།དེའི་ཕྱི་རོལ་གྱི་ཁོར་ཡུག་ཏུ་སྣམ་བུའི་རྣམ་པ་བྱའོ། །རི་བོ་ལ་སྣ་ཚོགས་པའི་ལྗོན་ཤིང་དང་ལྕུག་མ་བཀྲམ་པ་དང་མེ་ཏོག་སྣ་ཚོགས་ཀྱིས་ཉེ་བར་མཛེས་པའོ། །ཁོར་ཡུག་ཏུ་ཆུ་འབབ་པའི་སྙིང་པོའི་དཀྱིལ་འཁོར་འདི་བྲི་ཞིང་ཕྱི་རོལ་གྱི་དཀྱིལ་འཁོར་གྱི་ཁོར་ཡུག་ཏུའང་བྲི་བར་བྱ་སྟེ། དཀྱིལ་འཁོར་བླ་ན་མེད་པ་ཕྱག་རྒྱ་སྣ་ཚོགས་དང་། མེ་ཏོག་སྣ་ཚོགས་དང་། བུམ་པ་དང་མཆོད་པའི་རིན་པོ་ཆེའི་སྣོད་སྣ་ཚོགས་པ་དང་། གང་བའི་བུམ་པ་སྣ་ཚོགས་པ་བྲིའོ། །མཚན་མ་དང་། ཕྱག་རྒྱ་དང་། རིན་པོ་ཆེ་སྣ་ཚོགས་པའི་ཡལ་ག་དང་། པདྨ་དང་། ཨུཏྤལ་འཆང་བ་གོས་དང་རྒྱན་སྣ་ཚོགས་པ་ཐོགས་པ་བྱའོ། །ཕྱིའི་དཀྱིལ་འཁོར་གྱི་ཁོར་ཡུག་ཏུ་མེ་ཏོག་སྣ་ཚོགས་པ་ཀུ་མུ་ད་དང་། པདྨ་དཀར་པོ་དང་། མན་དཱ་ར་བ་དང་། ཨ་ཏི་མུཀྟ་ཀ་དང་། ཝཱརྵི་ཀ་དང་། ཙམ་པ་ཀ་དང་། ཨུཏྤ་ལ་སྔོན་པོ་དང་། སྣ་མ་དང་། སྐྱ་སྣར་དང་། ཡཱུ་ཐི་ཀ་དང་། ཀ་དམ་པའི་མེ་ཏོག་གི་ཕྲེང་བས་མཛེས་པར་བྱའོ། །སྒོ་བཞིའི་གནས་སུ་རྒྱན་ཐམས་ཅད་ཀྱིས་རྣམ་པར་བརྒྱན་པར་བྱ་སྟེ། རིན་པོ་ཆེའི་ལྕུག་མ་སྣ་ཚོགས་པ་དང་། བུམ་པ་གང་བ་ཐོགས་པར་བྱའོ། །དཀྱིལ་འཁོར་གྱི་སྙིང་པོར་བ་དན་གྱིས་བརྒྱན་པར་བྱའོ། །གང་བའི་བུམ་པ་ཡོངས་སུ་བསགས་པ་དང་། མེ་ཏོག་དང་འབྲས་བུ་སྣ་ཚོགས་པ་དང་། སྣ་ཚོགས་པའི་གཟུགས་དང་བཟའ་བའི་ཁ་ཟས་རོ་བྲོ་བའི་མཆོག་གཞག་པར་བྱ། སྣ་ཚོགས་པའི་བདུག་པས་བདུགས་ལ། བདུག་པའི་བོག་ཕོར་ཡོངས་སུ་བཤམ་པར་བྱའོ། །རིག་སྔགས་འཆང་གཙང་མས་གོས་གཙང་མ་བགོ་བར་བྱ་ལེགས་པར་ཁྲུས་བྱས་ཤིང་དྲི་བཟང་པོའི་དྲིས་བསྒོས་ཏེ། རྣམ་པ་སྣ་ཚོགས་པའི་བདུག་པས་བདུགས་ལ། འབྱུང་ལྔས་ཉེ་རེག་བྱ་སྟེ་དོན་ཡོད་པ་ནོར་བུའི་མཆོད་པའི་སྙིང་པོའི་གཟུངས་འདི་ལན་སྟོང་རྩ་བརྒྱད་དུ་བཟླས་པར་བྱའ། །དུས་གསུམ་དུ་གཤེགས་པའི་དེ་བཞིན་གཤེགས་པ་རྡུལ་ཕྲ་རབ་ཀྱི་གྲངས་དང་མཉམ་པ་ཡིད་ལ་བྱ། མཆོད་པའི་སྤྲིན་ཆེན་པོ་ཡིད་ལ་བྱ་ཞིང་བཟླ་སྟེ་ཕྱོགས་བཅུ་ཀུན་ནས་སངས་རྒྱས་ཀྱི་ཞིང་ཐམས་ཅད་ཀྱི་ནང་དུ་གཏོགས་པའི་སངས་རྒྱས་བཅོམ་ལྡན་འདས་རྣམས་སངས་རྒྱས་ཀྱི་ཞིང་རེ་རེའི་དུས་གསུམ་དུ་གཤེགས་པའི་དེ་བཞིན་གཤེགས་པ་རྡུལ་ཕྲ་རབ་རྣམས་དེ་བཞིན་གཤེགས་པའི་མཆོད་པའི་སྤྲིན་གྱིས་ཇི་ལྟར་དཀྱིལ་འཁོར་དུ་ཡོངས་སུ་བསགས་ཤིང་རྣམ་པ་སྣ་ཚོགས་སུ་གཞལ་དུ་མེད་པས་ཇི་ལྟ་བ་བཞིན་དུ་ཡོངས་སུ་བསགས་པའི་དེ་བཞིན་གཤེགས་པ་རེ་རེ་ཡང་དཀྱིལ་འཁོར་ཆེན་པོ་གཞལ་དུ་མེད་པ་བརྒྱ་སྟོང་ཕྲག་ཡོངས་སུ་བསགས་པས་བཅོམ་ལྡན་འདས་ཀྱི་སྤྱན་སྔར་མཆོད་པའི་སྤྲིན་ཆེན་པོ་བྱེད་དོ།