།གང་བསྒོ་བ་དེ་བྱེད་པར་འགྱུར་རོ། །དེ་ཉིད་བླ་མར་འགྱུར་ཞིང་ཆེར་བརྗོད་པར་འགྱུར་རོ། །བརྒྱ་རྩ་བརྒྱད་ལན་གཉིས་བཟླས་པས་བརྒྱ་བྱིན་དང་། ཚངས་པ་དང་། ཁྱབ་འཇུག་པ་དང་། དབང་ཕྱུག་ཆེན་པོ་དང་། གཤིན་རྗེ་དང་། ཆུ་ལྷ་དང་། རླུང་ལྷ་ལ་སོགས་པ་དབང་དུ་འགྱུར་ཞིང་། བསྒོ་བ་བཞིན་བྱེད་པར་འགྱུར་རོ། །གང་བསྒོ་བ་བྱེད་པར་འགྱུར་རོ། །རྒྱལ་པོ་བཞི་འཁོར་གནོད་སྦྱིན་གྱི་ཚོགས་དང་བཅས་པ་རྣམས་དབང་དུ་འགྱུར་རོ། །བརྒྱ་རྩ་བརྒྱད་ལན་གསུམ་དུ་བཟླས་པས་ཉི་མ་དང་ཟླ་བ་ནམ་མཁའ་ལས་འབབ་ཅིང་མདུན་ན་འདུག་པར་འགྱུར་རོ། །མཚན་མོའི་ལྷ་དང་ནམ་མཁའི་ལྷ་འོངས་ནས་མདུན་ན་འདུག་པར་འགྱུར་ཞིང་དབང་དུ་འགྱུར་རོ། །ཐམས་ཅད་ཅི་བགྱི་ཞེས་པའི་བྱ་བ་བྱེད་ཅིང་འདུག་པར་འགྱུར་རོ། །བརྒྱ་རྩ་བརྒྱད་ལན་བཞི་བཟླས་པས། ཀླུ་ཐམས་ཅད་དབང་དུ་བྱས་པར་འགྱུར་རོ། །རྒྱ་མཚོའི་ཀླུའི་རྒྱལ་པོ་དགའ་བོ་དང་། ཉེ་དགའ་བོ་ལ་སོགས་པའི་བར་ཐམས་ཅད་དབང་དུ་བྱས་པར་འགྱུར་རོ། །ཟངས་ལས་བྱས་པའི་འཕགས་པ་སྤྱན་རས་གཟིགས་དབང་ཕྱུག་དོན་ཡོད་པའི་ཞགས་པ་ལ། ཙནྡན་དཀར་པོའི་དཀྱིལ་འཁོར་བྱས་ཏེ། མེ་ཏོག་དམར་པོ་བཀྲམ་ལ། བདུག་སྤོས་ཀྱི་སྣོད་བཞི་ནས་བདུག་པར་བྱ་ཞིང་། མར་གྱི་མར་མེ་ལྔ་བཅུ་རྩ་གཉིས་བལྟམ་པར་བྱའོ། །མཆོད་ཡོན་གྱི་སྣོད་བཞི་བཞག་ལ། འཕགས་པ་སྤྱན་རས་གཟིགས་དབང་ཕྱུག་ལ་མཆོད་པར་བྱའོ། །ཁྲོ་བོའི་རྒྱལ་པོ་ལན་ཉི་ཤུ་རྩ་གཅིག་རྗེས་སུ་དྲན་པར་བྱའོ། །དོན་ཡོད་པའི་ཞགས་པའི་ཕྱག་རྒྱ་ལན་ཉི་ཤུ་རྩ་གཅིག་བཅིང་བར་བྱའོ། །རས་ལ་བྲིས་པའི་སྐུ་གཟུགས་ཀྱི་སྤྱན་སྔར་སྐྱིལ་མོ་ཀྲུང་དུ་འདུག་སྟེ། སེམས་ཅན་ཐམས་ཅད་ལ་དམིགས་པས་དེ་བཞིན་གཤེགས་པ་ཐམས་ཅད་ཡིད་ལ་བྱའོ། །ཕྱོགས་བཞིར་བྱམས་པའི་ལྟ་བས་བལྟ་བར་བྱའོ། །སེམས་ཅན་དམྱལ་བ་པ་དང་། གཤིན་རྗེའི་འཇིག་རྟེན་དང་། ལྷ་མ་ཡིན་དང་། ཡི་དགས་ཀྱི་ཡུལ་ཐམས་ཅད་ཡིད་ལ་བྱའོ། །སེམས་ཅན་དམྱལ་བ་ཆེན་པོ་བརྒྱད་ཡིད་ལ་བྱ་ཞིང་སྙིང་རྗེའི་སེམས་ཀྱིས་བལྟ་བར་བྱའོ། །བཟླས་བརྗོད་ཀྱི་ཕྱག་རྒྱ་པདྨའི་ཚུལ་དུ་བཅིངས་ཏེ་བཟླས་བརྗོད་བྱའོ། །བརྒྱ་རྩ་བརྒྱད་ཚང་བ་དང་། ཕྱོགས་བཞི་གཡོ་ཞིང་སྒྲ་གྲག་པར་འགྱུར་ལ། དམྱལ་བ་པའི་སེམས་ཅན་དེ་དག་ཐམས་ཅད་ཡོངས་སུ་གྲོལ་བར་འགྱུར་རོ།