གཡོན་དུ་དྲི་མེད་འགྲོ་བྱའོ། །འཇིག་རྟེན་དབང་ཕྱུག་གི་འོག་ཏུ་ནི་ཁྲོ་བོའི་རྒྱལ་པོའོ། །གོང་དུ་ནི་འོད་དཔག་མེད་དོ། །དེ་ནས་རིག་སྔགས་འཆང་གཙང་མས་གོས་གཙང་མ་བགོས་ཏེ། དུས་གསུམ་དུ་ཁྲུས་བྱ་ཞིང་གོས་སུམ་ཕྲུགས་སུ་བགོས་ལ་ཚེས་བརྒྱད་ནས་ཚེས་བཅྭ་ལྔའི་བར་དུ་དུས་གསུམ་དུ་བཟླས་བརྗོད་བརྒྱ་རྩ་བརྒྱད་བྱའོ། །སྤོས་སྣ་ཚོགས་ཀྱིས་དཀྱིལ་འཁོར་བྱུག་པར་བྱ་ཞིང་། ཚོན་སྣ་ལྔས་བྲི་བར་བྱ་སྟེ། དཀྱིལ་འཁོར་གྱི་དབུས་སུ་དོན་ཡོད་པའི་ཞགས་པ་དང་། རིག་སྔགས་ཀྱི་ལྷ་པུས་མོ་བཙུགས་ཏེ་གྱེན་དུ་བལྟ་བ་བྲི་བར་བྱའོ། །གྲྭ་བཞིར་དབང་ཕྱུག་དང་། དབང་ཕྱུག་ཆེན་པོ་དང་། གཤིན་རྗེ་དང་། ཆུ་ལྷ་བྲི་བར་བྱའོ། །སྒོ་བཞིའི་ཆ་འབྱེས་པར་བྱའོ། །དཀྱིལ་འཁོར་ཁོར་ཡུག་ཏུ་པདྨ་བྲི་བར་བྱའོ། །གྲྭ་བཞིར་སྤོས་ཀྱིས་བཀང་བ་གཞག་པར་བྱའོ། །སྒོ་བཞིར་དྲི་དང་གཏོར་མ་དང་བུམ་པ་བཀང་བ་གཞག་གོ། །དཀར་གསུམ་གྱི་གཏོར་མ་དང་མཆོད་ཡོན་གྱི་སྣོད་བརྒྱད་གཞག་གོ། །མེ་ཏོག་སྣ་ཚོགས་པ་བཀྲམ་པར་བྱ་ཞིང་། ཨ་ཀ་རུ་དང་། ཙནྡན་གྱི་བདུག་པ་དབུལ་བར་བྱའོ། །སྤོས་སྣ་བརྒྱ་ཉི་ཤུ་རྩ་བརྒྱད་དང་ལྡན་པའི་ཏིལ་མར་གྱི་མར་མེ་བལྟམ་པར་བྱ། འཕན་གདུགས་བཟང་པོ་སྣ་ཚོགས་པས་ལེགས་པར་བརྒྱན་པར་བྱ་སྟེ། བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་དཀྱིལ་འཁོར་དུ་ཞལ་ཤར་ཕྱོགས་སུ་བསྟན་ལ་མཆོད་པར་བྱའོ། །རས་ཀྱི་ཚོན་སྐུད་སྣ་ལྔ་པ། སྲིད་དུ་ཁྲུ་བཅུ་དྲུག་པ་ཐོར་ཏོ་གཅིག་ཏུ་གསེར་གྱི་ཡང་མིག་ཐོར་ཏོ་གཅིག་ཏུ་མུ་ཏིག་གི་ཆུན་ཀོར་བཏགས་ཏེ། སྦྲུལ་འཁྱིལ་པ་བཞིན་དུ་བསྐྱིལ་ལ་དཀྱིལ་འཁོར་གྱི་དབུས་སུ་བཞག་སྟེ། གཙང་མས་གོས་གཙང་མས་གཡོགས་པར་བྱའོ། །རིག་སྔགས་འཆང་དཀྱིལ་འཁོར་ལ་མངོན་དུ་ཕྱོགས་ཏེ། སྐྱིལ་མོ་ཀྲུང་དུ་འདུག་ལ། དོན་ཡོད་པའི་ཞགས་པའི་ཕྱག་རྒྱ་ལན་སུམ་ཅུ་རྩ་གཉིས་བཅིང་བ་བྱས་ལ་བདག་བསྲུང་ངོ་། །ཁྲོ་བོའི་རྒྱལ་པོ་ལན་བརྒྱ་རྩ་བརྒྱད་བཟླས་པར་བྱས་ལ། དཀྱིལ་འཁོར་བཅིང་བ་དང་། ཕྱོགས་བཅིང་བ་ཡང་བྱའོ། །དེ་ནས་རིག་སྔགས་འཆང་གིས་བཞིན་འཛུམ་གྱིས་བརྒྱན་པར་བྱས་ལ། བཟླས་བརྗོད་ཀྱི་ཕྱག་རྒྱ་བཅིངས་ཏེ། མི་སྨྲ་བར་ཡུངས་ཀར་འབྲུ་རེ་རེ་ནས་བཟླས་བརྗོད་སྟོང་རྩ་བརྒྱད་བརྗོད་ནས་རས་ཀྱི་སྲད་བུའི་སྟེང་དུ་གཏོར་བར་བྱ་སྟེ།