།འཕགས་པ་སྤྱན་རས་གཟིགས་དབང་ཕྱུག་དེ་ཡང་གང་གིས་མཐོང་བ་ཙམ་གྱིས་མཚམས་མེད་པ་ལྔ་ལ་སོགས་པ་ཟད་པར་འགྱུར་རོ། །སྣ་མའི་མེ་ཏོག་ལ་ལན་བརྒྱ་རྩ་བརྒྱད་བཟླས་ལ། འཕགས་པ་སྤྱན་རས་གཟིགས་དབང་ཕྱུག་ལ་རེ་རེ་ནས་དབུལ་བར་བྱ་སྟེ། ལན་བརྒྱ་རྩ་བརྒྱད་ཚང་བ་དང་། རྒྱལ་པོ་དང་། བློན་པོ་དང་། བཙུན་མོའི་འཁོར་དང་བཅས་པ་དབང་དུ་འགྱུར་ཏེ། རང་ཉིད་ནོར་དང་བཅས། དབྱིག་དང་བཅས། འབྲུ་དང་བཅས། བྲན་ཕོ་དང་བཅས། བྲན་མོ་དང་བཅས་ཏེ་ལས་བྱེད་པར་འགྱུར་རོ། །སྣ་མའི་མེ་ཏོག་རྙིང་པ་དེ་བསྡུས་ལ་གླ་རྩི་དང་། པྲི་ཡང་ཀུ་དང་། རྒྱ་སྤོས་དང་། རུ་རྟ་དང་། གུར་གུམ་དང་། སྤང་སྤོས་དང་། སྭ་མ་ཀ་དང་། སྤྲྀ་ཀ་དང་། ན་ལ་ད་དང་། བོ་ལ་དང་། ཡུངས་ཀར་རྣམས་ཞིབ་ཏུ་བཏགས་པའི་ཕྱེ་མ་ཆར་པའི་ཆུ་དང་སྦྱར་བའི་རིལ་བུ་ནི་དུག་མེད་པར་བྱེད་པའི་མཆོག །པདྨ་ཞེས་བྱ་སྟེ། ཐོག་མར་གྲགས་པ་དང་དཔལ་དུ་བྱེད་ནད་ཐམས་ཅད་སེལ་བ་དང་རིམས་ནད་ཐམས་ཅད་ཉེ་བར་སེལ་བར་བྱེད་དོ། །བཙོག་ཤུ་དང་། འབྲས་དང་། མེ་དབལ་དང་། རྐང་ཤུ་དང་། ཕོལ་མིག་དང་། ལྷོག་པ་དང་། དེ་ཐམས་ཅད་ལ་ནི་བསྐུས་ན་བདེ་བར་ཞི་བར་འགྱུར་རོ། །ཞེས་གསུང་ངོ་། །ནད་དེ་དག་ཐམས་ཅད་ལ་ཁྲུས་བྱས་ན་སྡིག་པ་སེལ་ཏོ་ཞེས་ཐུབ་པས་གསུངས་སོ། །ཚེ་སྦྱིན་པར་བྱེད། རྒྱལ་པོ་དག་ཡུལ་སྦྱིན་པར་བྱེད་དོ། །ཐིག་ལེ་བྱས་ཏེ་གཡུལ་ངོར་སོང་ན་ཐམས་ཅད་ལས་རྟག་ཏུ་རྒྱལ་བ་དང་། བུད་མེད་རྣམས་དགའ་བ་དང་། དབང་དུ་འགྱུར་བར་བྱེད་པའི་མཆོག་ཡིན་ནོ། །བྱད་འཇོམས་ཤིང་དུག་དང་། དབྱིག་དུག་དང་། ཕྱེ་མའི་དུག་དང་། གསང་སྔགས་ཀྱི་སྦྱོར་བ་དག་ཀྱང་དེ་བཞིན་ནོ། །ཟས་ཟ་བ་དང་ཁྲུས་བྱེད་པ་ན་ཐིག་ལེའི་བྱུག་པ་རྟག་ཏུ་བྱས་ན། དེ་ཐམས་ཅད་ལས་འགྲོ་བ་རྣམས་བདེ་བར་ཐར་བར་འགྱུར་རོ་ཞེས་འཇིག་རྟེན་དབང་ཕྱུག་གསུང་ངོ་། །ཀླད་པའི་ནད་མི་བཟད་པ་ལ་ནི་བྱུག་པར་བྱའོ། །མིག་ན་བ་ལ་ནི་མིག་སྨན་གྱི་ཐུར་མས་སོ། །སོ་ན་བ་ལ་ནི་ཁར་མུར་རོ། །ལྟོ་ན་བ་ལ་ནི་ཆུ་དྲོན་དང་ངོ་། །རྩིབ་ལོགས་ན་བ་ལ་ནི་མར་དང་བྱུག་གོ། །ཡན་ལག་དང་ཉིང་ལག་ན་བ་ལ་ནི་བསྐུ་བར་བྱའོ། །དབང་དུ་བྱ་བ་ནི་ལག་མཐིལ་ལ་བསྐུ་བས་སོ། །ནད་ཚབས་ཆེ་བ་ལ་ནི་སྐུ་མཉེ་དང་ཁྲུས་བྱའོ། །གནོད་སྦྱིན་གྱི་གདོན་བསལ་བ་ལ་ནི་སྣ་ནས་བཏང་བའི་ལས་བྱའོ། །བདུག་པས་ནི་གདོན་ཐམས་ཅད་ལས་རྣམ་པར་གྲོལ་བར་འགྱུར་རོ།