དེའི་འོག་ཏུ་རིག་སྔགས་འཆང་གིས་ལས་ཐམས་ཅད་ཀྱི་དངོས་གྲུབ་བླ་ན་མེད་པའོ། །རྒྱལ་བ་རིགས་བཞིའི་ཡོངས་སུ་བསྐོར་བའི་དཀྱིལ་འཁོར་དུ་ཞུགས་པ་དེ་དག་ཐམས་ཅད་ནི། འགྲོ་བ་བཟང་པོར་སྐྱེ་བར་འགྱུར་རོ། །དེ་བཞིན་དུ་བདེ་བ་ཅན་དུ། འོད་དཔག་མེད་ཀྱི་སྤྱན་སྔར་པདྨ་ལས་བརྫུས་ཏེ་སྐྱེ་བར་ཐེ་ཙོམ་མེད་དོ། །ལྷའི་གཟུགས་ཤིན་ཏུ་མཛེས་པ་རྒྱན་ཐམས་ཅད་ཀྱིས་རྣམ་པར་བརྒྱན་པ། འཇིག་རྟེན་ལས་འདས་པའི་དངོས་གྲུབ་ཆེན་པོ་ཐོབ་པར་འགྱུར་ཏེ། འདི་ལ་ཐེ་ཙོམ་མི་བྱའོ། །འཇིག་རྟེན་པའི་དཀྱིལ་འཁོར་གྱི་དངོས་གྲུབ་བླ་ན་མེད་པ་དང་། ཆོ་ག་ཞིབ་མོའི་དངོས་གྲུབ་དང་། ཕྱག་རྒྱའི་དངོས་གྲུབ་དང་། ཁྲོ་བོའི་རྒྱལ་པོ་དངོས་གྲུབ་བླ་ན་མེད་པ་དང་། སྡིག་པ་དང་། སྒྲིབ་པ་ཐམས་ཅད་སེལ་བ་དང་། མོད་ལ་གདུག་པ་ཐམས་ཅད་འཇིག་པ་དང་། དགྲ་ཐམས་ཅད་བཟློག་པ་དང་། མོད་ལ་ནད་ཐམས་ཅད་རབ་ཏུ་ཞི་བ་དང་། དགོས་པ་ཐམས་ཅད་དང་། ཐམས་ཅད་དུ་དངོས་གྲུབ་བླ་ན་མེད་པ་གང་ཡིན་པ་གྲུབ་པར་འགྱུར་རོ། །འཇིག་རྟེན་ཐམས་ཅད་ཀྱི་མངའ་བདག་དང་རྟག་ཏུ་དགའ་བར་འགྱུར་རོ། །དེ་རྟག་ཏུ་རྗེས་སུ་འབྲང་བར་འགྱུར་རོ། །རྟག་ཏུ་རྒྱལ་པོ་དང་། བློན་པོར་བཅས་པ་རྣམས་ཀྱིས་དུས་རྒྱུན་དུ་བླ་ན་མེད་པའི་མཆོད་པའི་གནས་སུ་འགྱུར་རོ། །གཞན་ཡང་ལྗོངས་ཐམས་ཅད་བལྟ་ཞིང་མཆོད་པས་རྗེས་སུ་འབྲང་བར་འགྱུར་རོ། །དེ་བཞིན་ཉིད་དུ་ཡང་དགེ་སྦྱོང་རྣམས་དང་། བྲམ་ཟེ་རྣམས་དང་། རྒྱལ་རིགས་དང་། རྗེའུ་རིགས་དང་། དམངས་རིགས་དང་། སྐྱེས་པ་དང་། བུད་མེད་དང་། ཁྱེའུ་དང་། བུ་མོ་ཐམས་ཅད་ཀྱང་དགའ་བར་འགྱུར་རོ། །རྟག་ཏུ་ཚིག་བཙན་པ་དང་། རྟག་ཏུ་ལྷ་རྣམས་ཀྱིས་མངོན་པར་བསྲུངས་པ་དང་། སྐབས་གསུམ་གྱི་དབང་པོ་དང་། རྡོ་རྗེ་འཆང་བ་ཉིད་དང་། རྡོ་རྗེ་སྙིང་པོ་བདག་ཉིད་ཆེན་པོ་དང་། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་དང་། གཞོན་ནུ་དང་། དགའ་བྱེད་དབང་ཕྱུག་དང་། གཤིན་རྗེ་དང་། ཆུ་ལྷ་ཉིད་དང་། དེ་བཞིན་དུ་རྒྱལ་པོ་ཆེན་པོ་བཞི་རྣམས་རྟག་ཏུ་རྗེས་སུ་འབྲང་བར་འགྱུར་རོ། །ཁྲོ་བོའི་དཀྱིལ་འཁོར་དུ་ཞུགས་ཤིང་མཐོང་བ་ལ་ཡང་དུས་རྟག་ཏུ་སྲུང་བ་དང་། རྗེས་སུ་འབྲང་བར་འགྱུར་ཏེ་ཐེ་ཙོམ་མི་བྱའོ།