གཞན་ཡང་གསུམ་ཡིད་མི་བདེ་བར་འགྱུར་ཏེ། གསུམ་པོ་དེ་དག་གང་ཞེ་ན། ཕུང་པོར་ལྟ་བ་དང་། ཁམས་སུ་ལྟ་བ་དང་། སྐྱེ་མཆེད་དུ་ལྟ་བའོ། །ཤཱ་རིའི་བུ་ཁྱོད་ལ་གོ་བར་བྱའོ། །ཁོང་དུ་ཆུད་པར་བྱའོ། །ཇི་ལྟར་དགེ་བའི་བཤེས་གཉེན་གྱིས་རྗེས་སུ་སྙིང་བརྩེ་བ་དང་། དོན་དུ་འདོད་པ་དང་། ཕན་པར་འདོད་པ་དང་། བདེ་བར་འདོད་པ་དང་། གྲུབ་པ་དང་བདེ་བར་འདོད་པ་དེ་ལྟར་སྨྲ་ཡིས། ཤཱ་རིའི་བུ་ངའི་ཚིག་ཉོན་ལ་བག་ཡོད་པས་བསླབ་པར་བྱའོ། །ཁྱོད་ཀྱིས་དགེ་བ་ཅི་ཡིན་ཞེས་བཙལ་ཞིང་གོམས་པར་བྱའོ། །ཤཱ་རིའི་བུ་ལྔ་པོ་འདི་དག་ནི་ཡོངས་སུ་མ་དག་པའི་ཆོས་སྟོན་པའི་དགེ་སློང་གི་ཡིད་མི་བདེ་བར་འགྱུར་ཏེ། ལྔ་གང་ཞེ་ན། སངས་རྒྱས་ཀྱི་གསུང་ཐམས་ཅད་ཆུབ་པར་མ་བྱས་པ་དང་། མདོ་སྡེ་རྣམས་ཀྱི་གདམས་ངག་མེད་པ་དང་། རྩོད་པའི་གཏམ་ལ་མངོན་པར་དགའ་བ་དང་། ཆོས་རྣམས་ལ་མ་དད་པ་སྐྱེས་པས་མདོ་སྡེས་མདོ་སྡེ་ལ་སྐྱོན་འདོགས་པ་དང་། རྙེད་པ་དང་བཀུར་སྟི་སྔོན་དུ་བཏང་སྟེ་ཆོས་སྟོན་པའོ། །ཤཱ་རིའི་བུ་ལྔ་པོ་འདི་དག་ནི་ཡོངས་སུ་མ་དག་པའི་ཆོས་སྟོན་པའི་དགེ་སློང་རྣམས་ལ་ཡིད་མི་བདེ་བར་འགྱུར་རོ། །ཤཱ་རིའི་བུ་ང་ནི་དེ་ལྟ་བུའི་ཆོས་སྨྲ་བ་ནི་ངན་སོང་རྩོམ་པ་དང་། མྱ་ངན་ལས་འདས་པ་མི་རྩོམ་པ་ཡིན་ནོ་ཞེས་གསུང་ངོ་། །ཤཱ་རིའི་བུ་གཞན་ཡང་འདི་ན་དགེ་སློང་ཁ་ཅིག་ཆོས་མ་ཡིན་པའི་གཏམ་ཆོས་ཀྱི་གཏམ་ལྟར་བཅོས་ནས་འཁོར་གྱི་ནང་དུ་སོང་སྟེ། དད་པས་བྱིན་པའི་གནས་མལ་བཤམས་པ་འདི་ལ་འདུག་ནས་འཇིག་རྟེན་རྒྱང་པན་ལ་མཁས་པ་དག་རབ་ཏུ་སྟོན་པར་བྱེད། སངས་རྒྱས་ཀྱི་གསུང་ཉེ་བར་གཏོད་པར་བྱེད། གང་ཟག་ཏུ་ལྟ་བ་ཉེ་བར་གཏོད་པར་བྱེད་དེ། སངས་རྒྱས་ཀྱི་གསུང་གི་རྣམ་གྲངས་མི་ཤེས་པས་བདག་མེད་པའི་མཚན་ཉིད་ནི་སྤོང་བར་བྱེད་དོ། །དེ་ལ་དགེ་སློང་དེས་པ་རྣམས་ཀྱིས་མདོ་སྡེ་དང་རྗེས་སུ་འཐུན་པར་བསྐུལ་བ་ན། ཡིད་གཉིས་སུ་ལྷུང་ནས་བདག་ལ་མ་སྨྲ་ཤིག་ཅེས་མདོ་སྡེས་མདོ་སྡེ་ལ་སྐྱོན་འདོགས་པར་བྱེད། མདོ་སྡེས་མདོ་སྡེ་ལ་ཕྱིར་སུན་འབྱིན་པར་བྱེད་ཀྱི། རྗེས་སུ་སློབ་པར་ནི་མི་བྱེད་དོ། །མདོ་སྡེ་ལ་ཅུང་ཟད་ཅི་ཡང་རུང་བར་དཀྱོགས་ནས་འཕགས་པའི་ཕྱོགས་ཀྱི་ཆོས་སྟོན་ཏོ། །