མཚན་མ་མེད་པ་དང་། མཚན་མ་མ་ཡིན་པ་མེད་པ་དང་། མཚན་མའི་ལས་མེད་པ་དང་། ཐ་སྙད་དུ་གཟུང་བ་མེད་པ་དང་། བཏགས་པའི་ལས་མེད་པ་ཡིན་ཏེ། དེས་ན་དངོས་པོ་མེད་པ་ཐ་སྙད་ཀུན་ཏུ་ཆད་པ་དེ་ལ་རློམ་སེམས་སུ་མི་བྱེད་པ་གང་ཡིན་པ་དེ་ནི་དེ་བཞིན་གཤེགས་པ་མཐོང་བའི་མཆོག་ཡིན་ནོ། །ཤཱ་རིའི་བུ་གང་མཐོང་ན་དེ་བཞིན་གཤེགས་པ་མཐོང་བར་འགྱུར་བ་དེ་བཞིན་གཤེགས་པས་ཆོས་མཐོང་བ་གསུངས་པ་གང་ཞེ་ན། མཚན་མ་མེད་པ་དང་། སྨོན་པ་མེད་པ་དང་། སྤྲོས་པ་མེད་པ་དང་། ལེན་པ་མེད་པ་དང་། ཐ་སྙད་ཐམས་ཅད་ལ་རྟག་ཏུ་མི་དམིགས་པ་སྟེ། དེ་ཡང་འདི་ལྟ་སྟེ། མྱ་ངན་ལས་འདས་པ་ལ་རློམ་སེམས་སུ་མི་བྱེད་པ་ཡིན་ནོ། །དེ་ཅིའི་ཕྱིར་ཞེ་ན། ཤཱ་རིའི་བུ་ང་ཡང་མྱ་ངན་ལས་འདས་པ་ལ་རློམ་སེམས་སུ་མི་མཛད། མྱ་ངན་ལས་འདས་པས་རློམ་སེམས་སུ་མི་མཛད། མྱ་ངན་ལས་འདས་པ་ལ་མངོན་པར་དགྱེས་པར་མི་མཛད་ན། ཤཱ་རིའི་བུ་ང་མྱ་ངན་ལས་འདས་པ་ལ་རློམ་སེམས་སུ་བྱོས་ཤིག་ཅེའམ། མྱ་ངན་ལས་འདས་པས་རློམ་སེམས་སུ་བྱོས་ཤིག་ཅེའམ། མྱ་ངན་ལས་འདས་པ་ལ་མངོན་པར་དགའ་བར་བྱོས་ཤིག་ཅེས་དེ་ཅི་གསུང་བར་འགྱུར་རམ། ཤཱ་རིའི་བུ་གང་སུ་ཡང་རུང་མྱ་ངན་ལས་འདས་པ་དམིགས་པར་གྱུར་ན། དེ་དག་གི་རྗེས་སུ་ང་རབ་ཏུ་མི་འབྱུང་བ་ཞིག་ན། སྟོན་པ་གང་ཡིན་པ་དེ་དག་གི་རྗེས་སུ་རབ་ཏུ་བྱུང་སྟེ། སྟོན་པ་གང་ཡིན་པ་དེ་དག་གི་སྟོན་པའི་ཆོས་ནི་སྐྱོབ་པ་ཡིན་པར་ཤཱ་རིའི་བུ་ཆོས་འདུལ་བ་འདི་ལ་རིག་པར་བྱའོ། །དེ་དག་ནི་ཆོས་འདུལ་བ་འདི་ལ་སུན་འབྱིན་པ་ཡིན་པར་རིག་པར་བྱའོ། །དེ་དག་ནི་ཆོས་འདུལ་བ་འདི་ལ་རྩོད་པ་ཅན་ཡིན་པར་རིག་པར་བྱ་སྟེ། ཤཱ་རིའི་བུ་དཔེར་ན་གྲོང་རྡལ་དང་། ཚོང་རྡལ་དང་། གྲོང་ཁྱེར་དག་གི་ཆོམ་རྐུན་པ་ཆེན་པོ་བཞིན་ནོ། །དེ་ཅིའི་ཕྱིར་ཞེ་ན། ཤཱ་རིའི་བུ་སྐྱེས་བུ་བླུན་པོ་དེ་དག་ནི་མྱ་ངན་ལས་འདས་པ་ལ་དམིགས་པ་ན་དམིགས་པར་བྱེད་ན། གང་ཟག་ཏུ་ལྟ་སྨོས་ཀྱང་ཅི་དགོས། ཤཱ་རིའི་བུ་དེ་དག་གི་སྟོན་པ་ཡང་ང་མ་ཡིན་ལ་ངའི་ཉན་ཐོས་ཀྱང་དེ་དག་མ་ཡིན་ཞིང་འདི་ལྟར་ངའི་ཉན་ཐོས་ཀྱི་དགེ་འདུན་འདུ་བའི་ནང་དུ་ཡང་མི་གཏོགས་པས་ང་ནི་སྐྱེས་བུ་བླུན་པོ་དེ་དག་ལག་བརྡས་སྐྲོད་པར་མཛད་དོ།