།ཤཱ་རིའི་བུ་རྣམ་གྲངས་འདིས་ཀྱང་དགེ་སློང་སྡིག་ཅན་ནི་ལྷ་དང་བཅས་པའི་འཇིག་རྟེན་གྱི་ཆོམ་རྐུན་པ་ཞེས་བྱའོ། །ཤཱ་རིའི་བུ་ལྷ་དང་བཅས་པའི་འཇིག་རྟེན་གྱི་ཆོམ་རྐུན་པ་གང་ཡིན་པ་དེས་ནི་དད་པས་བྱིན་པའི་ཆུ་ཕོར་བུ་གང་ཡང་ཡོངས་སུ་སྦྱང་བར་ནུས་སམ། གསོལ་པ། བཅོམ་ལྡན་འདས་རྔོ་མི་ཐོགས་ལགས་སོ། །བཀའ་སྩལ་པ། ཤཱ་རིའི་བུ་དེ་ལ་མི་དགེ་བ་ལས་ཇི་སྐད་བརྗོད་པར་བྱ། སྡིག་ཅན་གྱི་དགེ་སློང་ལས་ཇི་སྐད་བརྗོད་པར་བྱ། ཤཱ་རིའི་བུ་ཚུལ་ཁྲིམས་རལ་བའི་དགེ་སློང་འདི་ནི་གང་ཡང་ལྷ་དང་བཅས་པའི་འཇིག་རྟེན་གྱི་ཆོམ་རྐུན་པ་ཉེས་པ་ཆེན་པོའི་སྐྱོན་ཅན་ཡིན་ཏེ། ཤཱ་རིའི་བུ་དེ་བཞིན་གཤེགས་པས་དོན་འདི་ལ་གཟིགས་ནས། འདི་སྐད་ཅེས་ལྕགས་ཀྱི་ཐུ་ལུམ་མེ་ལྕེ་འབར་བ་ལྟ་བུ་ཟ་བ་ནི་བླའི་ཚུལ་ཁྲིམས་འཆལ་པ་མ་བསྡམས་པའི་ཡུལ་འཁོར་གྱི་བསོད་སྙོམས་ཟ་བ་ནི་དེ་ལྟ་མ་ཡིན་ནོ་ཞེས་གསུངས་སོ། །ཤཱ་རིའི་བུ་ཡང་ཚུལ་ཁྲིམས་འཆལ་པའི་དགེ་སློང་ནི་རིགས་ཉམས་པ་དང་། དཔེ་བླང་དུ་མེད་པ་དང་། དེའི་ལུས་ཡོངས་སུ་གདུངས་པ་དང་། སེམས་ཡོངས་སུ་གདུངས་པ་ཡིན། རྨི་ལམ་དུ་སྡིག་པ་རྨི་བ་ཡིན། གཅིག་པུ་ལ་མངོན་པར་མི་དགའ་བ་དང་། དབེན་པར་སོང་ནས་དབུགས་རིང་དུ་འདྲེན་པ་དང་། དགེ་སློང་ཚུལ་ཁྲིམས་དང་ལྡན་པ་རྣམས་ཀྱི་མདུན་དུ་ཞུམ་པ་དང་། ཀུན་ཏུ་ཞུམ་པ་དང་། བག་འཁུམས་པ་དང་། བག་ཚ་བ་ཡིན། དད་པས་བྱིན་པ་ལེན་ན་ཡང་ཕྱོགས་འཁྲུགས་པའི་སེམས་དང་ལྡན་པ་ཡིན། ཟང་ཟིང་ལ་ཞེན་པ་དང་། རོའི་སྲེད་པ་ལ་ཞེན་པ་ཡིན་ཏེ། ལུས་ཞིག་ནས་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་རོ། །ཤཱ་རིའི་བུ་འདི་ཡང་དགེ་སློང་ཚུལ་ཁྲིམས་འཆལ་པའི་འཆལ་པའི་ཚུལ་ཁྲིམས་ཀྱི་སྐྱོན་བདུན་པ་ཡིན་ཏེ། ངན་སོང་རབ་ཏུ་རྫོགས་པར་བྱ་བའི་ཕྱིར་ཞུགས་པ་ཡིན་ནོ། །ཤཱ་རིའི་བུ་གཞན་ཡང་ཚུལ་ཁྲིམས་འཆལ་པའི་དགེ་སློང་ནི་བྲེ་མོའི་གཏམ་ལ་དགའ་བ་དང་། བྲེ་མོའི་གཏམ་ལ་མངོན་པར་དགའ་བ་དང་། ཕྲག་དོག་ཅན་ཡིན་ནོ། །ཚུལ་ཁྲིམས་འཆལ་པའི་འཁོར་ཅན་ཡིན་ནོ། །ཚུལ་ཁྲིམས་འཆལ་པ་སྟེན་པ་དང་། ཚུལ་ཁྲིམས་ཀྱི་གཏམ་ལ་མི་དགའ་བ་ཡིན་ནོ། །མདོ་སྡེ་ཟབ་མོ་འདི་ལྟ་བུ་དག་དང་མི་འཐུན་པར་བྱེད་པ་ཡིན་ནོ། །