།ཤཱ་རིའི་བུ་འདི་ལྟར་ཡང་དག་པའི་ལྟ་བ་ནི་འདི་ཡིན་ནོ། །ལོག་པའི་ལྟ་བ་ནི་འདི་ཡིན་ནོ། །ཞེས་མ་གསུངས་པ་མ་ཡིན་ཏེ། དེ་ཅིའི་ཕྱིར་ཞེ་ན། ཤཱ་རིའི་བུ་ལྟ་བར་གྱུར་པ་ཐམས་ཅད་ནི་ཡང་དག་པ་མ་ཡིན་པ་ལ་དམིགས་པ་ཡིན་པའི་ཕྱིར་རོ། །ཤཱ་རིའི་བུ་གང་སུ་ཡང་རུང་འདི་སྙམ་དུ་ཡང་དག་པའི་ལྟ་བ་ནི་འདི་ཡིན་ནོ། །ལོག་པའི་ལྟ་བ་ནི་འདི་ཡིན་ནོ་སྙམ་དུ་སེམས་ན། དེ་ཉིད་ལོག་པར་ལྟ་བ་ཡིན་ནོ། །དེ་ཅིའི་ཕྱིར་ཞེ་ན། ཤཱ་རིའི་བུ་འཕགས་པའི་ཆོས་འདུལ་བ་འདི་ལ་ནམ་མཁའ་དང་། ལག་མཐིལ་ཇི་ལྟ་བ་བཞིན་དུ་ལྟ་བར་གྱུར་པ་ཐམས་ཅད་ཀུན་ཏུ་སྤངས་པ་དང་། ཐ་སྙད་ཐམས་ཅད་ཀུན་ཏུ་ཆད་པ་ཡིན་ཏེ་དེ་ལྟ་བུ་ནི་དགེ་སྦྱོང་གི་ཆོས་ཡིན་ནོ། །དགེ་བའི་བཤེས་གཉེན་གྱི་ལེའུ་སྟེ་གསུམ་པའོ།། །།ཤཱ་རིའི་བུ་དེ་ལ་འཕགས་པའི་དགེ་འདུན་ཞེས་བྱ་བ་གང་ཞེ་ན། གང་དག་སྐྱེ་བ་མེད་པ་དང་། འགག་པ་མེད་པ་དང་། འབྱུང་བ་མེད་པ་དང་། མཚན་མ་མེད་པ་དང་། མཚན་ཉིད་མེད་པ་དང་། སྤྲོས་པ་མེད་པ་དེ་ལ་འཇུག་པ་དང་། ལྷག་པར་མོས་པ་དང་། ཡང་དག་པར་སྟོན་པ་དང་། ཡང་དག་པར་གཞོལ་བ་དེ་ལྟ་བུའི་བཟོད་པ་དང་ལྡན་པ་སྟེ། མཚན་ཉིད་མེད་པ་ལ་ལྷག་པར་མོས་པ་ནི་བདག་གང་ཡིན་པ་ཡང་མི་དམིགས་ན། རྒྱུན་དུ་ཞུགས་པ་དམིགས་པ་ལྟ་ཅི་སྨོས། ལན་ཅིག་ཕྱིར་འོང་བ་ལྟ་ཅི་སྨོས། ཕྱིར་མི་འོང་བ་ལྟ་ཅི་སྨོས། དགྲ་བཅོམ་པ་དམིགས་པ་ལྟ་ཅི་སྨོས། ཆོས་སུ་དམིགས་པ་ལྟ་ཅི་སྨོས། སྐྱེས་པ་དང་བུད་མེད་དང་མ་ནིང་ལྟ་ཅི་སྨོས། བཏགས་པར་དམིགས་པ་ལྟ་ཅི་སྨོས། གནས་སུ་དམིགས་པ་ལྟ་ཅི་སྨོས་ཏེ། འདི་དང་འདི་ལྟ་བུའོ་ཞེས་བྱ་བ་མི་དམིགས་པ་འདི་ནི་དགེ་འདུན་ཡིན་ནོ། །དེ་ལྟ་མོད་ཀྱི་ཤཱ་རིའི་བུ་མཚན་ཉིད་མེད་པ་དང་། འགག་པ་མེད་པ་དང་། འབྱུང་བ་མེད་པ་དེ་ལ་མོས་པ་ནི་ཉུང་ངོ་། །ཤཱ་རིའི་བུ་མཚན་ཉིད་མེད་པ་དང་། འགག་པ་མེད་པ་དང་། འབྱུང་བ་མེད་པ་ལ་མོས་པ་གང་ཡིན་པ་དེ་དག་ནི་ཕྱིན་ཅི་མ་ལོག་པའི་ཤེས་པས་གཞན་དང་གཞན་དག་ཤེས་ཤིང་། གཞན་དང་གཞན་དག་རབ་ཏུ་ཤེས་ནས། ཀུན་ཏུ་གླེང་བར་བྱེད། ཡང་དག་པར་གཞོལ་བར་བྱེད།