།དགེ་སློང་ཁྱེའུ་འདི་གཉིས་ཀྱིས་ཉན་ཐོས་ཀྱི་སེམས་ཀྱིས་དེ་བཞིན་གཤེགས་པ་ལ་མུ་ཏིག་གི་སེ་མོ་དོ་གཉིས་གཏོར་བ་ཁྱོད་ཀྱིས་མཐོང་ངམ། གསོལ་པ། བཅོམ་ལྡན་འདས་མཐོང་ངོ་། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ཁྱེའུ་འདི་གཉིས་ནི་འཁོར་བས་འཇིགས་སྐྲག་ནས་བྱང་ཆུབ་ཏུ་སྨོན་ལམ་མི་འདེབས་པར་བདག་ཅག་ནི་མྱུར་དུ་མྱ་ངན་ལས་འདས་པར་བྱའོ་སྙམ་དུ་དེ་ལྟར་སེམས་སོ། །དགེ་སློང་ཁྱོད་ལ་བསྒོའོ། །ཁོང་དུ་ཆུད་པར་བྱའོ། །གང་གི་ཚེ་ན་ཁྱེའུ་གསུམ་པ་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་འགྱུར་བ་དེའི་ཚེ། ཁྱེའུ་འདི་གཉིས་ནི་དེའི་ཉན་ཐོས་ཀྱི་མཆོག་ཏུ་འགྱུར་ཏེ། གཅིག་ནི་ཤེས་རབ་དང་ལྡན་པའི་མཆོག །གཉིས་པ་ནི་རྫུ་འཕྲུལ་དང་ལྡན་པའི་མཆོག་ཏུ་འགྱུར་རོ། །ཤཱ་རིའི་བུ་དེའི་ཚེ་དེའི་དུས་ན་ཁྱེའུ་བར་མར་གྱུར་ཅིང་ཐམས་ཅད་མཁྱེན་པའི་སེམས་བསྐྱེད་པ་དེ་ནི་གཞན་ནོ་སྙམ་དུ་ཐེ་ཙོམ་མམ། ཡིད་གཉིས་སུ་གྱུར་པར་ཤཱ་རིའི་བུ་དེ་ལྟར་མ་ལྟ་ཞིག །དེ་ཅིའི་ཕྱིར་ཞེ་ན། ང་དེའི་ཚེ་དེའི་དུས་ན་ཁྱེའུ་བར་མ་དེར་གྱུར་ཏོ། །ཤཱ་རིའི་བུ་དེའི་ཚེ་དེའི་དུས་ན་གཡས་ཕྱོགས་ཀྱི་ཁྱེའུར་གྱུར་པ་དེ་གཞན་ཡིན་པ་སྙམ་དུ་དེ་ལྟར་མ་ལྟ་ཞིག །དེ་ཅིའི་ཕྱིར་ཞེ་ན། ཤཱ་རིའི་བུ་ཁྱོད་ཉིད་དེའི་ཚེ་དེའི་དུས་ན་ཁྱེའུ་དེར་གྱུར་ཏོ། །དགེ་སློང་མཽང་གལ་གྱི་བུ་ནི་ཁྱེའུ་གཡོན་ཕྱོགས་པར་གྱུར་ཏོ། །ཤཱ་རིའི་བུ་ལྟོས་དགེ་བའི་རྩ་བ་མཉམ་པ་ལས་ཁྱེད་གཉིས་འཁོར་བས་འཇིགས་སྐྲག་ནས་བྱང་ཆུབ་ཏུ་སེམས་མ་བསྐྱེད་དེ་སེམས་ཞུམ་པས་ཅི་ནས་ཀྱང་བདག་ཅག་གིས་མྱུར་དུ་མྱ་ངན་ལས་འདའ་བར་བྱའོ་སྙམ་བྱེད་མོད་ཀྱི་ཁྱེད་གཉིས་ཀྱིས་ང་ལས་ཐལ་བར་མ་ནུས་སོ། །ཤཱ་རིའི་བུ་ལྟོས་ངས་ཐམས་ཅད་མཁྱེན་པ་རྟོགས་ནས་ཁྱེད་གཉིས་ནི་ངས་ཆོས་བསྟན་པས་རྣམ་པར་གྲོལ་ལོ། །ཤཱ་རིའི་བུ་རྣམ་གྲངས་དེས་ཀྱང་འདི་ལྟར་ཤེས་པར་བྱ་སྟེ་ཅི་ནས་ཀྱང་མྱུར་དུ་མྱ་ངན་ལས་འདའ་བར་འདོད་ན་ཐམས་ཅད་མཁྱེན་པར་སེམས་བསྐྱེད་པར་བྱའོ། །དེ་ཅིའི་ཕྱིར་ཞེ་ན། ཤཱ་རིའི་བུ་མྱུར་བའི་ཐེག་པ་ཞེས་བྱ་བ་ནི་ཐམས་ཅད་མཁྱེན་པའི་ཚིག་བླ་དགས་སོ། །མི་སླུ་བའི་ཐེག་པ་ཞེས་བྱ་བ། སེམས་ཅན་ཐམས་ཅད་ལ་ཕན་པ་དང་བདེ་བའི་ཐེག་པ་ཞེས་བྱ་བ། འབར་བའི་ཐེག་པ་ཞེས་བྱ་བ། ཐེག་པའི་མཆོག་ཅེས་བྱ་བ།