མཚན་མ་མེད་པ་དང་། མཚན་ཉིད་མེད་པ་དང་། འདུས་མ་བྱས་པ་དང་། བསྟན་དུ་མེད་པ་ལ་དེ་བཞིན་གཤེགས་པས་ཆོས་བསྟན་པ་གང་ཡིན་པ་འདི་ནི་ཆེས་མཆོག་ཏུ་ངོ་མཚར་ཡིན་ནོ། །གླེང་གཞིའི་ལེའུ་སྟེ་དང་པོའོ།། །།གསོལ་པ། བཅོམ་ལྡན་འདས་ཆོས་ཀྱི་རྣམ་གྲངས་འདི་ལ་གདམས་པ་ཇི་ལྟ་བུ་དང་། རྗེས་སུ་བསྟན་པ་ཇི་ལྟ་བུས་སྡིག་པའི་གྲོགས་པོར་འགྱུར་ལགས། གདམས་པ་ཇི་ལྟ་བུ་དང་། རྗེས་སུ་བསྟན་པ་ཇི་ལྟ་བུས་དགེ་བའི་བཤེས་གཉེན་ཞེས་བགྱི་ལགས། བཀའ་སྩལ་པ། ཤཱ་རིའི་བུ་འདི་ན་དགེ་སློང་གིས་དགེ་སློང་ལ་འདི་སྐད་རབ་ཏུ་འདོམས་ཤིང་འདི་སྐད་རྗེས་སུ་སྟོན་ཏེ། དགེ་སློང་ཚུར་ཤོག །ཁྱོད་སངས་རྒྱས་ཡིད་ལ་གྱིས་ཤིག །ཆོས་ཡིད་ལ་གྱིས་ཤིག །དགེ་འདུན་ཡིད་ལ་གྱིས་ཤིག །ཚུལ་ཁྲིམས་རྗེས་སུ་དྲན་པ་ཡིད་ལ་གྱིས་ཤིག །གཏོང་བ་རྗེས་སུ་དྲན་པ་ཡིད་ལ་གྱིས་ཤིག །ལྷ་རྗེས་སུ་དྲན་པ་ཡིད་ལ་གྱིས་ཤིག །དགེ་སློང་ཚུར་ཤོག །ཁྱོད་ལུས་ལ་ལུས་ཀྱི་རྗེས་སུ་ལྟ་ཞིང་གནས་པར་གྱིས་ཤིག །གནས་པའི་མཚན་མ་གཟུང་བའི་ཕྱིར། ལུས་ལ་མི་གཙང་བའི་མཚན་མ་ཡིད་ལ་གྱིས་ཤིག །དགེ་སློང་ཚུར་ཤོག །ཁྱོད་འདུ་བྱེད་ཐམས་ཅད་མི་རྟག་པ་ཡིན་པར་ཡིད་ལ་གྱིས་ཤིག །སྡུག་བསྔལ་བ་ཡིན་པར་ཡིད་ལ་གྱིས་ཤིག །ཆོས་ཐམས་ཅད་བདག་མེད་པ་ཡིན་པར་ཡིད་ལ་གྱིས་ཤིག །སྟོང་པ་ཡིན་པར་ཡིད་ལ་གྱིས་ཤིག །དགེ་སློང་ཚུར་ཤོག །ཁྱོད་དམིགས་པའི་མཚན་མ་ཟུང་ལ་བཟུང་ནས་སེམས་ལ་ཉེ་བར་ཞོག་ཤིག །སེམས་མི་གཡེང་བར་བྱ་བའི་ཕྱིར་དམིགས་པའི་མཚན་མ་ཟུང་ཤིག །དགེ་སློང་ཚུར་ཤོག །ཁྱོད་དགེ་བའི་ཆོས་རྣམས་ལ་ལྟོས་པ་དང་བཅས་པར་གྱིས་ཤིག །མི་དགེ་བའི་ཆོས་རྣམས་ཀྱི་མཚན་མ་མ་འཛིན་ཅིག །མ་འཛིན་ལ་དེ་རྣམས་སྤང་བའི་ཕྱིར་སྤྲོ་བ་སྐྱེད་ཅིག །མ་འོངས་པ་ན་མི་སྐྱེ་བར་བྱ་བའི་ཕྱིར་མི་དགེ་བའི་ཆོས་སྤངས་པ་རྣམས་ཀྱི་མཚན་མའི་རྗེས་སུ་འབྲང་བར་གྱིས་ཤིག །དགེ་སློང་ཚུར་ཤོག །ཁྱོད་ཕུང་པོའི་རྣམ་པ་དང་། ཁམས་ཀྱི་རྣམ་པ་དང་། སྐྱེ་མཆེད་ཀྱི་རྣམ་པ་ལ་ཡིད་འབྱུང་བར་རྗེས་སུ་ལྟ་ཞིང་གནས་པར་གྱིས་ཤིག