ཀུན་ཏུ་ཁྲོ་བོའི་ཕྱག་རྒྱའི་སྙིང་པོ་འདི་ལན་བདུན་སྨྱུང་བར་གནས་པའི་ཆོ་གས་མཆོད་པ་བྱེད་ཅིང་བཟླས་པ་འབུལ་བར་བྱེད་ཅིང་དབང་སྐུར་བར་བྱེད་པ་དེ་ནི་མཐོང་བའི་ཆོས་ཉིད་ལ་དེ་བཞིན་གཤེགས་པའི་ལུས་སུ་རིག་པར་བྱའོ། །དེ་བཞིན་གཤེགས་པའི་ཆོས་ཉིད་དངོས་སུ་མཐོང་སྟེ། དེ་བཞིན་གཤེགས་པའི་མཛོད་ལག་ཏུ་སོན་པར་འགྱུར་ཏེ་ཡིད་ཀྱིས་ཐེ་ཚོམ་མི་བྱའོ། །འཁོན་དང་དྲེགས་པ་ཐམས་ཅད་ཡོངས་སུ་སྤངས་པས་བྱ་སྟེ། སྙིང་རྗེ་ཆེན་པོས་ཡོངས་སུ་བཟུང་བས་སེམས་ཅན་དེ་རྣམས་ཐམས་ཅད་ཀྱི་མཐར་ཐུག་པར་འགྱུར་བར་བྱ་ཞིང་བཟླས་པ་སྦྱིན་པར་བྱའོ། །གང་ཡང་དོན་ཡོད་པའི་དཀྱིལ་འཁོར་ཆེན་པོ་འཆད་པར་བྱེད་པ་དང་། མཐོང་བ་དང་། ལྟ་བར་བྱེད་པ་དང་། རས་རིས་ཆེན་པོ་འདི་ལྟ་བར་བྱེད་པ་དེ་ནི་དེ་བཞིན་གཤེགས་པ་དེ་རྣམས་ཐམས་ཅད་ཀྱི་སངས་རྒྱས་ཀྱི་ཞིང་ཕྱོགས་བཅུ་ཀུན་ཏུ་གང་གཱའི་ཀླུང་གི་བྱེ་མ་དང་མཉམ་པའི་སངས་རྒྱས་ཀྱི་ཞིང་རྣམས་སུ་རྗེས་སུ་ཞུགས་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་གསང་བ་དམ་ཚིག་ཆེན་པོའི་སྙིང་པོ་རབ་ཏུ་ཞུགས་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་སྐུ་མཐོང་བར་འགྱུར་རོ། །ཁྲོ་བོའི་རྒྱལ་པོ་འདིས་དབང་བསྐུར་བས་དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བར་འགྱུར་རོ། །དེ་ལྟར་ཡོན་ཏན་དང་། ཕན་ཡོན་ཆེན་པོ་དང་། བསོད་ནམས་ཀྱི་ཕུང་པོ་ཆེན་པོ་དང་ལྡན་པར་འགྱུར་རོ། །དགེ་བའི་རྩ་བ་ཆེན་པོ་ཡོངས་སུ་འཛིན་པར་འགྱུར་རོ། །དེ་བཞིན་དུ་ཕན་ཡོན་ཆེན་པོ་དང་། མཐུ་ཆེན་པོ་དང་། ཡོན་ཏན་ཆེན་པོ་བསྐྱེད་པར་བྱ་བ་ཆོ་ག་ཞིབ་མོའི་རྒྱལ་པོ་ཆེན་པོའི་ཆོ་ག་སྟེ། ཆོ་ག་ཞིབ་མོའི་རྒྱལ་པོ་ཆེན་པོ་འདི་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གི་མིང་འཛིན་པ་དང་མཐོང་བ་ཙམ་གྱིས་མཐོང་བའི་ཆོས་ཉིད་ལ་ཆོ་འཕྲུལ་ཆེས་ཆེ་བ་དང་། དེ་བཞིན་གཤེགས་པའི་བྱིན་གྱིས་རློབ་པ་བལྟ་བ་འདི་དག་མཚུངས་སོ། །ཆོ་ག་ཞིབ་མོའི་རྒྱལ་པོའི་དཀྱིལ་འཁོར་དང་། སྙིང་པོ་དང་། ཕྱག་རྒྱ་དང་། གཟུངས་དང་། དོན་ཡོད་པའི་རྒྱལ་པོའི་རྣམ་པར་འཕྲུལ་པ་གླེགས་བམ་དུ་བྲིས་པ་ལྟ་བར་བྱེད་པ་འདི་དག་མཚུངས་སོ། །དེ་བཞིན་གཤེགས་པ་གང་གཱའི་ཀླུང་གི་བྱེ་མ་བྱེ་བ་བརྒྱ་སྟོང་ཕྲག་དང་མཉམ་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཁྲག་ཁྲིག་བརྒྱ་སྟོང་ཕྲག་རྣམས་མཐོང་བར་འགྱུར་རོ།