གསང་སྔགས་འདིས་ནི་ལན་བདུན་དུ། །བཟླས་ནས་མེ་ནི་དགུག་པར་བགྱི། །གུ་གུལ་ཡུངས་ཀར་མར་སྦྱར་ལ། །སྤར་བདུན་སྤར་བས་མེ་ལ་དབུལ། །མཆོད་ཡོན་སྣོད་རྣམས་དབུལ་བ་ཡང་། །དེ་བཞིན་སྤར་བའི་སྤར་བས་སོ། །དྲི་རྣམས་དང་ནི་བྱུག་པ་དང་། །བདུག་པ་རྒྱ་ཆེར་དབུལ་བར་བགྱི། །དེ་བཞིན་འབྲས་བུ་སྤར་བར་འབུལ། །དེ་ནས་ཆབ་ཀྱིས་བསང་བ་བགྱི། །ཅི་ལྟར་ལྷ་རྣམས་རིམ་བཞིན་དུ། །ཉེ་རེག་དག་ཀྱང་དབུལ་བར་བགྱི། །དེ་ནས་རིག་སྔགས་འཆང་གིས་སུ། །སྦྱིན་སྲེག་ལས་ནི་ཡང་དག་བརྩམ། །དྲི་ཞིམ་ཤིན་ཏུ་དག་པ་དང་། །བླག་ཤ་ཨུ་དུམ་བཱ་ར་དང་། །སྣ་མའི་མེ་ཏོག་ཙམ་པ་དང་། །ཀར་ནི་ཀ་ར་ཉིད་དག་དང་། །པདྨ་ཨུཏྤལ་ཐང་ཤིང་དང་། །དེ་བཞིན་དྲི་བདའི་ཙནྡན་དང་། །བྱང་ཆུབ་ལྗོན་ཤིང་ཤིང་དག་དང་། །དེ་བཞིན་གཞན་ཡང་དྲི་བདའི་ཤིང་། །འོན་ཏེ་འབྲས་བུའི་ཤིང་མང་དང་། །ཤ་མི་ཤི་བའི་ལས་ལགས་པས། །མཆོད་ཡོན་དེ་བཞིན་རྩྭ་དག་སྟེ། །དེ་དག་གིས་ནི་མེ་སྤར་ནས། །སྦྱིན་སྲེག་གི་ནི་ལས་རྣམས་བགྱིའོ། །འབྲས་ཡོས་ཙནྡན་ཕྱེ་མ་དང་། །ཨ་གུ་རུ་དང་དུ་རུ་སྐ། །ཀུན་དུ་རུ་ལ་སོགས་པ་དང་། །དུ་རུ་སྐར་བཅས་སྤྲི་ཀ་དང་། །སྤང་སྤོས་པྲི་ཡང་ཀུ་བླངས་ཏེ། །དེ་དག་ལྷན་ཅིག་སྦྱར་བསྲེས་ཤིང་། །མར་རམ་མར་སར་ལྷན་ཅིག་བརྫི། །དོན་ཡོད་རྒྱལ་པོའི་གསང་སྔགས་ནི། །བརྒྱ་རྩ་བརྒྱད་བཟླས་མེ་ལ་དབུལ། །འཕགས་པ་སྤྱན་རས་གཟིགས་དབང་ཕྱུག་གི་མདུན་དུ་ལན་སྟོང་རྩ་བརྒྱད་ཀྱི་སྦྱིན་སྲེག་བགྱིའོ། །ལན་སྟོང་རྩ་བརྒྱད་ཚང་བ་དང་། ནམ་ཕྱེད་ན་མེ་ལྷ་རང་གི་གཟུགས་འབར་བར་ཤིན་ཏུ་གནས་པ་ལགས་ནས་ཕྱོགས་བཅུར་བལྟ་ཞིང་ཀུན་དུ་བརྟགས་ནས། རིག་སྔགས་འཆང་ལ་ལེགས་སོ་ཞེས་བགྱི་བ་སྩོལ་བར་འགྱུར་ཏེ། རིག་སྔགས་འཆང་ལེགས་སོ་ལེགས་སོ། །བདག་ཚིམ་པར་བྱས་པས་རིག་སྔགས་འཆང་ཁྱོད་ཀྱིས་སྦྱིན་སྲེག་གི་ཆོ་ག་གྲུབ་ཀྱིས་མཆོག་སློངས་ཤིག་དང་། ཐམས་ཅད་སྦྱིན་ནོ། །དེ་ནས་རིག་སྔགས་འཆང་གིས་ཅི་ལྟ་བུའི་འདོད་པའི་མཆོག་རྣམས་བླང་བར་བགྱི་སྟེ། ཅི་ལྟར་བླངས་པ་བཞིན་ཐམས་ཅད་སྩོལ་བར་འགྱུར་རོ། །དེ་ནས་རིག་སྔགས་འཆང་གིས་མཆོད་ཡོན་གྱི་སྣོད་དག་འབུལ་ཞིང་གཏོར་མ་དབུལ་བའི་ལས་བགྱིའོ།