ལོ་སྟོང་ཕྲག་མང་པོ་དང་། ལོ་བརྒྱ་སྟོང་ཕྲག་མང་པོ་དང་། ལོ་བྱེ་བ་བརྒྱ་སྟོང་ཕྲག་མང་པོ་རྣམས་སུ་སྡུག་བསྔལ་དྲག་པོ་རྩུབ་པ་མི་ཟད་པ་ཡིད་དུ་མི་འོང་བའི་ཚོར་བ་མྱོང་བར་གྱུར་ཏོ། །ཤཱ་རིའི་བུ་འཇིག་རྟེན་གནས་པ་གང་ཡིན་པ་འདི་ཞིག་པར་གྱུར་ཏེ། དེར་ཡང་སྲེག་པའི་བསྐལ་པ་ཆེན་པོ་ཉེ་བར་གནས་པའི་དུས་དེ་དང་དེ་དག་བྱུང་བར་གྱུར་ཏོ། །ཤཱ་རིའི་བུ་དེ་ནས་སྐྱེས་བུ་དམ་པ་མ་ཡིན་པ་བཞི་པོ་དེ་དག་དང་། སྲོག་ཆགས་བྱེ་བ་བརྒྱ་སྟོང་ཕྲག་དྲུག་ཅུ་རྩ་བཞི་པོ་དེ་དག་དང་། གཞན་ཡང་སེམས་ཅན་དམྱལ་བ་ལས་ཀྱི་རྣམ་པར་སྨིན་པ་མི་བཟད་པ་གང་ཡིན་པ་དེ་རྣམས་དེ་ནས་ཤི་འཕོས་ནས་ཡང་འཇིག་རྟེན་གྱི་ཁམས་འདི་ཉིད་ཀྱི་སེམས་ཅན་དམྱལ་བ་ཆེན་པོ་དག་ཏུ་སྐྱེས་པར་གྱུར་ཏོ། །ཤཱ་རིའི་བུ་ཡང་སྐྱེས་བུ་དམ་པ་མ་ཡིན་པ་བཞི་པོ་དེ་དག་དང་། སྲོག་ཆགས་བྱེ་བ་བརྒྱ་སྟོང་ཕྲག་དྲུག་ཅུ་རྩ་བཞི་པོ་དེ་དག་མི་རྣམས་སུ་སྐྱེས་པར་གྱུར་ཏེ། དེར་ཡང་ཐམས་ཅད་དམུས་ལོང་ཤ་སྟག་ཏུ་གྱུར་ཏོ། །ཤཱ་རིའི་བུ་རྣམ་གྲངས་འདིས་མི་རྣམས་སུ་སྐྱེ་བ་ལྔ་བརྒྱར་དམུས་ལོང་ཤ་སྟག་ཏུ་གྱུར་ཏོ། །སྐྱེ་བ་ལྔ་བརྒྱར་ནི་དམྱལ་བ་ཆེན་པོར་ལྷུང་བར་གྱུར་ཏེ། དེར་ཡང་ཐམས་ཅད་དམུས་ལོང་ཤ་སྟག་ཏུ་གྱུར་ཏོ། །དེ་དག་སྐྱེ་བ་ལྔ་བརྒྱའི་ཐ་མ་ལ་མིའི་རང་བཞིན་སླར་ཐོབ་ནས་ཤའི་མིག་དང་ལྡན་པར་གྱུར་ཏོ། །ཤཱ་རིའི་བུ་དེའི་ཚེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པ་སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཀུན་ནས་འོད་ཅེས་བྱ་བ་འཇིག་རྟེན་དུ་བྱུང་སྟེ། བཅོམ་ལྡན་འདས་དེའི་ཚེའི་ཚད་ནི་ལོ་བྱེ་བ་ཕྲག་བརྒྱ་སྟོང་དུ་གྱུར་ཏོ། །དེའི་ཉན་ཐོས་འདུས་པ་ཆེན་པོ་ནི་བྱེ་བ་ཕྲག་དུང་ཕྱུར་ཡོངས་སུ་ཚང་བར་གྱུར་ཏོ། །དེའི་ཚེ་མི་དེ་དག་གི་ལུས་ནི་ཁྲུ་དགུ་བཅུ་རྩ་དགུ་ཡོད་དོ། །བཅོམ་ལྡན་འདས་ཀྱི་སྐུ་ལ་ནི་ཁྲུ་ཕལ་པ་དེའི་ཉིས་འགྱུར་ཡོད་དོ། །སངས་རྒྱས་བཅོམ་ལྡན་འདས་དེའི་འོད་ནར་མ་གང་ཡིན་པ་དེས་ནི་དཔག་ཚད་བྱེ་བ་དུང་ཕྱུར་ཕྲག་བརྒྱ་སྟོང་སྣང་བས་ཁྱབ་པར་གྱུར་ཏོ། །བཅོམ་ལྡན་འདས་དེའི་བསྟན་པ་ལ་སྐྱེས་བུ་དམ་པ་མ་ཡིན་པ་དེ་དག་རབ་ཏུ་བྱུང་ནས་ལོ་བརྒྱ་སྟོང་དུ་མ་མགོ་ལ་མེ་འབར་བ་བཞིན་དུ་འབྲས་བུ་འདོད་པའི་ཕྱིར་བཙལ་བར་བྱས་ཀྱང་རྗེས་སུ་འཐུན་པའི་བཟོད་པ་ཡང་མ་སྐྱེས་ན།