ཞབས་བསིལ་གྱི་སྣོད་དང་། རིན་པོ་ཆེ་སྣ་བདུན་རབ་ཏུ་དགྲམ་མོ། །དྲིའི་ཆུས་བཀང་བའི་བུམ་པ་དང་། ལེགས་པར་བརྒྱན་པའི་བུམ་པ་བྱས་ནས། མཁས་པས་དར་བཟང་པོ་བཅིངས་ཏེ། དབུས་ཀྱི་དཀྱིལ་འཁོར་དུ་གཞག་པར་བྱའོ། །སྒོ་བཞིར་དྲི་ཆབ་ཀྱིས་གང་བའི་བུམ་པ་དར་གྱིས་བཅིངས་པ་གཞག་པར་བྱའོ། །མཁས་པས་སྒོ་དང་། སྒོ་རུ་ནི། བུ་རམ་དང་། ཤ་ཁ་ར་དང་། སྦྲང་རྩིའི་རོ་དང་། གཏོར་མ་གཞག་པར་བྱའོ། །མདུང་རྩེ་གསུམ་ལ། ཞོ་དང་། འོ་མ་དང་། ཟན་དང་། མཆོག་གི་བཟའ་བ་མ་ཉམས་པས། ཤིན་ཏུ་མཛེས་པའི་གཏོར་མ་གཞག་པར་བྱའོ། །དེ་བཞིན་དུ། འཁུར་བ་དང་། འཁུར་བ་ཟླུམ་པོ་ཉིད་དང་། སྣུམ་འཁུར་དང་། བེ་ཊི་མ་ཀ་དང་། ས་རཱའི་ལ་དུ་དང་། མུད་གའི་ལ་དུ་དང་། ཧྭགས་དང་། ཁ་ཡྻཱ་ནི་བཟང་པོ་རྣམས་གཞག་པར་བྱའོ། །གཏོར་མའི་ལས་ལ། ཁོར་ཡུག་ཏུ་མེ་ཏོག་བཟང་པོ་དགྲམ་ཞིང་། ཕྲེང་བས་བརྒྱན་པར་བྱའོ། །འབྲུའི་རྣམ་པ་སྣ་ཚོགས་པ་གཞག་པར་བྱའོ། །འབྲས་བུའི་ངོ་བོ་རྣམ་པ་སྣ་ཚོགས་པ་དང་། ནེའུ་གསིང་སྔོ་བསངས་དང་། ལོ་མ་མཛེས་པ་བཀྲམ་སྟེ་གཞག་པར་བྱའོ། །ཁོར་ཡུག་ཏུ་མར་མེའི་ཕྲེང་བ་དང་། དེ་བཞིན་དུ། ཨ་ག་རུ་དང་། ཙནྡན་སྤྲྀ་ཀ་དང་། ཏུ་རུཥྐ་དང་། དཔལ་གྱིས་དཀྲིས་པ་དང་། གུ་གུལ་དང་། ཀུན་ཏུ་རུ་དང་། སྦྲང་རྩི་དང་། ཧྭགས་སྦྱར་བའི་བདུག་པ་སྟེ། བདུག་པ་འདི་དག་དབུལ་བར་བྱའོ། །དཀྱིལ་འཁོར་གྱི་ཁོར་ཡུག་ཏུ་བདུག་པ་འཐུལ་བའི་པོག་ཕོར་གཞག་པར་བྱ་སྟེ། དཀྱིལ་འཁོར་གྱི་ལྷ་ལ་བདུག་པ་དབུལ་བར་བྱའོ། །ཕྱོགས་བཅིངས་པ་དང་། དཀྱིལ་འཁོར་བཅིང་བ་བྱ་སྟེ། གཙུག་ཏོར་བཅིང་ཞིང་། བདག་སྲུང་བ་དང་། གཞན་བསྲུང་བ་བྱའོ། །དེའི་འོག་ཏུ་འཇུག་པར་བྱའོ། །རིག་སྔགས་དཀྱིལ་འཁོར་མཆོག་མཐོང་བ་དང་། ཕྱག་བྱ་ཞིང་། བསྐོར་བ་ཉིད་དང་། དམ་ཚིག་ཀྱང་སྦྱིན་པར་བྱའོ། །རྟག་ཏུ་བསང་བའི་ལས་བྱས་ཏེ། དེ་ཁོ་ན་བཞིན་དུ་གསང་སྔགས་བཟླས་པ་ཡང་བྱའོ། །དཀྱིལ་འཁོར་གྱི་ཆོ་ག་ཚད་མ་ལས། ད་གོས་པ་འདི་དག་ཐམས་ཅད་བྱས་ནས། དེའི་འོག་ཏུ་རིག་སྔགས་འཆང་གིས་ལས་ཐམས་ཅད་ཀྱི་དངོས་གྲུབ་བླ་ན་མེད་པའོ།