བཅོམ་ལྡན་འདས་ཉན་ཐོས་ཀྱི་ཐེག་པ་ལ་མོས་ན་ལྷ་དང་འཇིག་རྟེན་དུ་བཅས་པ་ལ་སྨན་མི་ཐོགས་སོ། །བཅོམ་ལྡན་འདས་འདི་ལྟ་སྟེ། དཔེར་ན་ས་ཆེན་པོ་འདི་རྐང་གཉིས་པ་དང་། རྐང་བཞི་པ་རྣམས་ལ་སྨན་འདོགས་པར་གྱུར་པ་དེ་བཞིན་དུ། བཅོམ་ལྡན་འདས་གང་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་པ་དེ་དག་ནི་ལྷ་དང་བཅས་པའི་འཇིག་རྟེན་ལ་སྨན་འདོགས་པར་གྱུར་པའོ།། །།བམ་པོ་གསུམ་པ། གཏམ་འདི་བརྗོད་པའི་རྗེས་ལ་རྒྱལ་པོ་མ་སྐྱེས་དགྲ་དཔུང་གི་ཚོགས་ཡན་ལག་བཞི་པ་དང་བཅས་ཏེ་བཅོམ་ལྡན་འདས་ག་ལ་བ་དེར་སོང་ནས་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ལན་གསུམ་བསྐོར་ནས་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་རྒྱལ་པོ་མ་སྐྱེས་དགྲས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་རྣམས་ཅི་ལ་གནས། ཅིའི་མཐུས་ན་སྡིག་པའི་ལས་མངོན་པར་རྩོམ་ཞིང་བགྱིད་པར་འགྱུར། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་རྒྱལ་པོ་མ་སྐྱེས་དགྲ་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་སེམས་ཅན་རྣམས་ནི་བདག་དང་སེམས་ཅན་དང་། སྲོག་དང་། གང་ཟག་ལ་གནས་སོ། །རྒྱལ་པོ་ཆེན་པོ་སེམས་ཅན་རྣམས་ནི་འཇིག་ཚོགས་སུ་ལྟ་བ་ལ་རྟེན་ཅིང་ཕྱིན་ཅི་ལོག་ཏུ་མངོན་དུ་གྱུར་པ་ལ་གནས་ནས་སྡིག་པའི་ལས་མངོན་པར་རྩོམ་ཞིང་བྱེད་པར་འགྱུར་རོ། །གསོལ་པ། བཅོམ་ལྡན་འདས་འཇིག་ཚོགས་སུ་ལྟ་བའི་རྩ་བ་གང་ལགས། བཀའ་སྩལ་པ། རྒྱལ་པོ་ཆེན་པོ་འཇིག་ཚོགས་སུ་ལྟ་བ་ནི་མ་རིག་པའི་རྩ་བ་ལས་བྱུང་ངོ་། །གསོལ་པ། བཅོམ་ལྡན་འདས་མ་རིག་པའི་རྩ་བ་གང་ལགས། བཀའ་སྩལ་པ། རྒྱལ་པོ་ཆེན་པོ་མ་རིག་པ་ནི་ཚུལ་བཞིན་ཡིད་ལ་མི་བྱེད་པ་ལས་བྱུང་ངོ་། །གསོལ་པ། བཅོམ་ལྡན་འདས་ཚུལ་བཞིན་ཡིད་ལ་མི་བགྱིད་པའི་རྩ་བ་གང་ལགས། བཀའ་སྩལ་པ། རྒྱལ་པོ་ཆེན་པོ་ཚུལ་བཞིན་ཡིད་ལ་མི་བྱེད་པ་ནི་མེད་པ་ལ་སྒྲོ་འདོགས་པའི་རྩ་བ་ལས་བྱུང་ངོ་། །གསོལ་པ།