།ཕྱག་རྒྱ་དང་དཀྱིལ་འཁོར་གྱི་རིམ་པར་ཕྱེ་བའི་ཆོ་ག་སྨྲོས་ཤིག །དོན་ཡོད་པའི་ནོར་བུའི་མཆོད་པའི་སྙིང་པོའི་གཟུངས་ཀྱི་གསང་བ་དང་། རིག་སྔགས་འཆང་ཐམས་ཅད་ཀྱི་སྙིང་པོའི་གསང་བ་མཆོག་གི་དངོས་གྲུབ་འདི་ཐམས་ཅད་དུ་ཐུན་མོང་བའི་སྙིང་པོ་གྲུབ་པའོ། །དེ་ནས་བྱང་ཆུབ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་དོན་ཡོད་པ་ལྕགས་ཀྱུའི་ཆོ་ག་ཞིབ་མོའི་རྒྱལ་པོའི་རིག་པའི་རྒྱལ་པོ་དོན་ཡོད་པ་ནོར་བུ་མཆོད་པའི་སྙིང་པོའི་གཟུངས་ཀྱི་ཕྱག་རྒྱ་དང་། དཀྱིལ་འཁོར་གྱི་ཆོ་ག་དང་། རས་རིས་རྣམས་གསུངས་པ། དེ་ནས་འདིའི་དཀྱིལ་འཁོར་བཤད་པར་བྱའོ། །དོན་ཡོད་པ་མཆོད་པའི་ནོར་བུའི་སྙིང་པོ་བླ་ན་མེད་པ་ནི་དཀྱིལ་འཁོར་གྲུ་བཞི་པ་བྱས་ཏེ། ཀུན་ནས་ཤིན་ཏུ་རྣམ་པར་ཕྱེ་བ་ས་དང་བ་བྱུང་གིས་ལེགས་པར་བྱུགས་ཤིང་ཤིན་ཏུ་འཇམ་པ་ལ། ཚོན་སྣ་ཚོགས་པས་བཀྲ་བའི་སྲད་བུས་ཆར་གཞལ་ཅིང་བཅད་ལ་དཀྱིལ་འཁོར་བླ་ན་མེད་པའི་དབུས་ཀྱི་དཀྱིལ་འཁོར་གྱི་སྙིང་པོར་བདག་གི་ཁྲུའི་ཚད་ཀྱིས་ཀུན་ནས་ཁྲུ་བཞི་པ་སྒོ་བཞི་རྣམ་པར་ཕྱེ་བ་བྱའོ། །ཐམས་ཅད་དུ་གསང་བ་ཐུན་མོང་བའི་དཀྱིལ་འཁོར་དང་། དབུས་ཀྱི་དཀྱིལ་འཁོར་གྱི་སྙིང་བོར་ཡང་པདྨ་བྱ་སྟེ། པདྨ་སྟོང་ཕྲག་གིས་ཤིན་ཏུ་མཛེས་པ་ལྔ་ལྔའོ། །པདྨ་དཀར་པོ་བླ་ན་མེད་པ་ལ་ཟེ་འབྲུ་དང་། གེ་སར་གྱི་ཚད་ལ་བབ་པ། ཡིད་བཞིན་གྱི་ནོར་བུའི་གེ་སར་དང་། ཟེ་འབྲུ་བཀྲ་བའི་དྲ་བའི་སྙིང་པོ་ལུས་དང་ལག་ཏུ་འཆང་ཞིང་ལག་པའི་ཕྱག་རྒྱ་གཡོན་པ་དང་གཡས་པས་བྱའོ། །དར་དཔྱངས་དང་འཁྱིལ་པས་སྤ་བ། ཟུར་ཟུར་དུ་དཔག་བསམ་གྱི་ཤིང་ཤིན་ཏུ་ཚད་ལ་བབ་པ་ཆོ་ག་ཇི་ལྟ་བ་བཞིན་དུ་བྱེད་དུ་གཞུག་གོ། །སྙིང་པོའི་འཁོར་གྱི་རེ་ཁཱ་ཡང་ཆོ་ག་ཇི་ལྟ་བ་བཞིན་དུ་ཤིན་ཏུ་ཚད་དང་ལྡན་པར་བྱའོ། །མེ་ཏོག་དང་འབྲས་བུ་སྣ་ཚོགས་པ་བྱ་ཞིང་དེ་ནས་མེ་ཏོག་གི་བར་དུ་རེ་ཁཱ་བྱའོ། །རྒྱན་སྣ་ཚོགས་ཀྱིས་རྣམ་པར་བརྒྱན་པ། གོས་སྣ་ཚོགས་པས་མཛེས་པའོ། །སྣ་ཚོགས་པའི་རྒྱན་གྱི་ཕྱི་རོལ་ཏུ་པདྨ་དང་། ཨུཏྤ་ལ་སྔོན་པོའི་ཕྲེང་བའི་རི་མོའོ། །ཨུཏྤ་ལ་སྔོན་པོའི་ཕྱི་རོལ་ཏུ་ནོར་བུ་རིན་པོ་ཆེ་སྣ་ཚོགས་པས་རྣམ་པར་བཀྲ་བའི་རི་མོ་འབར་བའི་ཕྲེང་བས་མཛེས་པའོ། །མེ་ཏོག་སྣ་མ་དང་། ཙམ་པ་ཀའི་ཕྲེང་བ་དག་ལ་སྔགས་ཀྱི་ནོར་བུའི་རི་མོ་ཡང་བྱའོ། །དེའི་ཕྱི་རོལ་གྱི་ཁོར་ཡུག་ཏུ་སྣམ་བུའི་རྣམ་པ་བྱའོ།