།ཤཱ་རིའི་བུ་འདི་ལྟར་ཡང་བསྐལ་པ་ལྔ་བརྒྱ་པོ་དེ་དག་འདས་ནས་སླར་འཛམ་བུའི་གླིང་དུ་རྒྱལ་སྲིད་བྱེད་དུ་བཅུག་སྟེ། རྒྱལ་པོ་ཆེན་པོ་རྣམས་དང་། ལྷ་རྣམས་ཀྱི་སྐལ་པ་ཆེན་པོ་དང་ལྡན་པར་སྐྱེས་སོ། །དེ་ནས་སུམ་ཅུ་རྩ་གསུམ་པའི་ལྷ་རྣམས་ཀྱི་ལྷའི་དབང་པོ་གཅིག་པུར་གྱུར་ཏོ། །ཤཱ་རིའི་བུ་རྣམ་གྲངས་འདིས་བསྐལ་པ་ལྔ་བརྒྱར་འཛམ་བུའི་གླིང་དུ་སྐྱེས་ཏེ། དེ་བསྐལ་པ་ལྔ་བརྒྱར་ཚངས་པར་གྱུར་ན་ཡང་ཚངས་པ་ཆེན་པོར་གྱུར་ཏེ། ཤཱ་རིའི་བུ་བསྐལ་པ་བརྒྱ་སྟོང་ཕྲག་དགུར་སྐྱེ་བ་གཅིག་པོ་མི་རྣམས་ཀྱི་ནང་དུ་སྐྱེས་སོ། །ཤཱ་རིའི་བུ་འདི་ལྟར་བསྐལ་པ་བརྒྱ་སྟོང་ཕྲག་དགུར་རང་སངས་རྒྱས་ནི་བྱུང་བར་གྱུར་གྱི། སངས་རྒྱས་ནི་བྱུང་བར་མ་གྱུར་ཏོ། །སེམས་ཅན་ཕལ་ཆེར་ངན་འགྲོར་འགྲོ་བར་གྱུར་པ་ན། ཤཱ་རིའི་བུ་འདི་ལྟར་བསྐལ་པ་བརྒྱ་སྟོང་ཕྲག་དགུ་པོ་དེ་དག་ཏུ་སྐྱེ་བ་མི་རྣམས་ཀྱི་ནང་དུ་སྐྱེས་ཏེ། འཇིག་རྟེན་འདི་འཇིག་པ་ན་ནི་འོད་གསལ་གྱི་ལྷའི་ནང་དུ་སྐྱེས་སོ། །འཇིག་རྟེན་འདི་ཆགས་པ་ན་ནི་འདོད་པ་ན་སྤྱོད་པའི་ལྷ་རྣམས་སུ་སྐྱེས་ཏེ། འདོད་པ་ན་སྤྱོད་པའི་ལྷ་ཆེན་པོའི་རིས་ཀྱི་བདག་པོར་གྱུར་ཏོ། །ཤཱ་རིའི་བུ་འདི་ལྟར་ཡང་བསྐལ་པ་ཁྲི་པོ་དེ་དག་འདས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་ཏུ་སྦས་པ་ཞེས་བྱ་བ་འཇིག་རྟེན་དུ་བྱུང་བ་དང་། ང་ཡང་ཚངས་པའི་འཇིག་རྟེན་ནས་ཚེ་འཕོས་ནས་འཛམ་བུའི་གླིང་དུ་སྐྱེས་ཏེ། འཁོར་ལོས་སྒྱུར་བའི་རྒྱལ་པོ་ལེགས་མཐོང་ཞེས་བྱ་བར་གྱུར་ཏོ། །དེའི་ཚེ་མི་དེ་དག་གི་ཚེ་ནི་ལོ་སྟོང་ཕྲག་དགུ་བཅུ་ཐུབ་པར་གྱུར་རོ།། །།སངས་རྒྱས་ཀྱི་སྡེ་སྣོད་ཚུལ་ཁྲིམས་འཆལ་པ་ཚར་གཅོད་པ། བམ་པོ་དྲུག་པ། དེ་ནས་ངས་བཅོམ་ལྡན་འདས་དེ་དགེ་སློང་གི་དགེ་འདུན་དགེ་སློང་བརྒྱ་སྟོང་བྱེ་བ་ཕྲག་དགུ་བཅུ་དང་ཐབས་ཅིག་ཏུ་ཇི་སྲིད་འཚོའི་བར་དུ་ཆོས་གོས་དང་ཞེས་བྱ་བ་ནས། བདེ་བའི་ཡོ་བྱད་ཐམས་ཅད་ཀྱིས་ཐམས་ཅད་དུ་བདེ་བར་གནས་པར་བྱ་བའི་ཕྱིར་བཀུར་སྟི་བྱས། མཉེས་པར་བྱས་སོ་ཞེས་བྱ་བ་ནས། བཅོམ་ལྡན་འདས་དེས་ཀྱང་ང་ལུང་མ་བསྟན་ཏོ་ཞེས་བྱ་བའི་བར་དུ་བརྗོད་པར་བྱ་སྟེ། འདི་ལྟར་ཆོས་རྣམས་ཀྱི་རང་གི་མཚན་ཉིད་མི་ཤེས་ཤིང་། བདག་ཏུ་སྨྲ་བ་ལ་མངོན་པར་ཞེན་པ་དང་། དམིགས་པ་ཅན་གྱི་ལྟ་བར་གྱུར་པའི་ཕྱིར་རོ། །ཤཱ་རིའི་བུ་དེའི་ཚེ་བསྐལ་པ་ཡོངས་སུ་ཚང་བར་སངས་རྒྱས་མཚན་ཐ་དད་པ་སྟོང་བྱུང་བ་དེ་ཡང་ང་འཁོར་ལོས་སྒྱུར་བའི་རྒྱལ་པོར་གྱུར་པ་ན།