བཅོམ་ལྡན་འདས་མ་མཆིས་པ་ལ་སྒྲོ་འདོགས་པ་ཞེས་བགྱི་བ་ཅི་ལགས། བཀའ་སྩལ་པ། རྒྱལ་པོ་ཆེན་པོ་མེད་པ་ལ་སྒྲོ་འདོགས་པ་ཞེས་བྱ་བ་ནི་མ་བྱུང་བ་ལ་ཡོངས་སུ་རྟོག་པའི་ཚིག་བླ་དགས་སོ། །གསོལ་པ། བཅོམ་ལྡན་འདས་མ་བྱུང་བ་ལ་ཡོངས་སུ་རྟོག་པ་ཞེས་བགྱི་བའི་རྩ་བ་གང་ལགས། བཀའ་སྩལ་པ། རྒྱལ་པོ་ཆེན་པོ་མ་བྱུང་བ་ལ་ཡོངས་སུ་རྟོག་པ་ཞེས་བྱ་བ་ནི་འདུས་ཏེ་མ་བྱུང་བའི་ཚིག་བླ་དགས་སོ། །གསོལ་པ། བཅོམ་ལྡན་འདས་འདུས་ཏེ་མ་བྱུང་བ་ཞེས་བགྱི་བ་ཅི་ལགས། བཀའ་སྩལ་པ། རྒྱལ་པོ་ཆེན་པོ་འདུས་ཏེ་མ་བྱུང་བ་ཞེས་བྱ་བ་ནི་གང་གི་ཕྱིར་མ་སྐྱེས་མ་བྱུང་བས་དེའི་ཕྱིར་འདུས་ཏེ་མ་བྱུང་བ་ཞེས་བྱའོ། །གསོལ་པ། བཅོམ་ལྡན་འདས་གང་མི་འབྱུང་བ་དེ་ཅི་ཞིག་བགྲང་འཚལ། བཀའ་སྩལ་པ། གང་མི་འབྱུང་བ་དེ་ལ་བགྲང་བ་ཆུང་ཟད་ཀྱང་མེད་དོ། །གསོལ་པ། བཅོམ་ལྡན་འདས་འགྱོད་པ་ཅི་ལ་དམིགས་པ་ལགས། བཀའ་སྩལ་པ། རྒྱལ་པོ་ཆེན་པོ་འགྱོད་པ་ནི་ཐེ་ཙོམ་ལ་དམིགས་པའོ། །གསོལ་པ། བཅོམ་ལྡན་འདས་ཐེ་ཙོམ་ཞེས་བགྱི་བ་ཅི་ལགས། བཀའ་སྩལ་པ། རྒྱལ་པོ་ཆེན་པོ་ཐེ་ཙོམ་ཞེས་བྱ་བ་ནི་གང་འཕགས་པ་ཡང་དག་པར་སྨྲ་བ་དག་གིས་བཤད་པ་ལ་ཐེ་ཙོམ་ཟ་བ་སྟེ་དེ་ནི་ཐེ་ཙོམ་ཞེས་བྱའོ། །གསོལ་པ། བཅོམ་ལྡན་འདས་འཕགས་པ་གང་ལགས། ཡང་དག་པར་སྨྲ་བ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་རྡུལ་དང་ལྟ་བ་ཐམས་ཅད་དང་བྲལ་བའི་ཕྱིར་འཕགས་པ་ཞེས་བྱའོ། །རྒྱལ་པོ་ཆེན་པོ་གང་དག་གིས་ཆོས་ཐམས་ཅད་འདུས་ཏེ་བྱུང་བ་མ་ཡིན་པར་རྟོགས་པ་ནི་ཡང་དག་པར་སྨྲ་བ་ཞེས་བྱའོ། །དེ་སྐད་ཅེས་བཀའ་སྩལ་ནས། བཅོམ་ལྡན་འདས་ལ་རྒྱལ་པོ་མ་སྐྱེས་དགྲས་འདི་སྐད་ཅེས་གསོལ་ཏོ། །བཅོམ་ལྡན་འདས་འཇིག་རྟེན་གནས་པ་ནི་བདག་གི་བསམ་པའི་རྒྱུད་ཀྱི་ཉོན་མོངས་པས་བསྒྲིབས་པ་སྟེ། དེ་ནི་འཕགས་པ་ཡང་དག་པར་སྨྲ་བ་དག་གིས་བཤད་པ་ལ་ཡིད་མ་ཆེས་ནས་སྡིག་པའི་ལས་རྣམ་པ་དུ་མ་དག་རྩོལ་ཞིང་བགྱིད་པ་དེ་ནི་བཅོམ་ལྡན་འདས་ངོ་མཚར་ཏོ། །དེ་ནི་བདེ་བར་གཤེགས་པ་རྨད་དུ་གྱུར་པའོ།