སེམས་ངན་པ་ཡོངས་སུ་སྤང་བར་བྱའོ། །ཆང་དང་། ཤ་དང་། བེག་བཙོང་དང་། སྒོག་སྐྱ་དང་། ཀེའུ་དང་འདྲེས་པ་ཡོངས་སུ་སྤང་བར་བྱའོ། །ཉི་མ་རེ་རེ་ཞིང་བའི་རྣམ་ལྔ་ལ་རེག་པར་བྱའོ། །དྲི་མ་དང་བྲལ་ཞིང་སེར་སྣ་དང་། ཕྲག་དོག་དང་བྲལ་བར་བྱའོ། །བྱམས་པ་དང་། སྙིང་རྗེའི་ལྷག་པའི་བསམ་པ་དང་། དཀོན་མཆོག་གསུམ་ལ་དང་བ་ལྷག་པར་བྱ་སྟེ་རས་ཀྱི་སྐུ་གཟུགས་བྲི་བར་བྱའོ། །ག་པུར་དང་། གླ་རྩིས་བསྒོས་པའི་ཚོན་སྣ་ཚོགས་ཀྱིས་བྲི་བར་བྱའོ། །དབེན་ཞིང་འདུ་འཛི་ཡོངས་སུ་སྤང་བར་བྱའོ། །རྨུགས་པ་དང་། གཉིད་ཡོངས་སུ་སྤང་བར་བྱའོ། །དེ་ལྟར་རི་མོ་བྲི་བ་ནི་ལས་ལེགས་པར་བྱས་པ་ཡིན་ནོ། །ཟླ་བ་ཡར་གྱི་ངོ་ལ་བྲི་བར་བྱའོ། །རྒྱུ་སྐར་ཤིན་ཏུ་བཀྲ་ཤིས་པ་དང་། ཚེས་གྲངས་དང་ཉི་མ་ཤིན་ཏུ་བཀྲ་ཤིས་པ་ལ་བརྩམ་པར་བྱའོ། །རྒྱུ་སྐར་རྒྱལ་ནི་བཀྲ་ཤིས་པ་ཡིན་ཏེ་དེ་བཞིན་གཤེགས་པ་ཐམས་ཅད་ཀྱིས་བསྔགས་པ། བྱང་ཆུབ་སེམས་དཔའ་ཐམས་ཅད་ཀྱིས་བྱིན་གྱིས་བརླབས་པ། ལྷ་ཐམས་ཅད་ཀྱིས་རྗེས་སུ་བཟུང་བ་ཡིན་ནོ། །རིགས་ཀྱི་བུ་དང་། རིགས་ཀྱི་བུ་མོ་དང་། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དང་། དགེ་སྦྱོང་དང་། བྲམ་ཟེ་དང་། རྒྱལ་རིགས་དང་། རྗེའུ་རིགས་དང་། དམངས་རིགས་དང་། བུད་མེད་དང་། སྐྱེས་པ་དང་། ཁྱེའུ་དང་། བུ་མོ་གང་ལ་ལ་ཞིག་དོན་ཡོད་པའི་ཞགས་པའི་སྙིང་པོ་བྱང་ཆུབ་སེམས་དཔའ་ཐམས་ཅད་ཀྱིས་ཕྱག་བྱས་པ། དེ་བཞིན་གཤེགས་པ་ཐམས་ཅད་རྣམ་པར་གཟིགས་པ། བྱང་ཆུབ་ཆེན་པོའི་དཀྱིལ་འཁོར་གསང་བ། རྣམ་པར་གྲོལ་བའི་དཀྱིལ་འཁོར་གསང་བ། རས་ཀྱི་སྐུ་གཟུགས་ཆེན་པོ་མཐོང་བ་ནི་སྐུ་གཟུགས་མཐོང་བ་ཙམ་གྱི་མོད་ལ་སྡིག་པ་དང་སྒྲིབ་པ་ཐམས་ཅད་ལས་རྣམ་པར་གྲོལ་བར་འགྱུར་རོ། །མཚམས་མེད་པ་ལྔ་བྱེད་པ་དང་། མཚམས་མེད་པ་ལ་གཞོལ་བ་དང་། དམ་པའི་ཆོས་ཡོངས་སུ་སྤོང་བ་དང་། འཕགས་པ་ལ་སྐུར་པ་འདེབས་པ་དང་། སངས་རྒྱས་དང་། བྱང་ཆུབ་སེམས་དཔའ་དང་། ཉན་ཐོས་དང་། རང་སངས་རྒྱས་ཐམས་ཅད་སྤོང་བར་བྱེད་པ་རྣམས་ཀྱང་མཐོང་བ་ཙམ་ལ་སོགས་པས་སྡིག་པ་ཐམས་ཅད་ཕྱེ་མར་རློག་གོ།