།དེ་ནས་རིག་སྔགས་འཆང་གིས་མཆོད་ཡོན་གྱི་སྣོད་དག་འབུལ་ཞིང་གཏོར་མ་དབུལ་བའི་ལས་བགྱིའོ། །དེ་ནས་རིག་སྔགས་འཆང་གིས་མར་དང་བསྲེས་པའི་གོང་བུ་ཆེན་པོ་དག་གིས་སྦྱིན་སྲེག་བགྱི་ཞིང་། འབྲས་བུའི་ཤིང་སྤར་ནས། དོན་ཡོད་ཞགས་པའི་སྙིང་པོ་ལན་སྟོང་རྩ་བརྒྱད་བཟླས་བརྗོད་བགྱིའོ། །སྟོང་རྩ་བརྒྱད་ཚང་བ་དང་། ཐབ་ཀྱི་དབུས་ནས་སྐྱེས་པ་ཞིག་ལུས་ཕྱེད་ཙམ་ཕྱུང་ནས། དངུལ་གྱི་གཞོང་པ་ཁ་ཟས་ཀྱིས་བཀང་སྟེ། པུས་མོ་ནུབ་ཙམ་དུ་འབུལ་བར་བགྱིད་དོ། །རིག་སྔགས་འཆང་གིས་བླང་བར་བགྱི་སྟེ། བླངས་པ་ཙམ་གྱིས་ནམ་མཁའ་ལ་འཕུར་བར་འགྱུར་ཞིང་། རིག་སྔགས་འཆང་གི་ལུས་ལ་མེ་འབར་བའི་འོད་ཟེར་འབྱུང་བར་འགྱུར་རོ། །དེ་འཚལ་ན་ཚེ་ལོ་ཁྲིར་འགྱུར་རོ། །ནམ་མཁའི་རིག་སྔགས་འཆང་གི་འཁོར་ལོས་སྒྱུར་བར་འགྱུར་རོ། །བསྐལ་པ་བཅུ་ཚུན་ཆད་ཀྱི་སྔོན་གྱི་སྐྱེ་བ་དྲན་པར་འགྱུར་རོ། །དོན་ཡོད་རྒྱལ་པོའི་ཆོ་ག་ཞིབ་མོ་རྣམ་པར་གྲོལ་བའི་དཀྱིལ་འཁོར་ཁ་ཏོན་དུ་གནས་པར་འགྱུར་རོ། །གལ་ཏེ་སྣོད་མི་ལེན་ན་དེའི་ཚེ་ཡང་ལན་ཉི་ཤུ་རྩ་གཅིག་སྦྱིན་སྲེག་བགྱིས་ན། ཆེར་གཡོ་བར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་གི་གཟུགས་ཀྱི་མདུན་དུ་མཆིས་ན། རིག་སྔགས་འཆང་ལ་དབུགས་འབྱིན་པར་བགྱིས་ཏེ། རིག་སྔགས་འཆང་ལེགས་སོ་ལེགས་སོ། །རིག་སྔགས་འཆང་ཁྱོད་ཀྱིས་སྦྱིན་སྲེག་གི་ཆོ་ག་དེ་བསྒྲུབས་ཟིན་གྱིས། མཆོག་སློངས་ཤིག་དང་སྦྱིན་ནོ་ཞེས་དེའི་ཚེ་རིག་སྔགས་འཆང་གིས་ཅི་བསམས་པའི་མཆོག་སྨྲས་པ། དེའི་ཚེ་ཐམས་ཅད་སྩོལ་བར་བགྱིའོ། །འཕགས་པ་སྤྱན་རས་གཟིགས་དབང་ཕྱུག་གིས་སྐྱེས་པ་དེ་ལ་སྣོད་བླངས་ཏེ། རང་གི་ལག་ནས་རིག་སྔགས་འཆང་ལ་སྩོལ་བར་བགྱིད་དོ། །རིག་སྔགས་འཆང་གིས་བླངས་ནས་ཟས་ཀྱི་གོང་བུ་དེ་བཟའ་བར་བགྱིའོ། །འཚལ་བ་ཙམ་གྱི་མོད་ལ་ནམ་མཁའ་ལ་རྫུ་འཕྲུལ་གྱིས་མཆི་བར་འགྱུར་རོ། །ལུས་ལས་མེའི་སྙིང་པོ་འབར་བའི་ཁ་དོག་སྣ་ཚོགས་འབྱུང་བར་འགྱུར་རོ། །དོན་ཡོད་པའི་རྒྱལ་པོའི་རིག་སྔགས་འཛིན་འཁོར་ལོས་སྒྱུར་བར་འགྱུར་རོ།། །།འཕགས་པ་དོན་ཡོད་ཞགས་པའི་ཆོ་ག་ཞིབ་མོའི་རྒྱལ་པོ། བམ་པོ་དྲུག་པ། གང་གཱའི་ཀླུང་གི་བྱེ་བ་ཁྲག་ཁྲིག་བརྒྱ་སྟོང་དགུ་བཅུ་རྩ་གཉིས་ཀྱི་བྱེ་མ་སྙེད་དང་མཉམ་པའི་རིག་སྔགས་འཆང་བའི་འཁོར་ལོས་སྒྱུར་བ་རྣམས་ཀྱི་རིག་སྔགས་འཆང་གིས་ཡོངས་སུ་བསྐོར་བར་འགྱུར་རོ།