།བཅོམ་ལྡན་འདས་ཕྱོགས་བཅུའི་སེམས་ཅན་ཐམས་ཅད་དང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སྲོག་ཆགས་སུ་གྱུར་པ་ཇི་སྙེད་རི་དགས་དང་བྱ་ཇི་སྙེད་པ་དེ་དག་ཐམས་ཅད་བདག་གིས་ཡོངས་སུ་གཟུང་བར་བགྱི་ཞིང་། སྡུག་བསྔལ་ཐམས་ཅད་ལས་ཡོངས་སུ་ཐར་བར་བགྱི་བ་དང་བྱང་ཆུབ་ཆེན་པོའི་ལམ་ལ་འགོད་པའི་ཕྱིར་སྙིང་རྗེ་ཆེན་པོ་རྣམ་པར་དག་པས་རྗེས་སུ་གཟུང་བར་བགྱིའོ། །བཅོམ་ལྡན་འདས་མངོན་པར་བརྩོན་པ་དེ་དག་ནི་ཐམས་ཅད་ཀྱི་མཆོག་ཏུ་ཡོངས་སུ་གྲོལ་བར་བགྱིའོ། །བཅོམ་ལྡན་འདས་ཡང་དག་པར་འགྲུབ་པར་བྱེད་པའི་རིག་པ་འཛིན་པ་ཐམས་ཅད་ཀྱིས་བདག་དྲན་ན། བཅོམ་ལྡན་འདས་སེམས་ཅན་དེ་ནི་བདག་གིས་རྟག་ཏུ་བལྟ་བར་བགྱིའོ། །རྟག་ཏུ་རྗེས་སུ་དྲན་པ་དང་རྟག་ཏུ་རྗེས་སུ་བསྲུང་བར་བགྱིའོ།། །།འཕགས་པ་དོན་ཡོད་པའི་ཞགས་པའི་ཆོ་ག་ཞིབ་མོའི་རྒྱལ་པོ། བམ་པོ་བཅུ་གཉིས་པ། བཅོམ་ལྡན་འདས་འོན་ཀྱང་དོན་ཁྱད་པར་ཅན་གྱི་ཆེད་དུ། དོན་ཡོད་ཞགས་པའི་སྙིང་པོའི་ཆོ་ག་ཞིབ་མོ་འདི། ཀློག་པ་དང་། སྒྲུབ་པ་དང་། རེག་པ་དང་། མཆོད་པར་བྱེད་པ་ལ་མངོན་པར་བརྩོན་པ་དེ་བདག་ཅག་གིས་བཅོམ་ལྡན་འདས་ཀྱི་ཐུགས་ལས་སྐྱེས་པའི་སྲས་ལྟ་བུར་ཡོངས་སུ་བསྐྱང་བར་བགྱི། ཕྲག་པས་ཡོངས་སུ་བཀུར་བར་བགྱིའོ། །བཅོམ་ལྡན་འདས་དེ་བཞིན་ཉིད་དུ་སེམས་ཅན་ཐམས་ཅད་སྙིང་རྗེ་ཆེན་པོས་ཡོངས་སུ་བཟུང་སྟེ། ཡོངས་སུ་ཐར་པའི་དོན་གྱི་ཆེད་དང་། མཆོག་སྦྱིན་པ་ཡོངས་སུ་རྫོགས་པའི་ཆེད་དང་། རེ་བ་དང་། ཡིད་ཀྱི་ཤིང་རྟ་ཐམས་ཅད་ཡང་དག་པར་དགོངས་པའི་ཆེད་དུ་བདག་གིས་བཅོམ་ལྡན་འདས་ལ་ལྟོས་པ་མེད་པར་བགྱིའོ། །བདག་བཅོམ་ལྡན་འདས་ཀྱི་ཚིམ་པ་མེད་པ་དང་། སེམས་ཅན་ཐམས་ཅད་ཡོངས་སུ་གྲོལ་བའི་ཆེད་དང་། མཆོག་སྦྱིན་པའི་ཆེད་དང་། སྲུང་བའི་ཆེད་དང་། ཐམས་ཅད་ལ་བྱང་ཆུབ་མཆོག་གི་ལམ་ལ་རབ་ཏུ་དགོད་པའི་ཆེད་དང་། བཅོམ་ལྡན་འདས་ཁྱད་པར་དུ་ཆོ་ག་ཞིབ་མོའི་རྒྱལ་པོ་འདི་ལ་གལ་ཏེ་ཀློག་པ་དང་། སྒྲུབ་པ་དང་། དཀྱིལ་འཁོར་དང་། ཕྱག་རྒྱ་ལ་མངོན་པར་བརྩོན་པར་བྱེད་པ་དང་། འཆང་བར་བྱེད་པ་དང་། འདོན་པར་བྱེད་པ་དང་། མཆོད་པར་བྱེད་པ་དང་། ཀུན་ཆུབ་པར་བྱེད་པ་དང་། ཚུལ་བཞིན་དུ་ཡིད་ལ་བྱེད་པས་སྒོམ་པར་བྱེད་པ་དང་།