སྨོན་པ་མེད་པའི་ཆོས་རྣམས་བཤད་པ་ན། སྐྲག་པར་འགྱུར་བ་དང་། དངང་བར་འགྱུར་བ་དང་། ཀུན་ཏུ་དངང་བར་འགྱུར་བའི་ཁྱིམ་པའམ། རབ་ཏུ་བྱུང་བ་དེ་དག་ཐམས་ཅད་ནི་སངས་རྒྱས་ཀྱི་ཉན་ཐོས་རྣམས་ཀྱིས་བདུད་ཀྱིས་མངགས་པ་དང་། དགེ་སྦྱོང་མ་ཡིན་པར་དགེ་སྦྱོང་ལྟར་བཅོས་པ་དང་། ཆོས་ཀྱི་ཆོམ་རྐུན་གནས་པ་དང་། ཆོས་ཀྱི་ཆོམ་རྐུན་པ་དང་། སྤྲེའུ་དང་འདྲ་བར་སྤྱོད་པ་དང་། བདུད་ཀྱི་འཁོར་ཡིན་པ་དེ་ལྟར་ཤེས་པར་བྱའོ། །ཤཱ་རིའི་བུ་གང་དག་བདག་ཏུ་ལྟ་བ་དང་ལྡན་པ་དང་། སེམས་ཅན་ཏུ་ལྟ་བ་དང་། སྲོག་ཏུ་ལྟ་བ་དང་། གང་ཟག་ཏུ་ལྟ་བ་དང་ལྡན་པ་དེ་དག་ཐམས་ཅད་ནི་ཆོས་འདུལ་བ་འདི་ལ་བདུད་ཀྱི་ཕྱོགས་ཞེས་བྱའོ། །དེ་ཅིའི་ཕྱིར་ཞེ་ན། ཤཱ་རིའི་བུ་དེ་བཞིན་གཤེགས་པས་འདུས་བྱས་སུ་གཏོགས་པ་འདི་ལ་ནི་བདག་གམ། བདག་གིའམ། སེམས་ཅན་ནམ། སྲོག་གམ། གསོ་བའམ། སྐྱེས་བུ་འམ། གང་ཟག་གམ། ཤེད་ལས་སྐྱེས་སམ། ཤེད་བུའམ། བྱེད་པ་པོའམ། བྱེད་དུ་འཇུག་པ་པོའམ། ཚོར་བ་པོའམ། ཀུན་ཏུ་ཚོར་བ་པོའམ། ལྷའམ། དྲི་ཟའམ། རྟག་པའམ། བརྟན་པའམ། ཐེར་ཟུག་གམ། ཡོངས་སུ་མི་འགྱུར་བའི་ཆོས་ཅན་རྣམས་ཀྱིས་སྟོང་ངོ་ཞེས་གསུངས་པ་ནི་འདི་ཡིན་ཏེ། མདོ་སྡེའི་ཚིག་འདི་དག་དེ་དག་གིས་འཛིན་པར་འགྱུར། གཞན་ལ་ཡང་སྟོན་པར་འགྱུར་ཞིང་གང་ཟག་ཏུ་ལྟ་བར་ཡང་བྱིང་བར་འགྱུར་བའི་ཕྱིར་རོ། །ཤཱ་རིའི་བུ་སྐྱེས་བུ་དམ་པ་མ་ཡིན་པ་དེ་ལྟ་བུ་དེ་དག་ནི་སྐལ་བ་ངན་པ་ཅན་ཞེས་བྱའོ། །འབྱེད་པ་པོ་ཞེས་བྱའོ། །དགེ་འདུན་འབྱེད་པ་པོ་ཞེས་བྱའོ། །ཁ་དྲངས་པ་ཞེས་བྱའོ། །དགེ་སྦྱོང་སུན་འབྱིན་པ་ཞེས་བྱའོ། །དགེ་སྦྱོང་སྲེད་ཞེས་བྱའོ། །རོ་ཞེས་བྱའོ། །ངོ་འཛུམ་གནག་པ་ཞེས་བྱའོ། །ཕྲ་མ་ཅན་ཞེས་བྱའོ། །དགེ་སྦྱོང་གི་རིགས་ཅན་ཞེས་བྱའོ། །དགེ་སྦྱོང་གི་སྙིགས་མ་ཞེས་བྱའོ། །དགེ་སྦྱོང་བཀྲེན་པ་ཞེས་བྱའོ། །དགེ་སྦྱོང་ཕལ་པ་ཞེས་བྱའོ། །ཁུར་བླངས་པ་ཞེས་བྱའོ། །དེ་བཞིན་གཤེགས་པ་ལ་གསོད་པ་ཞེས་བྱའོ། །མཚམས་མེད་པ་དང་ལྡན་པ་ཞེས་བྱའོ། །སྡིག་པའི་གྲོགས་པོ་ཞེས་བྱའོ། །ཚུལ་ཁྲིམས་འཆལ་པ་ཞེས་བྱའོ།