སྐྱ་རེངས་ཤར་བའི་དུས་ཀྱི་ཚེ། འཕགས་པ་སྤྱན་རས་གཟིགས་དབང་ཕྱུག་གི་རང་གི་གཟུགས་ཀྱིས་མདུན་ན་བཞུགས་ཏེ། པདྨའི་དྲི་མ་མེད་པ་ཞེས་བྱ་བའི་ཞགས་པ་སྦྱིན་པར་མཛད་ཅིང་། དངོས་གྲུབ་ཐམས་ཅད་སྦྱིན་པར་མཛད་དོ། །རྒྱལ་བ་འོད་དཔག་མེད་ལེགས་སོ་ཞེས་བྱ་བ་སྦྱིན་པར་མཛད་དོ། །གང་ལ་འཕགས་པ་སྤྱན་རས་གཟིགས་དབང་ཕྱུག་གི་སྐུར་བསྟན་པ་དེ། དེ་བཞིན་གཤེགས་པ་སྟོང་ཕྲག་དྲུག་ཅུ་རྩ་བཞི་ལ་དགེ་བའི་རྩ་བསྐྲུན་པར་འགྱུར་རོ། །ལྷ་ཐམས་ཅད་དང་། ཚངས་པ་ལ་སོགས་པ་དབང་ཕྱུག་དང་། དབང་ཕྱུག་ཆེན་པོ་དང་། ལྷའི་བུ་རྣམས་རྟག་ཏུ་ལུས་སྟོན་འདོད་པར་འགྱུར་རོ། །ནད་ཐམས་ཅད་དང་བྲལ་བར་འགྱུར་བ་དང་། མཆོག་ཐམས་ཅད་ཡོངས་སུ་རྫོགས་པ་དང་། རྟག་ཏུ་ཕྱི་བཞིན་འབྲང་ཞིང་སྲུང་བ་དང་། སྐྱོབ་པ་དང་། སྦ་བར་བྱེད་པར་འགྱུར་རོ། །སྡིག་པ་ཐམས་ཅད་དང་བྲལ་བར་འགྱུར་རོ། །དེ་ནས་དངུལ་ལས་འཕགས་པ་སྤྱན་རས་གཟིགས་དབང་ཕྱུག་དོན་ཡོད་པའི་ཞགས་པའི་གཟུགས་སྔ་མ་བཞིན་དུ་བྱས་པ་ལ། ཙནྡན་དཀར་པོའི་དཀྱིལ་འཁོར་དུ་ཙནྡན་དཀར་པོའི་དྲི་ཆབ་ཀྱིས་བཀང་བ་གཞག་པར་བྱ་ཞིང་། མཆོད་ཡོན་གྱི་སྣོད་ལྔ་གཞག་པར་བྱའོ། མེ་ཏོག་སྣ་ཚོགས་པ་བཀྲམ་ཞིང་། ཙནྡན་དཀར་པོའི་བདུག་སྤོས་ཀྱིས་བདུགས་ཏེ། འཕགས་པ་སྤྱན་རས་གཟིགས་དབང་ཕྱུག་ལ་མཆོད་པར་བྱའོ། །དྲི་སྣ་བཞི་བཅུ་རྩ་གཉིས་དང་ལྡན་པའི་ཏིལ་མར་གྱི་མར་མེ་བལྟམ་པར་བྱ་ཞིང་། བདུག་སྤོས་ཀྱི་སྣོད་བཞི་བཅུ་གཞག་པར་བགྱིའོ། །ཁྲོ་བོའི་རྒྱལ་པོ་ལན་ཉི་ཤུ་རྩ་གཅིག་བཟླས་བརྗོད་བྱས་ལ་རིག་སྔགས་འཆང་གཙང་མས་གོས་གཙང་མ་བགོས་ཏེ། དོན་ཡོད་པའི་ཞགས་པའི་ཕྱག་རྒྱ་ལན་བདུན་བཅིང་ངོ་། །བཟླས་བརྗོད་ཀྱི་ཕྱག་རྒྱ་བྱས་ཏེ། སྐྱིལ་མོ་ཀྲུང་དུ་འདུག་ལ་ལག་པ་གཡོན་པའི་མཛུབ་མོ་བརྐྱང་བ་པདྨའི་ཚུལ་དུ་བྱས་ལ། བཟླས་བརྗོད་ལན་བརྒྱ་རྩ་བརྒྱད་བྱའོ། །ལན་བརྒྱ་རྩ་བརྒྱད་ཚང་བ་དང་། ཤར་ཕྱོགས་ནས་ལེགས་སོ་ཞེས་བྱ་བའི་སྒྲ་གྲག་པར་འགྱུར་ཞིང་། བདག་ཉིད་དགའ་བར་སྣང་ངོ་། །རྒྱལ་པོ་བློན་པོ་དང་བཙུན་མོའི་འཁོར་དང་བཅས་པ་དབང་དུ་གྱུར་ཏེ། མིང་བརྗོད་པས་དཔག་ཚད་སྟོང་ནས་འོང་བར་འགྱུར་རོ། །ཐམས་ཅད་བགྱི་བ་ཅི་མཆིས་ཞེས་བྲན་བཞིན་དུ་འགྱུར་རོ། །གང་བསྒོ་བ་དེ་བྱེད་པར་འགྱུར་རོ།