སྐྱེ་བོ་མང་པོའི་འཁོར་དང་། གང་ཟག་ཏུ་སྨྲ་བ་ལ་མངོན་པར་ཞེན་པར་གྱུར་ཏོ། །ཤཱ་རིའི་བུ་དེ་ལྟར་སྐྱེས་བུ་དམ་པ་མ་ཡིན་པ་དེ་དག་གིས་རབ་ཏུ་བྱུང་བ་དང་། ཁྱིམ་པའི་སྐྱེ་བོའི་ཚོགས་ཆེན་པོ་དག་ལོག་པའི་ལྟ་བ་ལ་མངོན་པར་ཞེན་པར་བྱས་ནས་དོན་དམ་པ་ནི་སྤངས། དམིགས་སུ་མེད་པའི་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་ཆོས་སངས་རྒྱས་ཀྱི་བྱང་ཆུབ་ནི་གཅེར་བུ་པའི་ཚིག་གིས་བཅབས་ནས་ལོག་པར་ལྟ་བ་ཡོངས་སུ་བཟུང་བར་གྱུར་ཏོ། །ཤཱ་རིའི་བུ་དེ་ལ་དགེ་སློང་བཞི་པོ་གང་ཡིན་པ་དེ་དག་འཁོར་གྱི་གཙོ་བོ་ཡིན་པས་སྐྱེས་བུ་དམ་པ་མ་ཡིན་པ་བཞི་པོ་གང་ཡིན་པ་དེ་དག་གི་རྗེས་སུ་ཕྱོགས་པ་དེ་རྣམས་ཀྱང་དེ་སྐད་དུ་སྨྲ་བས། དེ་རྣམས་ཀྱིས་གསུང་རབ་རྒྱ་ཆེན་པོ་དེ་ནུབ་པར་བྱས་སོ། །ཤཱ་རིའི་བུ་དེ་ལ་གང་དག་གིས་ཆོས་མ་ཡིན་པ་དེ་ལ་ཆོས་སུ་བཟུང་ནས་དེ་དག་གིས་བཙལ་བ་དང་། འབད་པ་དང་། བརྩོན་པ་བྱས་ཀྱང་རྗེས་སུ་འཐུན་པའི་བཟོད་པ་ཡང་སྐྱེས་པར་མ་གྱུར་ན། འབྲས་བུ་ཐོབ་པ་ལྟ་ཅི་སྨོས་ཏེ། དེ་ནི་གནས་ཡོད་པ་མ་ཡིན་ནོ། །ཤཱ་རིའི་བུ་འདི་ལྟར་ཁྱིམ་པ་དང་རབ་ཏུ་བྱུང་བ་དེ་དག་ཕལ་ཆེར་ངན་སོང་དུ་དོང་བར་གྱུར་གྱི། བདེ་འགྲོར་དོང་བ་ནི་མ་ཡིན་ནོ། །ཤཱ་རིའི་བུ་འདི་ལྟར་སྐྱེས་བུ་དམ་པ་མ་ཡིན་པ་དེ་དག་གིས་སངས་རྒྱས་ཀྱི་བྱང་ཆུབ་དེ་ནུབ་པར་བྱས་པས། སེམས་ཅན་མང་པོ་ལ་གནོད་པ་བྱེད་པ་ཡིན་ཏེ། སྐྱེས་བུ་དམ་པ་མ་ཡིན་པ་དེ་དག་ཀྱང་དུས་ལས་འདས་ནས་མནར་མེད་པའི་སེམས་ཅན་དམྱལ་བ་ཆེན་པོར་ལྷུང་ནས་དེར་ལོ་བྱེ་བ་བརྒྱ་སྟོང་ཕྲག་དགུར་ཁས་བུབ་ཏུ་བཙོས་པར་གྱུར་ཏོ། །ལོ་སྟོང་ཕྲག་དགུར་ནི་གློ་གཡས་གཡོན་ནས་བཙོས་ཏེ། དེ་དག་དེ་ནས་ཤི་འཕོས་ནས་རབ་ཏུ་ཚ་བ་དང་། ཚ་བ་དང་། ངུ་འབོད་ཆེན་པོ་དང་། ངུ་འབོད་དང་། བསྡུས་གཞོམ་དང་། ཐིག་ནག་དང་། ཡང་སོས་ཀྱི་དམྱལ་བ་ཆེན་པོ་རྣམས་སུ་ལྷུང་ནས། རྣམ་གྲངས་འདི་དག་གིས་དམྱལ་བ་ཆེན་པོ་རེ་རེར་ཡང་དུས་དེ་སྲིད་དུ་བཙོས་པར་གྱུར་ཏོ། །དེ་དག་དེ་ནས་ཡང་ཡང་སོས་ཀྱི་དམྱལ་བ་ཆེན་པོ་ནས་ཐིག་ནག་ཏུ་ལྷུང་ཞིང་། ཐིག་ནག་ནས་བསྡུས་གཞོམ་དང་། བསྡུས་གཞོམ་ནས་ངུ་འབོད་དང་། ངུ་འབོད་ནས་ངུ་འབོད་ཆེན་པོ་དང་། ངུ་འབོད་ཆེན་པོ་ནས་ཚ་བ་དང་། ཚ་བ་ནས་རབ་ཏུ་ཚ་བར་ལྷུང་བ་ནས་མནར་མེད་པ་དང་། མནར་མེད་པའི་སེམས་ཅན་དམྱལ་བ་ཆེན་པོར་ལྷུང་བར་གྱུར་ཏོ།