སྒྲིབ་པ་ཐམས་ཅད་ཡོངས་སུ་གྲོལ་ཏེ། འཇིགས་པ་ཐམས་ཅད་ཞི་བར་འགྱུར་རོ། །དམྱལ་བའི་འཇིགས་པ་ཆེན་པོ་ལས་འདོན་ཅིང་ཡོངས་སུ་གྲོལ་བར་འགྱུར་རོ། །འཇིག་རྟེན་དང་འཇིག་རྟེན་ལས་འདས་པ་རྣམས་སྡིག་པ་ཐམས་ཅད་དང་། དམྱལ་བའི་སྡུག་བསྔལ་གྱི་ཚོར་བ་མྱོང་བའི་ལས་ཀྱི་སྒྲིབ་པ་རྣམས་ཡོངས་སུ་ཟད་ཅིང་ཡོངས་སུ་གཏུགས་པར་འགྱུར་རོ། །དེ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱིས་ཡོངས་སུ་འཛིན་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱིས་ལུང་བསྟན་པར་འགྱུར་རོ། །ལན་བདུན་ཐོས་པ་ཙམ་གྱིས་སེམས་ཅན་དེ་རྒལ་བར་འགྱུར་རོ། །ཚོགས་ཆེན་པོ་བསགས་པ་དང་། དེ་བཞིན་གཤེགས་པས་དབུགས་ཕྱུང་བ་ཡིན་ནོ། །བྱང་ཆུབ་ཀྱི་ས་བོན་ཡོངས་སུ་རྫོགས་པར་འགྱུར་རོ། །སྤྱན་རས་གཟིགས་དབང་ཕྱུག་འོན་ཀྱང་སེམས་ཅན་འདི་དག་ནི་འཕགས་པ་སྤྱན་རས་གཟིགས་དབང་ཕྱུག་དོན་ཡོད་ཞགས་པའི་སྙིང་པོ་དཀྱིལ་འཁོར་དང་། ཕྱག་རྒྱ་རིམ་པར་ཕྱེ་བ་དང་བཅས་པའི་ཆོ་ག་ཞིབ་མོ་མཐའ་དག་རྫོགས་པར་ཉན་པར་བྱེད་པ་དང་། ཀློག་པར་བྱེད་པ་དང་། འཆང་དུ་འཇུག་པ་དང་། འདོན་དུ་འཇུག་པ་དང་། མཆོད་པར་བྱེད་པ་དང་། འདྲི་བར་བྱེད་པ་དང་། འདྲིར་འཇུག་པ་དང་། མཆོད་པ་ཆེན་པོ་བྱེད་པ་དེའི་སེམས་ཅན་དེ་རྣམས་ཕྱིར་མི་ལྡོག་པར་རིག་པར་བྱ་སྟེ། འདི་ལ་ཐེ་ཚོམ་དང་། དོགས་པ་བསྐྱེད་པར་མི་བྱའོ། །འོན་ཀྱང་རིལ་བུ་དང་། མིག་སྨན་དང་། བདུག་པ་ལག་ཏུ་ཐོགས་པར་འགྱུར་བ་དེའི་སེམས་ཅན་དེ་རྣམས་ཆེར་དག་ཅིང་ཀུན་ནས་ཕྱོགས་བཅུ་རྣམས་སུ་དེ་བཞིན་གཤེགས་པ་ཐམས་ཅད་ཀྱིས་ཡོངས་སུ་འཛིན་པར་འགྱུར་རོ། །དེ་བཞིན་གཤེགས་པ་ཐམས་ཅད་མཉེས་པར་བྱས་པར་འགྱུར་རོ། །ཕྱག་ན་པདྨ་དང་། རིགས་ཀྱི་བུའམ་རིགས་ཀྱི་བུ་མོའམ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་དོན་ཡོད་ཞགས་པའི་སྙིང་པོ་དང་། ཀུན་ཏུ་ཁྲོ་བོའི་ཕྱག་རྒྱའི་སྙིང་པོ་འདི་ལན་བདུན་སྨྱུང་བར་གནས་པའི་ཆོ་གས་མཆོད་པ་བྱེད་ཅིང་བཟླས་པ་འབུལ་བར་བྱེད་ཅིང་དབང་སྐུར་བར་བྱེད་པ་དེ་ནི་མཐོང་བའི་ཆོས་ཉིད་ལ་དེ་བཞིན་གཤེགས་པའི་ལུས་སུ་རིག་པར་བྱའོ།