དེའི་མཁན་པོ་དང་སློབ་དཔོན་ལ་དགེ་སློང་མང་པོས་སམ། དགེ་སློང་གི་དགེ་འདུན་གྱིས་ཚིག་འདི་སྐད་ཅེས་དེ་ལ་བཅོམ་ལྡན་འདས་ཀྱིས་གང་དག་ཆོས་རྣམས་ཀྱི་རང་གི་མཚན་ཉིད་རབ་ཏུ་ཤེས་ཤིང་སྟོང་པ་ཉིད་ཀྱིས་གནས་པ་དེ་ལྟ་བུ་དག་གི་སྟོན་པ་ནི་ང་ཡིན་གྱི། གང་ཟག་གི་འདུ་ཤེས་ཅན་ལོག་པར་ཞུགས་པ། ལམ་གོལ་བར་གཞོལ་བ་རྣམས་ཀྱི་སྟོན་པ་ནི་ང་མ་ཡིན་ནོ་ཞེས་གསུངས་ལ་བཅོམ་ལྡན་འདས་ཀྱིས་ཡང་དག་པའི་ཚུལ་ཁྲིམས་དང་། ལྟ་བ་ཕུན་སུམ་ཚོགས་པ་རྣམས་ཀྱི་གསོ་སྦྱོང་གི་ལས་ནི་གསུངས་ཀྱི། འདི་ལྟར་ཚུལ་ཁྲིམས་ཉམས་པ་རྣམས་ཀྱི་ནི་མ་ཡིན་པས་ཚེ་དང་ལྡན་པའི་ལྷན་ཅིག་གནས་པ་ནི་དམིགས་སུ་མེད་པའི་སྟོང་པ་ཉིད་ཀྱི་ཆོས་རྣམས་ལ་མ་མོས་ཤིང་གཞན་མུ་སྟེགས་ཅན་གྱི་སྨྲ་བར་གྱུར་ཏོ། །བཅོམ་ལྡན་འདས་ཀྱིས་གཞན་མུ་སྟེགས་ཅན་གྱི་སྨྲ་བ་དང་ལྷན་ཅིག་ཏུ་གསོ་སྦྱོང་གི་ལས་མ་གསུངས་པས་དེ་ནི་མི་བསྟེན་ཏོ། །དེ་ལྟ་བུའི་བཟོད་པ་དང་ལྡན་པ་གང་ཡིན་པ་དེ་དག་ནི་དགེ་འདུན་གྱི་བྱ་བ་ལ་བསྐོ་བར་མི་བྱའོ། །འདུན་པ་བླང་བར་མི་བྱའོ། །དེའི་ཡོངས་སུ་མ་དག་པའི་བཟོད་པ་དེ་ལྟ་བུ་དེ་དག་ཚེ་དང་ལྡན་པ་དག་གིས་ཀྱང་འདི་ལྟར་ཕྱིར་བཟློག་པར་ནུས་པར་གྱིས་ཤིག་ཅེས་བརྗོད་པར་བྱའོ། །ཤཱ་རིའི་བུ་དགེ་སློང་གི་དགེ་འདུན་གྱིས་དེ་ལྟར་བྱས་ན་ང་ལ་ཡང་མཆོད་པ་བྱས་པ་ཡིན་ནོ། །གཞན་མུ་སྟེགས་ཅན་ཡང་ཤིན་ཏུ་ཚར་གཅད་པ་ཡིན་ནོ། །གསོ་སྦྱོང་གི་ལས་ཀྱང་ཤིན་ཏུ་ཡོངས་སུ་དག་པར་བྱས་པ་ཡིན་ནོ། །ཤཱ་རིའི་བུ་ཁྱོད་ལ་གོ་བར་བྱའོ། །ཁོང་དུ་ཆུད་པར་བྱའོ། །གང་ཞིག་འདི་ལྟ་སྟེ། བདག་ཏུ་ལྟ་བ་དང་། སེམས་ཅན་དུ་ལྟ་བ་དང་། སྲོག་ཏུ་ལྟ་བ་དང་། གང་ཟག་ཏུ་ལྟ་བ་སྟེ། ལྟ་བ་འདི་དག་འཛིན་པར་བྱེད་ན་དེ་དག་ནི་ངའི་རྗེས་སུ་རབ་ཏུ་བྱུང་བ་མ་ཡིན། དེ་དག་ནི་ང་ལ་མཉེས་པར་བྱེད་པ་མ་ཡིན་ཏེ། དེ་དག་གི་སྟོན་པ་ཡང་ང་མ་ཡིན་ནོ། །དེ་དག་ནི་སྟོན་པ་དྲུག་པོའི་རྗེས་སུ་རབ་ཏུ་བྱུང་བ་ཡིན། དེ་དག་ནི་སྟོན་པ་དྲུག་པོ་མཉེས་པར་བྱེད་པ་ཡིན་པས། དེ་དག་གི་སྟོན་པ་ཡང་སྟོན་པ་དྲུག་པོ་ཡིན་ནོ། །དེ་ལ་གང་དག་ཤིན་ཏུ་གྱ་ནོམ་པའི་ཆོས་རྣམས་ལ་བཟོད་པ་མ་ཐོབ་པར་དད་པས་བྱིན་པ་ལ་ལོངས་སྤྱོད་པར་བྱེད་ན།