།གནོད་སྦྱིན་དང་། སྲིན་པོ་དང་། འབྱུང་པོ་དང་། གཟའ་དང་། བརྗེད་བྱེད་དང་། མི་བཟད་པ་དེ་རྣམས་ཐམས་ཅད་ཁྲོ་བོའི་རྒྱལ་པོ་དྲན་པ་ཙམ་གྱིས་འཇིགས་པར་འགྱུར་རོ། །ཁྲོ་བོའི་རྒྱལ་པོའི་གསང་བ་ཐམས་ཅད་ཀྱི་རིགས་ཀྱི་དམ་ཚིག་ལ་གནས་པ་དང་། དཀྱིལ་འཁོར་དུ་ཕྱག་རྒྱ་གནས་པ་དང་། གསང་སྔགས་ཀྱི་ལྷ་གཞན་གང་ཡིན་པ་རྣམས་ཀྱིས་ཁྲོ་བོའི་རྒྱལ་པོ་དྲན་པ་ཙམ་གྱིས་དེ་རྣམས་ཐམས་ཅད་རིག་སྔགས་འཆང་ལ་སྐྱབས་སུ་འགྲོ་བར་བྱེད་དོ། །དེ་རྣམས་ཐམས་ཅད་རྗེས་སུ་འབྲང་བར་འགྱུར་ཞིང་གནས་པར་བྱེད་དོ། །འགའ་ཞིག་གང་དུ་འགྲོ་བའམ་འདུག་པ་དེ་ལ་དབང་པོ་དང་། སྐབས་གསུམ་པའི་ལྷ་དང་། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་དང་། གཤིན་རྗེ་དང་། ཆུ་ལྷ་དང་། ཀླུའི་རྒྱལ་པོ་རྒྱ་མཚོ་དང་། དགའ་བོ་དང་། ཉེ་དགའ་བོ་དང་། གཞོན་ནུ་དང་། སྡེ་དཔོན་དང་། དེ་བཞིན་དུ་རྒྱལ་པོ་ཆེན་པོ་བཞི་དུས་རྟག་ཏུ་རིག་སྔགས་འཆང་གི་རྗེས་སུ་འབྲང་བར་བྱེད་དོ། །ཐེ་ཚོམ་མེད་དོ། །ཁྲོས་པའི་ལས་རྣམས་སམ། དེ་བཞིན་དུ་དྲག་པོའི་ལས་རྣམས་ཐམས་ཅད་ཀྱང་ཧཱུཾ་ཡིག་ཙམ་གྱིས་དེ་ལ་དངོས་གྲུབ་མཐོང་ངོ་། །ཕྱིར་རྒོལ་བ་དང་། དགྲ་དང་། སེམས་ཅན་མ་རུངས་པ་ཤིན་ཏུ་མི་བཟད་པ་རྣམས་དང་། ཕ་རོལ་གྱི་དམག་ཚོགས་དང་འཇིགས་པ་དང་། རྣམ་པར་འགྲས་པའི་སྐྱེ་བོ་དང་། སྡིག་པ་དེ་རྣམས་ཐམས་ཅད་ཧཱུཾ་ཡིག་གིས་མཆོག་ཏུ་གཟིར་བ་ཙམ་གྱིས་ཐལ་བར་འཇིག་པར་འགྱུར་རོ། །སྡང་བ་དང་། ངན་སེམས་པའི་སེམས་ཅན་དང་། བྱས་པ་མི་གཟོ་བ་དང་། བྱས་པ་ལ་འཁོན་པ་ཐམས་ཅད་དྲག་པོའི་ཧཱུཾ་ཡིག་བཟླས་པ་ཙམ་གྱིས་སྐད་ཅིག་ལ་བསྲེག་སྟེ། དཔེར་ན་མེ་ཡིས་ཕྱེ་མ་ལེབ་བཞིན་ནོ། །ལས་གཞན་སྟོང་ཕྲག་རྣམས་དང་། ལས་བརྒྱ་སྟོང་ཕྲག་ཉིད་བཟླས་པ་ཙམ་གྱིས་འགྲུབ་སྟེ། དྲན་པ་ཙམ་གྱི་མོད་ལ། ལས་ཐམས་ཅད་འགྲུབ་བོ། །དེ་ནས་དོན་ཡོད་པ་པདྨའི་གཙུག་ཏོར་དྲན་པ་ཙམ་གྱིས། བྱ་བ་ཐམས་ཅད་ནི་གཉིས་སུ་འགྱུར་ཏེ། ཇི་ལྟར་གང་ཅུང་ཟད་ཡིད་ལ་བྱེད་པས་ལས་བྱེད་དོ། །དཀྱིལ་འཁོར་རམ། གནས་རྣམ་པ་གཞན་ཐམས་ཅད་དུ། ཇི་ལྟར་ཡིད་ལ་བྱེད་པའི་བྱ་བ་ཐམས་ཅད་དུ་བྱེད་དོ།། །།