འཕགས་པ་དོན་ཡོད་པའི་ཞགས་པའི་ཆོ་ག་ཞིབ་མོའི་རྒྱལ་པོ། བམ་པོ་བཅྭ་ལྔ་པ། དེ་ནས་གསང་སྔགས་ལ་འཇུག་པ་རྣམས་ཀྱི་དགོས་པ་ཐམས་ཅད་སོ་སོར་འགྲུབ་པར་འགྱུར་བ་ནི། ཨོྃ་ཞེས་བྱ་བ་དོན་ཡོད་པའི་ཞགས་པ་པདྨ་གཙུག་ཏོར་གྱི་དཀྱིལ་འཁོར་ཐམས་ཅད་དུ་གསང་སྔགས་ཡི་གེ་གཅིག་པའོ། །འཇིག་རྟེན་མགོན་པོའི་སྤྱན་སྔར་འབུམ་དྲན་པར་བྱས་ན་ས་དང་པོ་ལ་གནས་པར་འགྱུར་རོ། །སྔོན་གྱི་སྡིག་པ་བསགས་པ་སེམས་ཅན་དམྱལ་བ་མི་བཟད་པ་གང་ཅི་ཡང་རུང་བ་དེ་དག་ཐམས་ཅད་ཇི་ལྟར་རླུང་གིས་ཕྱག་དར་གཏོར་བ་བཞིན་འཇིག་པར་འགྱུར། དངོས་གྲུབ་ཐམས་ཅད་ཐོབ་པར་འགྱུར་རོ། །དོན་ཐམས་ཅད་རྗེས་སུ་འཇུག་པར་འགྱུར། དེ་བཞིན་གཤེགས་པ་ཐམས་ཅད་དང་། གང་དཀྱིལ་འཁོར་གྱི་ལྷ་གཞན་དག་ཀྱང་དགྱེས་པར་འགྱུར་ལ། འཕགས་པ་སྤྱན་རས་གཟིགས་དབང་ཕྱུག་རྟག་ཏུ་མཆོག་སྦྱིན་པ་མཛད་དོ། །གསང་སྔགས་ཨོྃ་ཞེས་བྱ་བ་དྲན་ནས་ཚེ་འཕོས་པ་ནི་འཇིག་རྟེན་གྱི་ཁམས་བདེ་བ་ཅན་དུ་འགྲོ་བར་འགྱུར་རོ། །གསང་སྔགས་ཀྱི་ཡི་གེ་གཅིག་པའོ། །ཨོྃ་བྷུ་ཡི་གེ་གཉིས་པ་འབུམ་བཟླས་བརྗོད་བྱས་ན་ས་གཉིས་པ་འཐོབ་པར་འགྱུར། དེ་བཞིན་གཤེགས་པ་སྣང་བ་མཐའ་ཡས་ཀྱི་སྤྱན་སྔར་འདུག་པར་འགྱུར་ཞིང་མཆོག་ཐམས་ཅད་རྗེས་སུ་སྦྱིན་པར་མཛད། སྡིག་པ་ཐམས་ཅད་ཀྱང་རྣམ་པར་དག་པར་མཛད། སྔོན་གྱི་ནད་ཀྱང་སོས་པར་འགྱུར། ནོར་གྱི་དབང་ཕྱུག་ནོར་བུ་བཟང་པོའི་བུ་དབང་དུ་འགྱུར་ཞིང་ཉེ་བར་གནས་པར་འགྱུར་རོ། །མི་གང་གིས་ཀྱང་ཕྱིར་ཞིང་བར་ཆད་བྱེད་ནུས་པར་མི་འགྱུར། ཚེ་འཕོས་ནས་རི་གྲུ་འཛིན་དུ་སྐྱེ་བར་འགྱུར། དོན་ཡོད་པའི་ཞགས་པའི་དངོས་གྲུབ་ཀྱང་ཐོབ་པར་འགྱུར་རོ། །ཨོྃ་པདྨེ་གསང་སྔགས་ཀྱི་ཡི་གེ་གསུམ་པ་འབུམ་བཟླས་བརྗོད་བྱས་ནས་གསུམ་པ་ལ་ཡང་དག་པར་འཇུག་པར་འགྱུར། པདྨ་ཡངས་པའི་དཀྱིལ་འཁོར་གྱི་ཕྱག་རྒྱ་དང་། གསང་སྔགས་གང་ཡིན་པ་ཐམས་ཅད་ལ་ཞུགས་པར་འགྱུར།