སངས་རྒྱས་བཅོམ་ལྡན་འདས་དེ་དག་གིས་ང་ལ་ཁྱོད་མ་འོངས་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་རོ་ཞེས་ལུང་མ་བསྟན་ཏོ། །དེ་ཅིའི་ཕྱིར་ཞེ་ན། འདི་ལྟར་ང་དམིགས་པའི་འདུ་ཤེས་ཅན་དུ་གྱུར་ཅིང་བདག་ཏུ་སྨྲ་བ་ལ་མངོན་པར་ཞེན་པའི་ཕྱིར་རོ། །ཤཱ་རིའི་བུ་གཞན་ཡང་ངས་མངོན་པར་དྲན་ཏེ། བླ་ན་མེད་པའི་བྱང་ཆུབ་འདི་ཉིད་ལས་བརྩམས་ཏེ། སངས་རྒྱས་རབ་ཏུ་འབར་བ་ཞེས་བྱ་བ་ཤ་སྟག་དྲུག་སྟོང་པོ་དེ་དག་ལ་ཡང་ང་འཁོར་ལོས་སྒྱུར་བའི་རྒྱལ་པོར་གྱུར་པ་ན་ཞེས་བྱ་བ་ནས་བཀུར་སྟི་བྱས་སོ་ཞེས་བྱ་བའི་བར་གོང་མ་བཞིན་དུ་ཐམས་ཅད་བརྗོད་པར་བྱའོ། །ཤཱ་རིའི་བུ་གཞན་ཡང་ངས་མངོན་པར་དྲན་ཏེ། སངས་རྒྱས་སྐར་རྒྱལ་ཞེས་བྱ་བ་ཤ་དག་བྱེ་བ་ཕྲག་གསུམ་པོ་དེ་དག་ལ་ཡང་ཞེས་བྱ་བ་ནས་ང་འཁོར་ལོས་སྒྱུར་བའི་རྒྱལ་པོར་གྱུར་པ་ན་བཀུར་སྟི་བྱས་སོ་ཞེས་བྱ་བའི་བར་དུ་བརྗོད་པར་བྱའོ། །ཤཱ་རིའི་བུ་གཞན་ཡང་ངས་མངོན་པར་དྲན་ཏེ། སངས་རྒྱས་སཱ་ལའི་རྒྱལ་པོ་ཞེས་བྱ་བ་ཤ་སྟག་ཁྲི་དྲུག་སྟོང་པོ་དེ་དག་བསྐལ་པ་གཅིག་ལ་བྱུང་སྟེ། ཤཱ་རིའི་བུ་བསྐལ་པ་དེའི་མིང་ཡང་གོང་མས་འཕགས་ཞེས་བྱ་བར་གྱུར་ཏོ། །ཤཱ་རིའི་བུ་དེ་ལ་ཡང་ངས་མངོན་པར་དྲན་ཏེ། སངས་རྒྱས་ཁྲི་དྲུག་སྟོང་པོ་དེ་དག་ལ་ངས་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ། དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་བར་གྱུར་པ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ཉིད་ལ་བརྟེན་ནས་ཞེས་བྱ་བ་ནས་ང་ལ་སངས་རྒྱས་བཅོམ་ལྡན་འདས་དེ་དག་གིས་ལུང་མ་བསྟན་ཏོ་ཞེས་བྱ་བ་དང་། འདི་ལྟར་ཡང་ང་སྨྲ་བ་དེ་དག་ལ་མངོན་པར་ཞེན་པ་དང་། དམིགས་པའི་ལྟ་བ་ཅན་དུ་གྱུར་པའི་ཕྱིར་རོ་ཞེས་བྱ་བའི་བར་དུ་བརྗོད་པར་བྱའོ། །ཤཱ་རིའི་བུ་ངས་མངོན་པར་དྲན་ཏེ། སངས་རྒྱས་པད་མས་འཕགས་པ་ཞེས་བྱ་བ་ཤ་སྟག་ཁྲི་ལྔ་བརྒྱ་པོ་དེ་དག་ལ་ཡང་ཞེས་བྱ་བ་ནས། ང་འཁོར་ལོས་སྒྱུར་བའི་རྒྱལ་པོ་ཉིད་དུ་གྱུར་པ་ན་ཞེས་བྱ་བའི་བར་དུ་བརྗོད་པར་བྱའོ། །ཤཱ་རིའི་བུ་གཞན་ཡང་ངས་མངོན་པར་དྲན་ཏེ། སངས་རྒྱས་རབ་ཏུ་འབར་བ་ཞེས་བྱ་བ་ཤ་དག་ཁྲི་ལྔ་སྟོང་པོ་དེ་དག་ལ་ཡང་ཞེས་བྱ་བ་ནས་ང་འཁོར་ལོས་སྒྱུར་བའི་རྒྱལ་པོ་ཉིད་དུ་གྱུར་པ་ན་ཞེས་བྱ་བའི་བར་དུ་བརྗོད་པར་བྱའོ། །ཤཱ་རིའི་བུ་གཞན་ཡང་ངས་མངོན་པར་དྲན་ཏེ། སངས་རྒྱས་ཀཽཎྜི་ནྱས་རིགས་ཞེས་བྱ་བ་བྱེ་བ་ཕྲག་དགུ་བཅུ་པོ་དག་ལ་ཡང་ཞེས་བྱ་བ་ནས་ང་འཁོར་ལོས་སྒྱུར་བའི་རྒྱལ་པོ་ཉིད་དུ་གྱུར་པ་ན་ཞེས་བྱ་བའི་བར་དུ་བརྗོད་པར་བྱའོ།