ཐེག་པའི་མཆོག་ཅེས་བྱ་བ། ཐེག་པའི་གཙོ་བོ་ཞེས་བྱ་བ། ཐེག་པ་རབ་མཆོག་ཅེས་བྱ་བ། བླ་ན་མེད་པའི་ཐེག་པ་ཞེས་བྱ་བ། མ་ཆགས་པའི་ཐེག་པ་ཞེས་བྱ་བ། ཉན་ཐོས་དང་རང་སངས་རྒྱས་ཐམས་ཅད་ཟིལ་གྱིས་གནོན་པའི་ཐེག་པ་ཞེས་བྱ་བ་ནི་ཤཱ་རིའི་བུ་ཐམས་ཅད་མཁྱེན་པའི་ཚིག་བླ་དགས་སོ། །སྔོན་བྱུང་བའི་གཏམ་འདི་དང་། ཐམས་ཅད་མཁྱེན་པ་སྟོན་པ་འདི་བསྟན་པའི་ཚེ་སྲོག་ཆགས་ཁྲིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ཤཱ་རིའི་བུ་དང་། མཽང་གལ་གྱི་བུ་ཆེན་པོ་དང་། འོད་སྲུང་ཆེན་པོ་དང་། རེ་བ་ཏི་དང་། མ་འགགས་པ་དང་། ཨུ་པ་ལི་དང་། བྱམས་མའི་བུ་གང་པོ་ལ་སོགས་པ་ཉན་ཐོས་ཆེན་པོ་དེ་དག་ཐམས་ཅད་ཀྱིས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ནས་མགྲིན་གཅིག་ཏུ་ཚིག་སྨྲས་པ། བཅོམ་ལྡན་འདས་རིགས་ཀྱི་བུ་དང་། རིགས་ཀྱི་བུ་མོས་གུས་པར་བགྱིས་ཏེ། དགེ་བའི་རྩ་བ་བསྐྱེད་པར་བགྱིའོ། །རྒྱ་ཆེན་པོ་ལ་ཡང་མོས་པར་བགྱིའོ། །སྨོན་ལམ་རྒྱ་ཆེན་པོ་ཡང་གདབ་པར་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་བདག་ཅག་ལ་སངས་རྒྱས་བརྒྱ་སྟོང་གིས་ཐམས་ཅད་མཁྱེན་པ་དང་ལྡན་པའི་གཏམ་བརྗོད་ཅིང་བདག་ཅག་ལ་ཆོས་བསྟན་ཀྱང་བཅོམ་ལྡན་འདས་བདག་ཅག་ནི་མ་ཆགས་པའི་ཡེ་ཤེས་རྟོགས་པར་འགྱུར་བའི་སྐལ་བ་མ་མཆིས་སོ། །བཅོམ་ལྡན་འདས་བདག་ཅག་ནི་མཚམས་མ་མཆིས་པ་ལྔ་དང་ལྡན་ན་ལེགས་ཀྱི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ལྡོག་པར་འགྱུར་བ་ནི་དེ་ལྟ་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་བདག་ཅག་མཚམས་མ་མཆིས་པ་ལྔ་དང་ལྡན་ན་ནི་སེམས་ཅན་དམྱལ་བར་སྡུག་བསྔལ་སྦྱངས་ཏེ་ཐམས་ཅད་མཁྱེན་པའི་ཡེ་ཤེས་མ་ཆགས་པ་འདི་དང་མི་འབྲལ་བར་འགྱུར་ན་བཅོམ་ལྡན་འདས་བདག་ཅག་ནི་བསམ་པའི་རྒྱུད་ཚིག་པ། དབང་པོ་ཉམས་པ། ཐམས་ཅད་མཁྱེན་པའི་ཡེ་ཤེས་ཀྱི་སྣོད་མ་ལགས་པར་གྱུར་ན་ད་ཇི་ལྟར་བགྱི། བཅོམ་ལྡན་འདས་འདི་ལྟ་སྟེ། དཔེར་ན་སྐྱེས་བུ་གུམ་སྟེ་དུས་འདས་པར་གྱུར་ན་གཉེན་རྣམས་ཀྱིས་ཉེ་བར་འཚོ་བར་མི་འགྱུར་བ་དེ་བཞིན་དུ། བཅོམ་ལྡན་འདས་ཉན་ཐོས་ཀྱི་ཐེག་པ་ལ་མོས་ན་ལྷ་དང་འཇིག་རྟེན་དུ་བཅས་པ་ལ་སྨན་མི་ཐོགས་སོ།