འདོད་པར་གཏོགས་པ་རྣམས་ཀྱི་ཚུལ་བཞིན་མ་ཡིན་པ་མི་དགེ་བ། བདག་ཅེའམ། བདག་གི་ཞེའམ། བདག་ཏུ་བྱེད་པ་དང་། བདག་གིར་བྱེད་པ་གང་ཡིན་པ་དེ་དག་སྟེ། དེ་དག་ནི་འདོད་པར་གཏོགས་པ་རྣམས་ཡིན་ནོ། །འདི་ལྟ་སྟེ་བདག་ཏུ་འདུ་ཤེས་པ་སྤངས་པ་གང་ཡིན་པ་དེ་དག་ནི་མངོན་པར་ཞེན་པ་མེད་པ་ཡིན་ནོ། །དེ་ནི་སྤངས་པ་ཡིན་ཏེ། འདི་ནི་དེ་བཞིན་གཤེགས་པ་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡིན་ནོ། །སྔོན་གྱི་སྦྱོར་བའི་ལེའུ་སྟེ་བདུན་པའོ།། །།ཤཱ་རིའི་བུ་ང་འདས་པ་མངོན་པར་དྲན་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ལ་བརྟེན་ནས་ང་འཁོར་ལོས་སྒྱུར་བའི་རྒྱལ་པོར་གྱུར་པ་ན། སངས་རྒྱས་ཤཱཀྱ་ཐུབ་པ་ཞེས་བྱ་བ་ཤ་དག་བྱེ་བ་ཕྲག་སུམ་ཅུ་ཉན་ཐོས་ཀྱི་ཚོགས་དང་བཅས་པ་གང་ཡིན་པ་དག་ཆོས་གོས་དང་བསོད་སྙོམས་དང་། གནས་མལ་དང་། ནད་ཀྱི་རྐྱེན་སྨན་དང་། མཁོ་བའི་ཡོ་བྱད་རྣམས་ཀྱིས་བསྟི་སྟང་དུ་བྱས། བླ་མར་བྱས། རྗེད། མཆོད་དེ་མཉེས་པར་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ཁོ་ན་བསྒྲུབས་ན། སངས་རྒྱས་བཅོམ་ལྡན་འདས་དེ་དག་གིས་ང་ལ་ཁྱོད་མ་འོངས་པའི་དུས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་རོ་ཞེས་ལུང་མ་བསྟན་ཏོ། །དེ་ཅིའི་ཕྱིར་ཞེ་ན། འདི་ལྟར་ང་དམིགས་པའི་འདུ་ཤེས་ཅན་དུ་གྱུར་ཅིང་བདག་ཏུ་སྨྲ་བ་ལ་མངོན་པར་ཞེན་པར་གྱུར་པའི་ཕྱིར་རོ། །ཤཱ་རིའི་བུ་ངས་གཞན་ཡང་འདས་པ་མངོན་པར་དྲན་ཏེ། ང་འཁོར་ལོས་སྒྱུར་བའི་རྒྱལ་པོར་གྱུར་པ་ན་སངས་རྒྱས་མར་མེ་མཛད་ཅེས་བྱ་བར་གྱུར་པ་ཤ་དག་བརྒྱད་སྟོང་བྱུང་བར་གྱུར་ཏེ། སངས་རྒྱས་བཅོམ་ལྡན་འདས་ཉན་ཐོས་ཀྱི་ཚོགས་དང་བཅས་པ་དེ་དག་ལ་ཡང་ངས་ཆོས་གོས་དང་། བསོད་སྙོམས་དང་། གནས་མལ་དང་། ནད་ཀྱི་རྐྱེན་སྨན་དང་། མཁོ་བའི་ཡོ་བྱད་རྣམས་ཀྱིས་བསྟི་སྟང་དུ་བྱས། བླ་མར་བྱས། རྗེད། མཆོད་དེ་མཉེས་པར་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ཉིད་བསྒྲུབས་ན། སངས་རྒྱས་བཅོམ་ལྡན་འདས་དེ་དག་གིས་ང་ལ་ཁྱོད་མ་འོངས་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་རོ་ཞེས་ལུང་མ་བསྟན་ཏོ།