།ཤཱ་རིའི་བུ་དཔེར་ན་དམུས་ལོང་དེ་དག་གིས་གྲོང་རྡལ་གྱི་བསླངས་པ་བོར་ཏེ། སྦྱིན་བདག་ཆེན་པོ་ལ་མངོན་པར་དགའ་ནས་གཏོང་བ་ཆེན་པོ་ཚོལ་བ་ན་གཡང་ས་ཆེན་པོར་བཙུད་པ་དེ་བཞིན་དུ། ཤཱ་རིའི་བུ་གང་ཡང་དགེ་སློང་དེ་དག་གིས་ངའི་རྗེས་སུ་བསྟན་པ་བོར་ཏེ། བསོད་སྙོམས་ཕལ་པས་ཆོག་མི་ཤེས་ཤིང་། མགྲོན་དུ་གཉེར་བ་ཆེན་པོ་ཚོལ་བར་འགྱུར་རོ། །དེ་དག་ཟང་ཟིང་གི་རྒྱུས་ངན་པའི་ཞགས་པས་བཅིངས་ནས། བདུད་སྡིག་ཅན་གྱིས་གཡང་ས་ཆེན་པོར་གཏོང་བར་འགྱུར་ཞིང་། ཤེས་རབ་འཆལ་པ་ཤེས་རབ་ཡོངས་སུ་ཉམས་པ་རྣམས་མནར་མེད་པ་ཆེན་པོར་ལྟུང་བར་འགྱུར་རོ། །ཤཱ་རིའི་བུ་དེ་ལ་ལྷག་མ་ཡོངས་སུ་མ་དག་པར་ཆོས་སྟོན་པའི་དགེ་སློང་གང་ཡིན་པ་དེ་ནི་སངས་རྒྱས་ཀྱི་གསུང་ཐམས་ཅད་ཆུབ་པར་མ་བྱས་པ་དང་། བདག་ཉིད་མི་མཁས་པ་དང་། མ་བསླབས་པར་འཁོར་གྱི་ནང་དུ་སོང་ནས་གཞན་ལ་ཆོས་སྟོན་པར་འགྱུར་ཏེ། དེའི་ཚེ་འདི་ལ་དགེ་སློང་ལྷའི་མིག་དང་ལྡན་པའམ། ལྷའམ། གང་དག་ཕ་རོལ་གྱི་སེམས་རིག་པ་མ་གཏོགས་པར་མིས་མི་ཤེས་པའི་སྐྱོན་ལྔ་དང་ལྡན་པར་འགྱུར་ཏེ། དེ་དེ་ན་བདག་ལ་འགའ་ཞིག་རྩོད་པར་མི་འགྱུར་གྲང་ཞེས་ཡིད་གཉིས་ཀྱིས་ཆོས་སྟོན་པར་འགྱུར་བས་བྱིས་པ་སོ་སོའི་སྐྱེ་བོ་རྣམས་ཀྱིས་ཤེས་པར་དཀའ་བའི་ཟུག་རྔུ་དེའི་སེམས་ལ་གནས་པ་དང་། རང་གི་སྤོབས་པ་ཀུན་ནས་ཉོན་མོངས་པ་ཅན་གྱི་ཚིག་དང་ཡི་གེ་འཆལ་པ་དང་། དེའི་སྡིག་པའི་ཚིག་གི་རྣམ་པར་སྨིན་པ་སྟེ། རྒྱུ་འཐུན་པའི་རྣམ་པར་སྨིན་པ་དང་། འགྱོད་པ་ཡིད་ལ་བྱེད་པ་དང་། དགེ་འདུན་གྱི་ནང་ན་འདུག་ན་བྱིས་པ་སོ་སོའི་སྐྱེ་བོ་རྣམས་ཀྱིས་ཤེས་པར་དཀའ་བ་སེམས་ལ་གནས་པས་གདུང་བར་འགྱུར་བ་སྟེ། མདོ་སྡེའི་ཚུལ་མི་ཤེས་པར་གཞན་ལ་ཅི་དགར་མངོན་སུམ་དུ་ཆོས་སྟོན་པར་འགྱུར་བའི་ཤེས་པ་དེ་ལྟ་བུ་ནི་དེ་ལ་ཡོད་པ་མ་ཡིན་པས། དེའི་ཡིད་གཉིས་གང་ཡིན་པ་ནི་བྱིས་པ་སོ་སོའི་སྐྱེ་བོ་རྣམས་ཀྱིས་ཤེས་པར་སླ་བ་མ་ཡིན་པའི་ཕྱིར་རོ། །དེ་ངེས་པ་མེད་པའི་ཤེས་པ་དང་། ང་རྒྱལ་གྱི་དབང་དང་། ཕྲན་ཚེགས་ཀྱི་ཆེད་དུ་སེམས་པ་དང་། ཉེ་དུ་འདོད་པས་མ་བརྟགས་པར་ཟུག་རྔུ་དང་བཅས་པའི་ཆོས་སྟོན་པར་འགྱུར་ཏེ། ཡུན་རིང་པོར་འདོད་ཆགས་ཀྱི་ཟུག་རྔུ་དང་། ཞེ་སྡང་གི་ཟུག་རྔུ་དང་། གཏི་མུག་གི་ཟུག་རྔུ་རྙེད་པར་འགྱུར་རོ།