ཚུལ་བཞིན་དུ་ཡིད་ལ་བྱེད་པས་སྒོམ་པར་བྱེད་པ་དང་། ཉན་པར་བྱེད་པ་དང་། ཐ་ན་རྣ་བའི་བུ་གར་ཡང་སྒྲ་ལྷུང་བར་འགྱུར་བ་དེ་ལ་བདག་གིས་བཅོམ་ལྡན་འདས་རྟག་ཏུ་དུས་ཐམས་ཅད་དུ་རྒྱུན་རྗེས་སུ་འབྲང་བར་བགྱི། འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཀྱི་མཆོག་ཐམས་ཅད་དང་བཀྲ་ཞིང་རྣམ་པར་བཀྲ་བའི་ལྷ་རྫས་ཐམས་ཅད་རྗེས་སུ་སྩལ་བར་བགྱིའོ། །ཆོ་ག་ཞིབ་མོ་ཆེན་པོ་སྒྲུབ་པར་བྱེད་པ་རྣམས་ཕྱིར་མི་ལྡོག་པའི་གནས་ལ་དགོད་པར་བགྱི། ཐ་ན་དུད་འགྲོའི་སྐྱེ་གནས་སུ་སོང་བའི་རི་དགས་དང་བྱ་རྣམས་ཀྱིའང་སྒྲ་གྲག་པ་རྣ་བའི་བུ་གར་ལྷུང་བ་ཙམ་ལས་ཕྱིར་མི་ལྡོག་པའི་གནས་ལ་རབ་ཏུ་འཇུག་པར་བགྱི། བཅོམ་ལྡན་འདས་ཅི་སླར་ཡང་ཡོངས་སུ་དག་པའི་ཡིད་ཀྱིས་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ལ་རྟག་ཏུ་ཡང་དག་པར་གནས་པས་དོན་ཡོད་ཞགས་པའི་སྙིང་པོ་འདི་སྒྲུབ་པར་བྱེད་པ་དང་། ཀློག་པར་བྱེད་པ་དང་། དཀྱིལ་འཁོར་དང་། ཕྱག་རྒྱ་དང་། ཆོ་ག་ཞིབ་མོའི་རྒྱལ་པོ་སྒྲུབ་པར་བྱེད་པ་དང་། འཆང་བར་བྱེད་པ་དང་། འདོན་པར་བྱེད་པ་དང་། ཐུན་མཚམས་གསུམ་གྱི་གནས་སུ་གནས་པས་རྗེས་སུ་དྲན་པར་བྱེད་པ་དང་། ཉིན་དང་མཚན་མོར་རི་མོར་བྱེད་པ་འདི་རྣམས་བཅོམ་ལྡན་འདས་མིའི་ལུས་སུ་མི་འགྱུར་ཏེ། མིའི་ལུས་དག་པའི་ལུས་སུ་རིག་པར་བྱ། ལྷ་ཞེས་བྱ་བའི་ལུས་སུ་རིག་པར་བྱའོ། །བཅོམ་ལྡན་འདས་བདག་གིས་རྟག་པར་རྒྱུན་དུ་ཕྲག་པས་ཡོངས་སུ་བཀུར་བར་བགྱི། བཅོམ་ལྡན་འདས་བདག་གི་སྤྱི་བོར་སོན་པ་བཟུང་བར་བགྱི། བཅོམ་ལྡན་འདས་གང་གི་སླད་དུ་ཞེ་ན། བཅོམ་ལྡན་འདས་ལྷའི་ལུས་འདི་ནི་མིའི་ལུས་སུ་རིག་པར་བགྱི་བ་མ་ལགས་སོ། །གང་གི་སླད་དུ་ཞེ་ན་བཅོམ་ལྡན་འདས་དོན་ཡོད་པའི་ཞགས་པའི་སྙིང་པོ་འདི། མིའི་ལུས་ཀྱི་སྙིང་དང་། ནང་གི་ཡིད་ལ་གནས་པ་དེས། དེའི་མཐུས་དོན་ཡོད་ཞགས་པའི་སྙིང་པོ་ཆེན་པོའི་མཐུ་ཡིས། མིའི་ལུས་དག་པའི་ལྷའི་ལུས་སུ་འགྱུར་ཏེ། ལྷའི་ལུས་སུ་རིག་པར་བྱའོ། །འཇིག་རྟེན་དབང་ཕྱུག་གི་ལུས་སུ་རིག་པར་བྱའོ། །ཡིད་བཞིན་གྱི་ནོར་བུ་རིན་པོ་ཆེའི་ལུས་སུ་རིག་པར་བྱའོ།