲིན་ཆེན་པོ་འབྱུང་བར་འགྱུར་ཏེ། སྤོས་དེས་དཔག་ཚད་དྲུག་ཙམ་དུ་ཁྱབ་པར་བྱེད་དོ། །གང་ལ་དྲི་མནམས་པ་ཙམ་གྱིས་ནད་ཐམས་ཅད་དང་བྲལ་བར་འགྱུར། སྡིག་པ་ཐམས་ཅད་དང་བྲལ་བར་འགྱུར། སྡུག་བསྔལ་གྱི་སྒྲིབ་པ་ཐམས་ཅད་དང་། བྱད་དང་། དུག་དང་། དབྱིག་དུག་དང་། ཕྱེ་མའི་སྦྱོར་བ་རྣམས་འཇིག་པར་འགྱུར་རོ། །ལུས་ཐམས་ཅད་དྲི་མ་མེད་པར་འགྱུར་རོ། །སེམས་ཅན་ཐམས་ཅད་ཀྱང་རྗེས་སུ་འབྲང་བར་འགྱུར་རོ། །དེ་ནས་རིག་སྔགས་འཆང་གིས་ཡིད་བཞིན་གྱི་ནོར་བུའི་ཞགས་པ་དེ་བླངས་ལ་ཟངས་ཀྱི་གབ་ཚེ་བཟང་པོའི་ནང་དུ་བཅུག་སྟེ། འཕགས་པ་སྤྱན་རས་གཟིགས་དབང་ཕྱུག་གི་ཞབས་དྲུང་དུ་གཞག་པར་བྱའོ། །ནམ་དགོས་པ་བྱུང་བའི་ཚེ། གཙང་མས་ཁྲུས་ལེགས་པར་བྱས་ཏེ། བླང་བར་བྱ་ཞིང་དགོས་པར་བྱའོ། །ཉིན་རེ་བཞིན་དུས་གསུམ་དུ་མཆོད་པར་བྱའོ། །རིག་སྔགས་འཆང་དེ་ཡང་ནམ་མཁའ་ལ་འགྲོ་བར་འགྱུར་ཞིང་ལུས་ཡོངས་སུ་དག་པ་དང་། སྔོན་གྱི་རིག་སྔགས་འཆང་རྣམས་དང་ལྷན་ཅིག་རྩེ་ཞིང་ཐམས་ཅད་དབང་དུ་འགྱུར་རོ། །ཚེ་ལོ་སྟོང་ཐུབ་པར་འགྱུར་ཏེ། ཤི་ནས་བདེ་བ་ཅན་གྱི་འཇིག་རྟེན་གྱི་ཁམས་སུ་སྐལ་བ་མཉམ་པ་རྣམས་ཀྱི་ནང་དུ་པདྨའི་སྙིང་པོ་ལས་རྫུས་ཏེ་སྐྱེ་བར་འགྱུར་རོ། །རིག་སྔགས་འཆང་ཐམས་ཅད་ཀྱི་འཁོར་ལོས་སྒྱུར་བར་འགྱུར་རོ། །བྱང་ཆུབ་ཀྱི་སྙིང་པོའི་མཐར་ཐུག་གི་བར་དུ་ཚེ་བསྐལ་པ་བརྒྱ་ཕྲག་སྟོང་ཐུབ་པར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་དེ་ཡང་གང་གིས་མཐོང་བ་ཙམ་གྱིས་མཚམས་མེད་པ་ལྔ་ལ་སོགས་པ་ཟད་པར་འགྱུར་རོ།