།དེ་ལ་གང་དག་ཤིན་ཏུ་གྱ་ནོམ་པའི་ཆོས་རྣམས་ལ་བཟོད་པ་མ་ཐོབ་པར་དད་པས་བྱིན་པ་ལ་ལོངས་སྤྱོད་པར་བྱེད་ན། དེ་དག་ནི་དད་པས་བྱིན་པ་ལ་ཤིན་ཏུ་ལོངས་མ་སྤྱད་པ་ཡིན་ནོ། །དེ་དག་གིས་ཅི་ནས་ཀྱང་བསྟན་པ་འདི་ལ་རབ་ཏུ་བྱུང་ནས་སོ་སོར་ཐར་པའི་སྡོམ་པས་བསྡམས་པར་གྱུར་ཀྱང་། དོན་དམ་པ་སྟོང་པ་ཉིད་ལ་འཇུག་པར་མི་འགྱུར་བ་དང་། མོས་པར་མི་འགྱུར་བ་དང་། སྟོང་པ་ཉིད་དམིགས་སུ་མེད་པའི་ཆོས་རྣམས་ལ་ཡིད་གཉིས་དང་ཐེ་ཙོམ་ཟ་བར་གྱུར་ན། དེ་དག་ཕལ་ཆེར་ཚུལ་ཁྲིམས་གཙོ་བོར་བྱེད་པ་དང་། ཏིང་ངེ་འཛིན་གཙོ་བོར་བྱེད་པ་དང་། ཐོས་པ་གཙོ་བོར་བྱེད་པ་ཡིན་ཡང་། ཤཱ་རིའི་བུ་དེ་དག་གིས་དེ་བཞིན་གཤེགས་པ་ལ་མཆོད་པ་བྱས་པ་མ་ཡིན། གུས་པར་བྱས་པ་མ་ཡིན། བླ་མར་བྱས་པ་མ་ཡིན། རྗེད་པར་བྱས་པ་མ་ཡིན་ནོ། །དེ་ཅིའི་ཕྱིར་ཞེ་ན། ཤཱ་རིའི་བུ་འདི་ལྟར་སེམས་ཅན་གང་ཞིག་བསམ་གཏན་བཞི་པོ་དག་ཐོབ་པར་གྱུར་པ་དེ་ནི་ཤིན་ཏུ་རྙེད་པར་མི་སླ་བ་མ་ཡིན་ན། ཤཱ་རིའི་བུ་དེ་ལ་དེ་བཞིན་གཤེགས་པ་ལ་ཅི་ཞིག་གིས་བཀུར་སྟི་བྱས། གང་དག་དེ་ཙམ་གྱིས་དགེ་སྦྱོང་དུ་ཁས་འཆེ་བ་དེ་དག་ནི་སྡུག་བསྔལ་གྱི་སྦྱོར་བ་ཐམས་ཅད་ལས་ཡོངས་སུ་མ་གྲོལ་བ་ཡིན་པའི་ཕྱིར་རོ། །ཤཱ་རིའི་བུ་དེ་ལྟ་བས་ན་ཁྱོད་ལ་གོ་བར་བྱའོ། །ཁོང་དུ་ཆུད་པར་བྱའོ། །ཆོས་འདུལ་བ་འདི་ནི་མང་པོའི་འཛིན་པ་སྣ་ཚོགས་ཀྱིས་ལྟ་བ་ཉམས་པར་འགྱུར་རོ། །ཤཱ་རིའི་བུ་འདི་ལྟར་ཡོངས་སུ་མ་དག་པའི་ཚུལ་ཁྲིམས་གཙོ་བོར་བྱེད་པ་དང་། ཡོངས་སུ་མ་དག་པའི་ཏིང་ངེ་འཛིན་གཙོ་བོར་བྱེད་པ་དང་། ཡོངས་སུ་མ་དག་པའི་ཐོས་པ་གཙོ་བོར་བྱེད་པས་ཡོངས་སུ་དག་པའི་དགེ་སྦྱོང་མ་ཡིན་ནོ། །ཤཱ་རིའི་བུ་དེ་ལ་ནི་དགེ་སྦྱོང་ཞེས་མི་གསུང་ངོ་། །བྲམ་ཟེ་ཞེས་མི་གསུང་ངོ་། །ཤཱ་རིའི་བུ་གང་ཞིག་བདག་མེད་པའི་ཆོས་རྣམས་ལ་བདག་མེད་པའི་ཆོས་རྣམས་ཡིན་ནོ་ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་དང་། ཆོས་ཐམས་ཅད་ཀྱི་རང་གི་མཚན་ཉིད་སྟོང་པ་ལ་ཆོས་ཐམས་ཅད་ཀྱི་རང་གི་མཚན་ཉིད་སྟོང་པ་ཉིད་ཡིན་ནོ་ཞེས་ཡང་དག་པ་ཅི་ལྟ་བ་བཞིན་དུ་རབ་ཏུ་ཤེས་པ་དེ་ནི་དེའི་ཚེ་ཉིད་ནས་ཚུལ་ཁྲིམས་གཙོ་བོར་བྱེད་པ་མ་ཡིན་ཏེ། ཏིང་ངེ་འཛིན་གཙོ་བོར་བྱེད་པ་མ་ཡིན། ཐོས་པ་གཙོ་བོར་བྱེད་པ་མ་ཡིན་ནོ། །དེ་ཅིའི་ཕྱིར་ཞེ་ན། ཤཱ་རིའི་བུ་འདི་ལྟར་མངོན་པར་འདུ་བྱེད་པ་མེད་ན་ཆོས་གང་ཞིག་གཙོ་བོར་བྱ།