།མི་དེ་ངས་ནི་ནད་དང་བྲལ་བར་བྱས། །རྒྱལ་པོ་མེ་ཏོག་བཟང་ཞེས་བྱར་གྱུར་ཚེ། །ང་ཡིས་ལུས་ལས་རུས་པ་ཕྱུང་ནས་ནི། །ནད་ཀྱིས་རིང་པར་གྱུར་ལ་རྐང་བྱིན་ཏེ། །ངས་ནི་ནམ་ཡང་སེམས་ཅན་མ་བཏང་ངོ་། །རྒྱལ་པོ་དོན་གྲུབ་ཅེས་བྱར་སྔོན་གྱུར་ཚེ། །རང་གི་མཛོད་རྣམས་ཐམས་ཅད་ངས་བཏང་ཞིང་། །ཕངས་ཤིང་ཡིད་དུ་འོང་བའི་སྲོག་བཏང་སྟེ། །ཕོངས་པར་གྱུར་པའི་མི་ནི་ཐར་བར་བྱས། །རྒྱལ་པོ་ཕྱོགས་ཀྱི་ཏོག་དུ་གྱུར་པའི་ཚེ། །བྱང་ཆུབ་འདོད་ནས་འགྲོ་བའི་དོན་གྱི་ཕྱིར། །འཁོར་ལོའི་མཚན་ཅན་པད་མ་ལྟ་བུ་ཡི། །ལག་པ་ཕྲུགས་ཀྱང་མ་བལྟས་རབ་ཏུ་བྱིན། །རྒྱལ་པོ་ཐམས་ཅད་མཐོང་དུ་གྱུར་པའི་ཚེ། །སྙིང་རྗེ་ལྡན་ཞིང་འགྲོ་དོན་ཕན་འདོད་དོ། །སྐྱེས་པ་བུད་མེད་དག་གིས་རྒྱས་པ་ཡི། །གླིང་བཞི་པ་ཡང་ངས་ནི་བཏང་བ་བྱས། །རྒྱལ་པོའི་བུ་མོ་ཡེ་ཤེས་ལྡན་གྱུར་ཚེ། །འཇམ་ཞིང་མཉེན་ལ་དྲི་མེད་དཀར་བའི་བརླ། །དགའ་ཞིང་མགུ་བའི་ཡིད་ཀྱིས་བཅད་ནས་ནི། །རང་གི་ཤ་དང་ཁྲག་ཀྱང་ངས་བྱིན་ནོ། །བུད་མེད་གཟུགས་ལྡན་ཞེས་ནི་བྱར་གྱུར་ཚེ། །བུད་མེད་བཀྲེས་སྐོམ་ཉམ་ཐག་ངས་མཐོང་ནས། །གསེར་ལྟར་སེར་ཞིང་ཤིན་ཏུ་གཞོན་པ་ཡི། །ནུ་མ་སྙིང་དུ་སྡུག་པ་གཉི་ག་བཏང་། །རྒྱལ་པོ་དཔལ་གྲགས་ཞེས་བྱར་གྱུར་པ་ན། །ཤིན་ཏུ་ཉམས་དགའ་བ་ཡི་རྒྱན་མཆོག་དང་། །རིན་ཆེན་དུ་མ་གོས་དང་ཤིང་རྟ་བཞོན། །གཏང་བར་དཀའ་བ་རྣམ་པ་དུ་མ་གཏང་། །རྒྱལ་བུ་བྱས་པ་གཟོ་བར་གྱུར་པའི་ཚེ། །རྒྱ་མཚོ་ལས་ནི་བྱས་པ་མི་གཟོ་བསྒྲལ། །རིན་ཆེན་ཕྱིར་ནི་དེ་ཡིས་ང་མིག་ཕྱུང་། །འོན་ཀྱང་ང་ལ་ཁྲོས་པའི་སེམས་མེད་དོ། །སྲོག་ཆགས་གོ་དྷར་སྔོན་སྲིད་གྱུར་པའི་ཚེ། །སྲོག་སྦུར་དག་ནི་འཆི་བར་འགྱུར་དོགས་ནས། །ལུས་ཀྱི་དམ་པ་མ་བལྟས་བཏང་བ་བྱས། །དེ་ཚེ་ང་ཡི་སེམས་ནི་གཡོ་བ་མེད། །སྤྱད་པ་སྤྱོད་ཚེ་བྱ་སྲེག་གྱུར་པ་ན། །རྒན་ལ་བསྙེན་བཀུར་བྱ་བར་རྟག་དགའ་སྟེ། །ང་ནི་རིམ་གྲོ་གུས་ལ་རབ་ཏུ་དགའ། །ང་རྒྱལ་ལྡན་པ་མ་ཡིན་ཁེངས་པ་མེད། །སྐྱབས་སུ་འོངས་པའི་དོན་ཕྱིར་ང་ཡིས་ནི། །སྙིང་རྗེ་བསྐྱེད་པ་བྱས་ནས་ལུས་བཏང་སྟེ། །གདོལ་བའི་མི་ཡིས་མདའ་རྣམས་བསྣུན་ཀྱང་ནི། །སྤྲེའུར་གྱུར་ངས་ནི་མི་དེ་མ་བཏང་ངོ་།